حەیات مەجید
(١) ی نۆڤەمبەر
ژیان تەقەل دوور ده‌کەم
بە شوژنی رەقی رۆژگار
ھەر تەقەڵێک جوانیەک دەنەخشێنم.
(٢)ی نۆڤەمبەر
ژیان وەکو نۆڤەمبەرەکانم
بێ رەحمە لەگەڵم
منیش دەبمە
ھەوێرێک بۆ دێمێکی دوور.
(٣)ی نۆڤەمبەر
نۆڤەمبەرەکانم پڕن لەو نھێنیانەی
کە ھاڕەیان بە رۆحم کردوە
تا قیامەت نا وترێن.
(٤)ی نۆڤەمبەر
کە دڵم شکا، گیانم بوو بە شەختە
ھاوارێک لە تۆ ئەم شەختە
بڕمێنە.
(٥)ی نۆڤەمبەر
ئەوەندە تارە شەوەکانی
نۆڤەمبەرم
وەختە لە بیری کەم
ئاسمان پڕە لە ئەستێرە.
(٦)ی نۆڤەمبەر
لە شەوێکی نۆڤەمبەرا
زایەڵەی دەفە
جێ پێکانت،
لەسەر دڵی منە ئەڕۆی
نەک لەسەر زەوی.
(٧)ی نۆڤەمبەر
نۆڤەمبەرەکان
لە جنسی زوقمن
رێک لە تۆ دەچن
ساردن، سارد.
(٨)ی نۆڤەمبەر
زەنگیانەی وردە خەمەکانم
بە دەزووی جریوەی
بەیانیەکی نۆڤەمبەر
ئەھۆنمەوە، تا لە گوێما بزرنگێتەوە
(٩)ی نۆڤەمبەر
وتت ئێوارە پەیوەندی ئه‌کەم
یەک ھەفتەی نۆڤەمبەرە، لای من بەیانیەو
ئێوارە دانایە.
(١٠)ی نۆڤەمبەر
دوعاکانی نۆڤەمبەر
گیرا نابن،
دەستم بەرز کردەوە بێ تۆ نەبم
ببینە بەرەکەت کەوتە تەنیایمەوە.
(١١)ی نۆڤەمبەر
نۆڤەمبەرەکان کپن لە وشە
ئەو کپیە دڵم شەقار دەکاو بە بێدەنگی
دەیشکێنێ.
(١٢)ی نۆڤەمبەر
نۆڤەمبەرەکانم
پریان کردووم لە چاڵ
رێگەش تارە
یا چرایە یا خۆت ھەڵکە با نەکەوی.
(١٣)ی نۆڤەمبەر
بەبێ شەڕ و ئاشوب
نۆڤەمبەرەکانم زامدارن
خوێنیان لێ ئەچۆرێ
(١٤)ی نۆڤەمبەر
خۆت ئابلۆقە مەدە بە
وشەیەکی غەمگین
با لە ناوەندی نۆڤمبەر
بە خەندەت چرۆ بکەم.
(١٥)ی نۆڤەمبەر
چاوەڕوانم
ھەرەس پێ بھێنە
بەڵێن بدە
وەک فلامینگۆ لەسەر یەک پا سەدەیەک چاوەڕێت دەکەم