مێشی ئەلیكترۆنی و بومەلەرزە جیۆسیاسیە گەورەكە

مەشخەڵ كەوڵۆسی
هیچ گومان لەوەدا نیە كە بەغدا وەك دۆڕاوی جەنگ مامەڵە لەگەڵ كورد دا دەكات، لەلێكەوتەی ئەو نەهجە ئیمپریالیستییەدا، هەموو جۆرە تیۆرەكانی شەڕی دەروونی لەدژی كورد جێبەجێكردووە. بڕینی مووچە و بودجە، سیاسەتێكی ئیمپریالیستی ئاشكرا و ئەپارتایدێكی بێ چەندو چوونە، كەچی لەگەڵ پێڕەوكردنی ئەو سیاسەتە نەگریسەشدا، بەردەوامە لەسەر ئەوەی شەڕەكە بخاتە ناوماڵی كوردەوەو، ماوەی سیانزدە ساڵە لەڕێگەی كۆمەڵێك “مێشی ئەلیكترۆنی”یەوە، هەمیشە سیاسەتی عێراق ئامادەبووە لەكوردستان و، لەهەر جوڵەیەكی حكومەتی هەرێمدا، مێشی ئەلیكترۆنی پارازیتیان دروستكردووەو، ماوەیەكی زۆر خەڵكیان هانداوەو، ژینگەی سیاسی و تەنانەت ئاسایشی كۆمەڵایەتیشیان لێڵكردووە.
ئێمە چیرۆكێكی بەئازارمان لەگەڵ مێشی ئەلیكترۆنی هەیە، چونكە ئەوان نەك هەر تەشویش دروستدەكەن، بەڵكو زۆرجار خۆیان ڕێنمایی داگیركەر دەكەن و خاڵی لاوازی كەسایەتی تاكی كورد و كۆمەڵگەی كوردستانیان بۆ ڕوون دەكەنەوە، تاكو داگیركەر لەوێوە گورزی بەئازار لەكوردستان بوەشێنێت.
زۆرینەی جار لەدژی تیۆری موئامەرە، قسەی جیدیم كردووە، بەڵام لەبابەتی مێشی ئەلیكترۆنی كوردستاندا، بڕوای پشتئەستور بە بەڵگەم هەیە كە ئەوان ڕێنمایی لەداگیركەر وەردەگرن و،
ببڕن. كەچی سەیر دەكەین لەبەرانبەر بچوكترین ناكۆكی ماتماتیكی و حسابی و تەكنیكی خۆیشیان زۆر جار ڕێنمایی داگیركەر دەكەن بۆ ئازار گەیاندن بەكوردستان.
تەنانەت لەترۆپكی چەوساندنەوەی كورد و بڕینی مووچەی خەڵكی كوردستاندا، داگیركەری عێراقی مووچەی خەڵكی موسڵی دەنارد، لەكاتێكدا موسڵ لەژێردەستی داعشدا بوو، بەڵام چونكە فەرمانبەرەكان عەرەب بوون، داگیركەر ڕێگەی بەخۆی نەدەدا لەبەر نەگونجانیان لەگەڵ داعشدا، مووچەی فەرمانبەری عەرەبی موسڵ لەگەڵ حكومەتی هەرێم، ڕاستەوخۆ داگیركەر مووچەی فەرمانبەرانی كوردستان دەبڕێت، چونكە كوردن!.
مێشی ئەلیكترۆنی ئەم ڕاستییە دەبینێت، كەچی بۆ تەنها یەكجاری دانی پێدانانێت و، بەردەوامە لەسەر گیزەگیز. هەر هەنگاوێكی حكومەتی هەرێم دەینێت، وەك ئەوەی بەغدا فریشتەبێت و هیچ ستەمێكی نەكردبێت، هەڵمەتێكی هاندانی خەڵك دەستپێدەكەن!.
سەبارەت بەو ڕێككەوتنانەش كە حكومەتی هەرێم لەواشنتۆن واژۆی كردن، بۆ پەرەپێدانی غازی سروشتی و هاوبەشایەتی لەگەڵ كۆمپانیا ئەمریكاییەكان، دیسانەوە مێشەكان كەوتنەوە گیزەكردن و، ئیدی وەك پیشەی هەمیشەییان، خەتی ڕاست و چەپیان بەسەر بابەتەكەدا هێنا.
بۆیە دەبێت لەئێستاوە سەنگەرەكان وەك ئەوەی هەیە بناسرێن، بەغدا و مێشەكان بەو ئیمكاناتە زۆرەی كە هەیان و خراوەتە بەردەستیان بۆ بێهیواكردنی كورد لەهەر هەنگاوێك، نەتەوەی كورد و حكومەتی كوردیش بەهەموو كەموكووڕییەكانەوە، لەلایەكی ترەوە بۆ خۆ ڕزگاركردن لەسیاسەتی ئیمپریالیستی عێراق لەلایەكی تری هاوكێشەكە سەنگەرمان لێداوە.
غازی سروشتی كوردستان لەچركەساتی گونجاودا هێنراوەتە سەر مێز، بێگومان لەو كاتەدا كە عێراق وەكو دۆڕاوی جەنگ مامەڵە لەگەڵ كورد دەكات و پێی وایە ئیدی كورد پەلوپۆی شكاوەو هیچ كارتێكی نیە مانۆڕی پێوە بكات! ئالەم كاتەدا گازی سروشتی كوردستان لە واشنتۆنەوە دەكرێتە بومەلەرزەیەكی جیۆسیاسی گەورە! بەغدا شۆك دەكات و، ئەمریكا كەسب دەكات و، مێشی ئەلیكترۆنی كوردستانیش پەست دەكات و، لەهەمووی گرنگتر ئەوەیە سەنگەری نەتەوەییەكانی كوردی گەرم كردەوەو، ورەیەكی تری بۆ گەڕێكی تری ڕووبەڕووبوونەوەی داگیركەر پێشكەشی سەنگەری نەتەوەیی كورد كرد.