فەرهاد قادر ئۆمەر
راستیەك هەیە هەموومان دەیزانین، بەڵام فەرامۆشی دەكەین، ئەویش جەستەی مرۆڤ چۆن هەمیشە بە بەردەوامی پێویستی بە ڤیتامین وكالۆری هەیە لەپێناو بەردەوامیدان بەچالاكیەكانی بەتەندروستیەكی باشەوە، بە پێی ئەو گوتە نەستەقەی دەڵێ:” ئەقڵی باش لەجەستەی باشدایە”، بە هەمان شێوە پەروەردەوفێركردن پێویستی بە خۆراكی گیان هەیە، كە لەسیستەمێكی دروست رەنگدەداتەوە، سیستەمێك لەگەڵ پێشكەوتن وبەرزبوونەوەی پێداویستیەكانی ژیان، ئەویش بەردەوام پێویستی بەخۆنوێكردنەوەو ریفۆرم هەیە، بۆیە پێویستە پسپۆرانی بواری پەروەردەیی هەمیشە بیكەن بەیاسا هەرگیز رێگە بە هەنگاوی هەرەمەكی نەدەن لەكایەكانی پەروەردەییدا. دیارە سیستەم داینەمۆی ئەو پەروەردەیە كە خەونی هەمووانە، بەو پێیەی لەچوارچێوەی بواری پەروەردەییدا شتێك نییە گوزارشت لەپێگەی سیستەم بكات وەك سیستەم، مەگەر سیستەم خۆی، لەبەر ئەوەی كاتێك دەكەوێتە بەر ژیانی تاك وكۆمەڵگە، سەرجەم جومگەكانی ژینگەو ژیان رێكدەخاتەوە. بۆیە پەیڤ وزاراوەی سیستەم لەبواری پەروەردەییدا وەك دەستەواژەیەكی فرە رەهەند بایەخی زۆری هەیە، بەو پێیەی پەروەردە گرنگترین كڵاوڕۆژنەی ژیانی مرۆڤە كە لێیەوە تاك دەڕوانێتە دیوە جوانەكانی ژیانی مرۆڤایەتی بەدرێژی وپانیەوە، بەقوولی وبەرفرەوانیەوە، هەروەها میكانیزمێكیشە بۆ ناسین وگەیشتن بەئاسوودەیی هەمیشەیی، بەوەندەش لێ ناگەڕێت، بەڵكو هەر لەمیانەی پەروەردەیە كە پەنجەرەكان بەڕووی رەهەندە فیكری وهزریەكانی مڕۆڤ دەكرێنەوە كە لێیەوە دەڕوانێتە ئاییندە بەهیواو ئاسۆیەكی گەشەوە. هەموو ئەمانە هی ئەوەیە هەڵوەستەی لەسەر بكەین وتیشكی بخرێتەسەر، وەكوو ژانرێكی بنەڕەتی ژیان كاری لەسەر بكرێ لەنێو سەرجەم چین وتوێژەكانی كۆمەڵگەی كوردی بەتایبەتی توێژی پسپۆڕانی پەروەردەیی كە پەروەردەی نەوەی دوارۆژ لەئەستۆیاندایەو پێیدەگەینن، هەرلەو پێناوەو لەو تێگەیشتنەوەیە رووی پرسیار لەشارەزایانی پەروەردەیی ولایەن ودەزگا پەیوەندیدارەكانی پەروەردەیی لەهەرێمی كوردستان دەكەم ودەپرسم: ئایا سیستەمی پەروەردەیی لە كوردستان تەندروستەو شیاوی ئەوەیە ببێتە سەرچاوەی پەروەردەیی رۆڵەكانمان..؟!
بەڕای من ئەوەی هەیە تەنها گڕوگاڵەو زیاتر لەڕاتبی فەقێیان، یان بەیت وبالۆرەی بێ بنەمای بەناو پەروەردەییەو هیچی تر، بەكورتی وبەكوردی ئەو گڕوگاڵە ناتوانێ پەروەردە لەتاكە تاكەكانی كۆمەڵگەوە بگوازێتەوە نێو خێزان پاشانیش كۆمەڵگە. ئەوەش هۆكاری زۆری هەیە، رەنگە بەشێكی لەئەستۆی هەلومەرجی سیاسی ورژێمانی داگیركەری كوردستان ونەیارو ناحەزەكانی كورد دابێت، بەڵام بەشەكەی دیكەی وەبەر خودی تاكی كورد خۆشی دەكەوێ لەكەمتەرخەمی لەچۆنیەتی بیركردنەوەو تێڕوانینی بۆ پەروەردە. ئەو كەمتەرخەمیە وایكردووە ئێمەی كورد نەك هەر لەڕووی پەروەردەییەوە كە دایكی زانستەكانە دواكەوتوو بین، بەڵكو لەڕووی سیاسی وئابووری وكۆمەڵایەتی وسەرجەم كایەكانی دیكەشدا گرتۆتەوە. پرسیار لێرە ئەوەیە چارەسەر چییە..؟!
هەر لەو وێستگەوە دەڵێین پێویستە پسپۆران وشارەزایانی پەروەردەیی بەگیانێكی زیاتر بەرپرسیاریانەو خەمخۆرانە تاوتوێی ئەو كێشانە بكەن وبەدوای چارەسەرێكی تەندروست بگەڕێن بۆ قەیرانەكان. كە دەڵێین قەیرانەكان بەكۆ دەگوترێ، مەبەست لێی ئەوەیە كە پەروەردە بە یەك پەتا ناتلێتەوە، بەڵكو دنیایەك پەتا جەستەی پەروەردەییان بەئامانج گرتووە، ئەوە تەنها وەهم نییە، بەڵكوو راستیەكە هەموو ئەوانەی لەكەرتی پەروەردەیی كار دەكەن باش دركی پێ دەكەن، بۆیە خستنەڕووی ئەو بابەتە وەك كورتە وتارێك تەنها گەیاندنی راستی بوونی كێشەگەلێكە لەناوەندەكانی خوێندن وگەیاندنیەتی بەو كەسانەی كە قسەیەكیان هەیە لەدارشتنەوەی پرۆگرامەكانی خوێندن،كە رەنگە بیریان چووبێتەوە، یاخود بیریان چوێنرا بێتەوە كە سیستەمی خوێندن لەهەر وڵاتێك بەمیزاج وهەوس ناهێتە دارشتن یان كۆپی هەرەمەكیانەی تەواوی سیستەمێكی پەروەردەیی دا ناچەسپێ، گەر بەفلتەرێكی تەواو پەروەردەیی تێپەڕ نەبێ، وێڕای كردنەوەی دەرگای حیوارو دەمەتەقێ بە زمانێكی سادەو شیرین لەخستنەڕووی بیروبۆچوون وئەفكاری پەروەردەیی وبەدیدەگرتنی پێشنیارو تێبینی سەرجەم پسپۆڕان وشارەزایانی پەروەردەیی وكەسانی ئەكادیمی پێویستە لەم بوارەدا، بەو ئومێدەی بتوانین خزمەتێك بە بواری پەروەردەیی بكەین وببێتە رێخۆشكەرێك لەگەشەپێدانی سێكتەری پەروەردە.