كارزان گلی – هه‌ولێر
پەیامی عەبدوڵا ئۆجەلان، سەرۆكی زیندانیكراوی پەكەكە، رێکەوتی ٢٧/٢/٢٠٢٥ داوای لە پەكەكە كرد چەك دابنێت و خۆی هەڵوەشێنێتەوە، میدیاكانی توركیا و جیهانی بەخۆیەوە سەرقاڵ كرد، جیدیترین پرسیاریش ورووژا، ئایا قەندیل بەگوێی سەرۆكەكەی دەكات و چەك دادەنێت؟ وا نزیك دەبینەوە لە سێ مانگ بەسەر پەیامەكەی ئۆجەلان، كەچی پەكەكە هەر كۆنگرەی نەبەستووە، ئایە ئەگەر پەكەكە چەك دانەنێت چی روو دەدات و توركیا وەڵامی چی دەبێت؟
جەمیل بایك و موراد قەرەیلان، كە دوو سەركردەی باڵای پەكەكەن، دەڵێن پێویست دەكات لەڕووی فیزیكییەوە ئۆجەلان بۆ خۆی ئامادەی كۆنگرە بێت، چونكە ناكرێت بەبێ بوونی ئەو كۆنگرەی خۆهەڵوەشاندنەوە ببەستین. هەروەها داوا دەكەن توركیا زەمینەسازی لەناو پەرلەمان بكات بۆ ئەو پرسە، واتە بەدەكردنی یاسا، پرسی كورد یەكلایی بكرێتەوە و چارەنووسی سەركردە و گەریلاكانی پەكەكە یەكلایی بكرێتەوە.
بەڵام دروشمی حكوومەتی توركیا، بەتایبەت دەوڵەت باخچەلی، سەرۆكی مەهەپە و رەجەب تەییب ئەردۆغان، سەركۆماری توركیا، (توركیایەكی بێتیرۆرە)، واتە دەبێت پەكەكە بەبێ مەرج چەك دابنێت، ئەوەی هەیە، تەنیا بەڵێنێكە داویانە كە ئۆجەلان، (مافی ئومێد) بیگرێتەوە و ئازاد بكرێت.
مافی ئومێد، دادگای مافی مرۆڤی ئەورووپا دایهێناوە، بۆ هەموو ئەو كەسانەی، كە تاوانی تیرۆریشیان كردبێت، ئەگەر زیاتر لە ٢٥ ساڵ زیندانی كرابێتن، بۆیان هەبێت ئازاد بكرێن، توركیاش ئەندامی ئەو دادگایەیە، دەكرێت ئەو مادەیە جێبەجێ بكات. باخچەلیش، بەئاشكرا لەناو پەرلەمانی توركیا گوتی، ئاساییە ئۆجەلان لەرێگەی مافی ئومێدەوە ئازاد بكرێت.
با بگەرێینەوە بۆ سەر پرسیارەكەمان، ئەگەر پەكەكە چەك دانەنێت چی روو دەدات؟ بەر لە هەر شتێك شەڕێكی سەخت لە نێوان پەكەكە و دەوڵەتی توركیا بەرپا دەبێت، چونكە ئەردۆغان بەئاشكرا هەڕەشەی كرد، كە ئەگەر پەكەكە چەك دانەنێت، باجەكی قورس دەبێت بۆیان، كەواتە شەڕێكی سەخت دەستپێدەكات، ئەمەش لەبەرژەوەندی توركیا و پەكەكە نییە.
ئەوەی گرنگە و هەڵوەستەی لەسەر دەكرێت، بابەتی رۆژئاوای كوردستانە، ئەگەر پەكەكە چەك دانەنێت، توركیا بەرامبەر بە رۆژئاوا توندتر دەبێت، هەوڵەكانی چڕ دەكاتەوە تا ئەو كیانەی لەوێ دروست بووە لەناوی ببات، جا بۆ خۆی راستەوخۆ ئۆپەڕاسیۆن ئەنجام دەدات یان لەرێگەی حكوومەتی راگوزەری سووریا، پێشبینیكردنی ئەمە قورسە.
چەند سیاسییەك و لێكۆڵەرێكی توركیا پێیانوایە، چەك دانانی پەكەكە، پرسی كورد لە توركیا ناباتە پێشەوە، تەنیا سوودەكەی بۆ رۆژئاوای كوردستانە، واتە توركیا رازی بووە بەوەی لە سووریا كورد ببێتە خاوەن كیانی خۆی، بەو مەرجەی سەرئێشەی پەكەكە لەناو خاكی خۆیان نەهێڵن.
بەڵام ئەوەی بووەتە مایەی مەترسی بۆ دەم پارتی و ئەوانەی خەون بە ئاشتییەكی بەردەوام بۆ توركیا و باكووری كوردستان دەبینن، چوونی پەكەكەیە بۆ باوەشی ئێران، واتە ئێران كاریگەریی زۆری لەسەر پەكەكە هەیە، بۆیە رێگری دەكات لەوەی پەكەكە چەك دابنێت و خۆی هەڵوەشێنێتەوە، چونكە بڕیار بوو لە كۆتایی مانگی نیسان پەكەكە كۆنگرە ببەستێت و خۆی هەڵوەشێنێتەوە، بەڵام لەرێگەی میدیاكانی خۆیانەوە گوتیان، چەك دانان بەبێ ئامادەبوونی ئۆجەلان مەحاڵە.
دەم پارتی لە هەوڵی ئەوەدایە، لەناو پەرلەمانی توركیا هەنگاوی یاسایی بهاوێژرێت بۆ پرۆسەی كۆنگرەی پەكەكە، بۆ نموونە دەستووری توركیا هەموار بكرێتەوە و زمانی كوردی بەفەرمی بناسرێت و هەروەها كوردیش وەكوو نەتەوە بناسێنن لەپاڵ نەتەوەی تورك، جیا لەوەش داوای كردووە، لێبوردنی گشتی بۆ ١٥٠٠ زیندانی دەربچێت، بەتایبەت ئەوانەی لە گرتوخانە باری تەندروسیان زۆر خراپە، بەڵام تاوەكوو ئێستا توركیا نەهاتووەتە ژێر باری ئەو داواكارییەی دەم پارتی.
ئەگەر لەماوەی یەك مانگی تر، پەكەكە كۆنگرە نەبەستێت، پرۆسەی ئاشتی لە توركیا كۆتایی پێ دێت و شەڕ دەستپێدەكاتەوە، چاوی دنیایش لەسەر رۆژئاوای كوردستان دەبێت، چونكە دەستپێكردنەوەی شەڕی پەكەكە و دەوڵەتی توركیا ٤٠ ساڵە بوونی هەیە و تازە نییە، ئەوەی گرنگە ئایا ستراتیژ و بەرنامەی توركیا بۆ رۆژئاوای كوردستان چییە؟
دەبێت ئەوەش باس بكەین، پەكەكە چەك دانەنێت و بە گوێی رابەرەكەیان نەكەن، ئیدی ئۆجەلان كۆتایی بە ژیانی سیاسی دێت و رەنگە بەهیچ شێوەیەك ئیدی نەبێتە لایەنێك لە پرسی چارەسەری و بۆ شكۆی ئۆجەلانیش خراپە، كە پەیام و هەوڵەكانی لەلایەن قەندیلەوە حیسابی بۆ نەكرێت، واتە كۆتاییهاتنی پرسی چارەسەری، كۆتاییهاتنی ژیانی سیاسیی ئۆجەلانیشە.