كارزان گلی – ههولێر
كۆمیسیۆنی (پاڵپشتی میللی و برایەتی و ئاشتی)، كە لەناو پەرلەمانی توركیا تایبەت بۆ پرسی چارەسەری كورد و چۆنیەتیی چەكدانانی پەكەكە دانرابوو كۆتاییی پێ دێت و دەدرێتە سەرۆكی پەرلەمانی توركیا.
كۆمیسیۆنی (پاڵپشتی میللی و برایەتی و ئاشتی)، لە ٥١ ئەندام پێك هاتووە و ئەندامی هەموو ئەو پارتانەی تێدایە كە وەكوو پارت چوونەتە پەرلەمانەوە، جگە لە پارتی خاس، كە رەتی كردووە ئەندامی لەو كۆمیسیۆنەدا هەبێت. كۆمیسیۆن نزیكەی ٢٠ كۆبوونەوەی کرد و پاشان هەر پارتێكی سیاسی پێشنیار و راپۆرتی تایبەت بە خۆی لەبارەی پرسی چارەسەری نووسی و رادەستی كۆمیسیۆنی كرد، بەڵام لەم هەفتەیەدا، هەموو راپۆرتەكان یەك دەخرێت و لەچوارچێوەی یەك راپۆرتدا رادەستی سەرۆكی پەرلەمانی توركیا دەكرێت.
ئاكەپە و مەهەپە، بە جیا راپۆرتیان پێشكەش كردووە، هەر پارتە و پێشنیاری تایبەت بەخۆی هەیە لەبارەی پرسی كورد و چۆنیەتیی چەكدانانی پەكەكە.
مەهەپە داوای كردووە، چەكدارانی پەكەكە لێبوردنی گشتییان بۆ دەربچێت، بەڵام ئەوانەی تاوانیان كردووە لێبوردن نەیانگرێتەوە، بەڵام ئاكەپە لەگەڵ ئەوەدایە ئەوانەی تاوانیشیان كردووە، لێبوردن بیانگرێتەوە و سزایەكی سووك بدرێن.
ئەوەی جێگەی باسە و قسەی زۆری لەسەر دەكرێت، مەهەپە داوای دەكات عەبدوڵا ئۆجەلان، سەرۆكی زیندانیكراوی پەكەكە ئازاد بكرێت و مافی ئومێد بیگرێتەوە، بەڵام ئاكەپە تاوەكوو ئێستا بڕیاری كۆتاییی لەو بارەوە نەداوە.
بەگوێرەی زانیارییەكانی میدیاكانی توركیا، ئاكەپە نەرمە بەرامبەر بەو داوایەی مەهەپە و رەجەب تەیب ئەردۆغان، سەرۆكۆماری توركیاش لە كۆنگرەیەكی رۆژنامەوانیدا ئاماژەی دا، گفتوگۆ دەكەن و ئەوەی باش بێت بۆ (توركیای بێتیرۆر) ئەنجامی دەدەن.
دەم پارتی، هەر لە سەرەتاوە باسی لەوە كردووە، پێویستە ئۆجەلان ئازاد بكرێت، چونكە ناكرێت باڵێكی سەرەكی پرسی چارەسەری كورد لە زیندان بێت، دەبێت ئەو لە دەرەوە بێت تا هەنگاوەكانی پرسی چارەسەری خێرایی بەخۆیەوە ببینێت. هەروەها داوایان كردووە سەلاحەدین دەمیرتاش، هاوسەرۆكی پێشووی هەدەپەش ئازاد بكرێت.
هەر لە راپۆرتی پارتە سیاسییەكاندا هاتووە، لێبوردنی گشتی بۆ زیندانیان سیاسی دەربچێت، بەڵام بەو مەرجەی پەكەكە بە تەواوی چەك دابنێت و ئیدی لە توركیا شتێك نەمێنێت بە ناوی پەكەكە، بەڵام تاوەكوو ئێستا لەبارەی چۆنیەتیی لێبوردنی گشتی بۆ زیندانیانی سیاسی روونكردنەوە نەدراوە.
ئەوەی قسە و باسی زۆر لەسەر دەكرێت، لە راپۆرتی پرسی چارەسەریدا، ئاكەپە و مەهەپە بەهەموو شێوەیەك رەتی دەكەنەوە شوێن بۆ خوێندن بەزمانی كوردی بكەنەوە، هەروەها مادەی ٦٦ی دەستووریش ناگۆڕن، كە تایبەت كراوە بەوەی هەر هاووڵاتییەك لە توركیا بژیت توركە، ئەمەش ناكۆكییەكی گەورەیە لە نێوان دەم پارتی و ئاكەپە و مەهەپەدا.
لەو چەند رۆژەدا، روون دەبێتەوە راپۆرتی پرسی چارەسەری كە كۆمیسیۆنی (پاڵپشتی میللی و برایەتی و ئاشتی) دەینووسێت، چی تێدایە و بۆ رای گشتی رادەگەیەنن.