شۆڕش غەفووری دوو كتێبی نوێ بڵاو دەكاتەوە، هەردوو كتێبەكەی لە فارسییەوە وەرگێڕادراون، كتێبی یەكەمیان دید و تێڕوانینی ڕەخنەیی نووسەرانی فارسینووسە لەسەر چەند ڕۆماننووسێكی كورد، ئەوی تریان چیرۆكی ئازاری ژنانی زیندانە، هەڵبەت بە گێڕانەوەی سپیدە قولیان ژنە بوێر و زیندانییەكەی ئێران.
کتێبی (نووسەرانی كورد چۆن دەنووسن؟)، دید و تێڕوانینی ڕەخنەیی نووسەرانی فارسینووسە لەسەر چەند ڕۆماننووسێكی كورد وەک “جەبار جەمال غەریب، شێرزاد حەسەن، بەختیار عەلی، عەتا محەمەد، بەڕۆژ ئاكرەیی و جان دۆست”، ئەم كتێبە بەرگی چوارەمی زنجیرە كتێبەكانی «نووسەران چۆن دەنووسن؟»ـە و وەرگێڕ هیوادارە بەم كارەی توانیبێتی ئەو دیدەی بۆ دەقی كوردی و تێڕوانین و ئایدیای نووسەرانی كورد لە دەرەوەی كوردستان هەیە، بەم کارە خرابێتە ڕوو تا خوێنەران بزانن ئەوانی دیکە چۆن بیر لە کورد دەكەنەوە؟
كتێبی دووەم ناوی (بانگهێشتی دەواڵپای ڕیسوایی بە كێكەسێو)ە؛ ئەم كتێبە حیكایەت و یادەوەرییەكی سادە نییە، گرمۆڵەیەك ئازاری سەرچاوەگرتووە لە نەریت و پیاوسالاری و ئایین و دیكتاتۆریەت، “كتێبێك كە ئەشكەنجە و بێدەسەڵاتی و زڵمی لێ دەچۆڕێت! ئەم كتێبە چیرۆكی ئازاری ژنانی زیندانییە، هەڵبەت بە گێڕانەوە و قەڵەمی “سپیدە قولیان”، ژنەبوێر و زیندانییەكەی ئێران”.
وەرگێڕ لەبارەی ئەم کتێبەوە دەڵێت لە ئێرانی پڕ لە ترس و تۆقین و زیندان و خوێن و برین، ئەوەی دڵخۆشمان دەكات، بوێری و چاونەترسی ژنانە كە بووەتە سیمبول و نوێنگەی ئازادیخوازی، شۆڕشی ژینا ڕێك بەرهەمی ئەم بوێرییە بوو.