ئەمڕۆ دووشەممە 2025.6.23، بە ئامادەبوونی ئومێد خۆشناو، پارێزگاری هەولێر، بە یاوەری کارزان عەبدولهادی، سەرۆکى شارەوانى هەولێر و محەمەد یوسف، بەڕێوەبەرى شارەوانى3، بە گوژمەى ( 282 ملیۆن و 750 هەزار دینار ) لە سەر داهاتی 15%ـی سەرۆکایەتی شاراوانی هەولێر، لە ڕێورەسمێکدا بەردی بناغەی پرۆژەی قیڕتاوکردنی شەقامێکی 30 مەتری و دانانی بۆڕی ئاوەڕۆ بۆ شوێنە پێویستیەکانی شەقامەکە لە گەرەکی هەولێری نوێ داندرا، پڕۆژەکە بەشێوەى بەڵێندەرایەتى جێبەجێدەکرێت و ماوەى تەواوکردنیشی ( 75 رۆژە ).
لە ڕێورەسمەکەدا، پارێزگارى هەولێر، وێڕاى پیرۆزبایی لە دانیشتوانى گەڕەکەکە، تیشکی خستەسەر گرنگی پڕۆژەکە، کە خزمەتێکى زۆر پێشکەش بە هاوڵاتییان دەکات و شەقامی 120 مەتری خێرا و گەڕەکی هەولێری نوێ بە کەرتەکانی سێبەردان دەبەستێتەوە.
هەروەها دەستخۆشى لە سەرۆکایەتى شارەوانى هەولێر و بەرێوەبەرایتىەکانى کرد بۆ ئەوکارانەى کە ئەنجامى دەدەن و هیواشی خواست ئەو پڕۆژەیە ببێتە مایەى ڕەزامەندیى هاوڵاتییان کە شایەنى خزمەتکردنى زیاترن و لە کاتی دیاریکراوی خۆشیدا زووتر تەواوبکرێت.
ئاماژەی بەوەشدا، چى لەڕێگەى بودجەی پارێزگا بێت، یان بودجەی سەرۆکایەتى شارەوانى و بەڕێوەبەرایەتى گشتیى شارەوانییەکان، ئەوەى لە توانا دابێت بەپێى ئیمکانیات و بودجەى بەردەست بەردەوام دەبین لە گەیاندنی پڕۆژە خزمەتگوزارییەکان و خزمەتکردنی هەوڵاتییانی سنووری پارێزگاکەمان.
جێگەی باسە، پڕۆژەی قیڕتاوکردنی شەقامێکی 30 مەتری لە گەڕەکی هەولێری نوێ، پێکهاتووە لە قیڕتاوکردنی ڕووبەری ( 18 هەزار و 650 ) مەتر دووجا لەگەڵ دانای بۆڕی ئاوەڕۆ بۆ شوێنە پێویستەکانی شەقامەکە، گرنگی ئەم شەقامە جگە لە سوود گەیاندن بە دانیشتووانی گەرەکەکە، شەقامی 120 مەتری خێرای و گەڕەکی هەولێری نوێ بە کەرتەکانی 10 هەزاری و 3 هەزاری سێبەردان دەبەستێتەوە، کە لە ئێستادا کارکردن تێیدا لە قۆناغەکانی کۆتایی دایە.