شوعلە رەسول
لە مێژووی مرۆڤایەتیدا، ئافرەت هەمیشە ڕۆڵێکی گرنگی هەبووە لە دروستکردنی کۆمەڵگە و پەروەردەکردنی منداڵ. بەڵام، مەخابن لە زۆرێک لە کۆمەڵگە نەریتیدا، ئافرەت ڕووبەڕووی کۆسپ و ئاستەنگی زۆر بووەتەوە کە بووەتە هۆکارێک بۆ ڕێگریکردن لە پێشکەوتن و گەشەکردنی. سەرەڕای ئەم هەموو ئاستەنگانە، ئافرەتی تێکۆشەر بە ویستی خۆی و بە تواناکانییەوە توانیویەتی ڕێگای خۆی بدۆزێتەوە و پێش بکەوێت.
ئافرەتی تێکۆشەر ئەو ئافرەتەیە کە لە بەرامبەر هەموو زۆرداری و ناعەدالەتییەکاندا ڕاوەستاوە. ئەو تەنها بۆ مافەکانی خۆی تێناکۆشێت، بەڵکو بۆ مافەکانی هەموو ئافرەتانی دیکەش دەنگی بەرزکردووەتەوە. لە بوارەکانی وەک خوێندن، کار، سیاسەت، هونەر بە هەموو جۆرەکانییەوە، و لە ئابووریدا، ئافرەتان توانیویانە خۆیان بسەلمێنن و بیسەلمێنن کە تواناکانیان بۆ یەکسانی لەگەڵ پیاواندا هاوسەنگە.
لە کۆمەڵگەی کوردیشدا، ئافرەتان ڕۆڵی گرنگیان هەبووە لە پاراستنی کەلتوور و زمان و مێژووی نەتەوەکەیان. لە کاتی شەڕ و ناکۆکییەکاندا، ئافرەتانی کورد نەک هەر ماڵ و منداڵیان پاراستووە، بەڵکو بە خەبات و قوربانیدانیان خزمەتی شۆڕشی کوردییان کردووە و لە کاری سیاسی و نهێنیدا دەستێکی باڵایان هەبووە لە پێناوی ئازادی و سەربەخۆیی دا. زۆرێک لە ئافرەتانی کورد بوونەتە سیمبولێکی بەرز بۆ نەوەی داهاتوو.
ئەمڕۆ ئافرەتی تێکۆشەر لە هەموو بوارەکاندا بەردەوامە لە خەباتی خۆی؛ لە بوارە ئەکادیمی و سەربازییەکان و لە دامەزراوە حکوومییەکان و لە ڕێکخراوە مەدەنییەکان بگرە تا کاروباری سیاسی، ئافرەتان بە توانا و لێهاتوویی خۆیان جێگەی ڕێز و پێزانینیان دەستەبەر کردووە. ئافرەتان نیشانیان داوە کە ئەگەر هەل و دەرفەتی یەکسانیان پێبدرێت، دەتوانن وەک پیاوان سەرکەوتوو بن.
بەڵام هێشتا ڕێگایەکی درێژ لە پێشدایە. لە زۆر شوێندا ئافرەتان ڕووبەڕووی جیاکاری و ناعەدالەتی دەبنەوە. گرنگە کۆمەڵگە لە هەموو ئاستەکانەوە پشتگیری لە ئافرەتان بکات و ڕێگا بۆ پێشکەوتنیان خۆش بکات.
ئافرەتی تێکۆشەر نیشانەی ویست و بەهێزییە. ئەو ئومێدی داهاتوویەکی باشترە بۆ هەموو کەسانی کۆمەڵگە. کاتێک ئافرەت ئازاد و توانابەخش دەبێت، تەواوی کۆمەڵگە سوودمەند دەبێت.
لە کۆتاییدا دەبێت بڵێین کە ئافرەتی تێکۆشەر تەنها ئەو کەسە نییە کە لە دژی ئاستەنگەکان دەجەنگێت، بەڵکو ئەو کەسەیە کە بە هیوا و دڵسۆزییەوە بۆ دروستکردنی جیهانێکی باشتر کاردەکات. ئەو نموونەیە بۆ منداڵان و ئەو ڕێگایەی کە هەنگاوی بۆ دەنێت بەرەو داهاتوویەکی گەش و ئاسۆیەکی ڕووناک و یەکسانە.