دوای گەیشتنی شاندێکی باڵای بەحرەین بۆ هەولێری پایتەخت، ئومێد خۆشناو، پارێزگاری هەولێر، لە کۆنگرەیەکی رۆژنامەوانیدا رایگەیاند، هەرێمی کوردستان بەردەوامە لە هەوڵەکانی بۆ پەرەپێدانی پەیوەندییەکانی لەگەڵ وڵاتانی ناوچەکە، کەنداو و جیهان، لەسەرجەم ئاستە دیپلۆماسی، سیاسی و بازرگانییەکاندا.
پارێزگاری هەولێر، ئەوەی خستەڕوو؛ سیاسەتی حکوومەتی هەرێم و ستراتیژییەتی سەرۆکوەزیران مەسرور بارزانی، لەسەر بنەمای پەرەپێدانی پەیوەندییەکان و دابینکردنی سوودی هاوبەش بۆ هەردوولا داڕێژراوە.
سەبارەت بە سەردانی شاندە بەحرەینییەکە، پارێزگاری هەولێر ئاشکرای کرد، ” شاندێکی باڵای وڵاتی بەحرەین کە لە ئاستی وەزیر و کۆمەڵێک کەسایەتی گەورەی بازرگانی پێک هاتوون، گەیشتنە هەولێر، ئەم وڵاتە نییەتی جددی هەیە بۆ ئەوەی لە داهاتوودا وەبەرهێنانی زیاتر لە هەرێمی کوردستان و بەتایبەتی لە هەولێر ئەنجام بدەن.”
گوتیشی: “شاندەکە بۆ ماوەی چەند رۆژێک لە هەولێر دەمێننەوە و بڕیارە چەندین کۆبوونەوەی فەرمی لەگەڵ بازرگانان و وەبەرهێنەرانی هەرێمی کوردستان ئەنجام بدەن، بە مەبەستی گەیشتن بە رێککەوتن بۆ ئەنجامدانی وەبەرهێنانی باشتر لە ناوچەکەدا.”