داگیركەر چۆن داشەكانی بۆ شەڕی دەرونی دەجوڵێنیت؟

مەشخەڵ كەوڵۆسی
هەمووان ئەزانین ئەمڕۆ كوردستان بە قۆناغێكی زۆر قورسی داراییدا تێدەپەڕێت و، ئەم بابەتە هەموو سنورە مرۆیی و سیاسییەكانی بەزاندووە. تەنانەت لەو گەمارۆیەش درێژخایەنترە كە هۆزی قورەیش خستیانە سەر پێغەمبەری ئەكرەم و هاوڕێكانی لە شیوی ئەبوتاڵیب، چونكە گەمارۆكەی قورەیش 3 ساڵ بەردەوامبوو. ئەو گرانی و نەهامەتییەی كە لەقورئاندا باسیكراوەو، یوسف پێغەمبەر خەڵكی میسری تێدا ڕزگاركرد تەنها 7 ساڵ بەردەوام بووە. گەمارۆی لینینگراد و، پێشتریش بەدەیان قەڕن، گەمارۆدانی نەینەوا لەلایەن سوپای ڕۆستەمی زاڵەوە، سێ ساڵ درێژەی كێشاوە.
ئەو گەمارۆ سەرتاسەرییە ئابوورییەی كە نەتەوەیەكگرتووەكان لەدوای داگیركردنی كوەیت سەپاندیان بەسەر عێراقدا، شەش ساڵ درێژەی كێشا. بەڵام ئەو گەمارۆیەی كە لە 2014ەوە تاكو ئێستا عێراق سەپاندوویەتی بەسەر كوردستاندا، دەساڵی تەواو كردووە. تەنها گەمارۆی تاك لایەنە ئەمریكا بەسەر كوبا و ئێراندا، تەمەنیان لەم گەمارۆیە درێژترە كە عێراق بەسەر كوردستاندا سەپاندوویەتی.
بەجۆرێك دەتوانم بڵێم: تەنانەت لەو گەمارۆیانەشدا كە پاڵپشت بە بڕیاری نەتەوەیەكگرتوەكان دەسەپێنرێت، نەرمییەكی هەر تێدا دەهێڵرێتەوەو، ماوەی جێبەجێكردنی كراوە نیە. كەچی لەو گەمارۆ و سزایەی عێراق سەپاندوویەتی بەسەر كوردستاندا، ماوەكەی كراوەیەو دەساڵی پڕكردۆتەوە، بێ ئەوەی لایەنی عێراقی بچوكترین حساب بۆ دەرهاویشتە مرۆییەكانی ئەو گەمارۆیە بكات.
سەرباری ئەو بابەتە زۆر هەستیار و كاریگەرە، دەبینین داگیركەری عێراقی لەژێر بنمیچی ئەو گوشار و گەمارۆ ئابووری و داراییەدا، شەڕێكی گەورەی هەواڵگری و دەروونی بەڕێوە دەبات بەچەند قۆناغێك كە هەریەك لەقۆناغەكان، ئەپدەیتی بەردەوام دەكرێنەوە، ئامراز و ئامادەكاری وردیان بۆ دەكرێت و، لەهەر قۆناغێكدا داگیركەر تایپێك داشی خۆی بەكاردێنێت، تاكو لەلایەكەوە خەڵكی كوردستان بڕوا بكەن بەوەی هەرێمی كوردستان لایەنی كەمتەرخەمە و شایستەی سزایە، بەئامانجی ئەوەی متمانەی خەڵك بەقەوارەی هەرێمی كوردستان نەمێنێت و ڕۆحی بەرگری لەم قەوارەی بەتەواوی سفر بكرێتەوە.
خاڵێكی تر كە ئامانجی ڕوونی ئەم شەڕە دەرونییەیە، ئەوەیە ناكۆكی بكەوێتە ناو كۆمەڵگەی كوردی و، لایەنەكان، تەوژمە كۆمەڵایەتییەكان پێكدا بدەن. هەر لەسەر ئەو بنەمایەی كە دەڵێت: تەشتی پڕ ئاشتی ماڵە. دیارە كاتێ داگیركەر تەشتی ماڵەكانمان خاڵی دەكاتەوە، زەمینەسازی دەكات بۆ پشێوی كۆمەڵایەتی، لێرەدا دێت داشەكانی دیكەی، كەپێشتر ئامادەسازیكردووە بۆ دروستكردنیان، هاندەدات بزیسكەیەك بهاوێژنە ناو كۆمەڵگە، بەسود وەرگرتن لەوە دۆخە شڵەژاو و بێزارەی لەكۆمەڵگەدا دروستبووە.
لێرەدا نمونەی ئەو كاكەیە بەپێویست دەزانم كە چەند ڕۆێك لەمەوبەر، بەسودوەرگرتن لەو بێزارییەی دروستبووە، ڕەحمەتی نارد بۆ گۆڕەكەی سەدامی دیكتاتۆر. یان دەرهێنەرێك دەڵێت: سەردەمی ڕژێمی بەعس بەو شێوەیەش خراپ نەبووە كە باسدەكرێت!.
ئەم لێدوانانە، هەروا سادە نین و، لەسیاقی ئەو شەڕە دەرونییەدا دێنە پێشەوە كە داگیركەر بۆ تێكدانی میزاجی گشتی كۆمەڵگەی كوردی و دروستكردنی پێشوی كۆمەڵایەتی بەرپای كردووە. دیارە هەم ژینگەی گشتی شەڕەكە و، هەم داشەكانیشی، داگیركەر خۆی ئامادەی كردوون و، بەسود وەرگرتن لەو گەمارۆ ئابووری و داراییە نامرۆڤانەیە كاردەكەن كە خودی داگیركەر لەكوردستان دروستی كردووە.
لەكاتێكدا بێزاری خەڵك لە دۆخی دارایی دەگاتە ترۆپك، یەكێك لەداشەكانی داگیركەر كە ئەركی جێبەجێكردنی ئەو شەڕە دەرونییەیان پێ سپێردراوە، دێت و لێدوانێك دەدات، كارتێك دەخاتە كایەكە، بۆ ئەوەی تێستی توانای مقاوەمەی كورد بكرێت. داگیركەر تێست دەكات، ئەگەر دەركەوت كۆمەڵگەی كوردی هێشتا بەهای ماوە، ئەوا میتۆدی شەڕەكە دەگۆڕێت.
لێدوانی داشەكانی داگیركەر، باڵۆنی تاقیكردنەوەیە، بۆ تێستكردنی ئەوەی ئایا كورد، لەپەنای ئەم هەموو گوشارەی لەسەریەتی، هێشتا بەهاو توانای بەرگەگرتن و مقاوەمەتی ماوە! یان گوشاری دارایی وایلێكردووە گوێ بەبەهاكانی نەدات؟.