كارزان گلی – هه‌ولێر
دەنگۆیەك لەناو میدیای توركیا بڵاو بووەتەوە، دەوڵەت باخچەلی، سەرۆكی مەهەپە مردووە، بەڵام نایانەوێت لەم كاتەدا هەواڵی مردنەكەی بڵاو بكەنەوە. راستە مەهەپە ئەو دەنگۆیانەی رەتكردوەتەوە، بەڵام لەو رۆژەی جەڵەتە لێی دا و كەوتە نەخۆشخانە، باخچەلی ونە و، بە هیچ شێوەیەك لە میدیاكاندا دەرنەكەوتووە، لە كاتێكدا مەهەپە لە راگەیەندراوێكدا باسی لە باشی تەندروستیی كرد و گوتیان قەستەرەیەكی ئاسایی بۆ كراوە.
مردنی باخچەلی، گرنگییەكەی لەوەدا نییە كە سەرۆكی مەهەپەیە، یان بەرپرسێكی باڵای توركیایە كۆچی دوایی كردووە، نەخێر مردنی ئەو هاوكێشەی سیاسی توركیا لە رەگەوە دەگۆڕێت.
ئەگەربێتو راست بێت باخچەلی مردبێت و جارێ نەیانەوێت هەواڵی مردنەكەی بڵاو بكەنەوە، یەك هۆكاری هەیە، ئەویش ئەوەیە كێ بخەنە شوێنگرەوەی ئەو؟ دەبێت كەسێك بێت رێز لە هاوپەیمانیی كۆماری بگرێت، كەسێك بێت ئەوەندەی باخچەلی، پابەند بێت بەو هاوپەیمانییە و هەروەها گرنگیدان بە رەجەب تەییب ئەردۆغان، سەركۆماری توركیا.
باخچەلی، لە زۆربەی وتارەكانیدا ئەردۆغانی وەكو سەرۆكێكی گەورە و بەهێز وێنا كردووە، هەر ئەو بوو رێگەی بۆ خۆش كرد تا سیستەمی سیاسی لە توركیا بكەنە سەرۆكایەتی و هەر هاوپەیمانی مەهەپەیە لەناو پەرلەمانی توركیا، ئاكەپەی كردووەتەوە زۆرینە و ئەردۆغان دەسەڵاتەكانی بووە بە رەها، بەڵام لە بەرامبەر ئەوەدا، كەسانێك لەناو مەهەپە، پشتگیری لەو هاوپەیمانییە ناكەن، ئەوان پێیان وایە بە نزیكبوونەوەیان لە ئاكەپە، دەنگەكانیان لە كەمی داوە، بۆیە ترسی ئەردۆغان و ئاكەپە لەوەیە، ئەگەر كەسێك لەناو مەهەپە بێتە شوێنی باخچەلی، لە هاوپەیمانیی كۆماری بكشێتەوە.
رەنگە بپرسن، ئەگەربێتو مەهەپە لە هاوپەیمانیی كۆماری بكشێتەوە چی روو دەدات و بۆچی ئەردۆغان و ئاكەپە ئەوەندە گرنگی بە مەهەپە دەدەن؟ وەڵامەكەی روونە، بەگوێرەی دەستووری توركیا، سەركۆمار ئەوكات دەسەڵاتەكانی دەبن بە رەها، یاخود دەسەڵاتەكانی زۆر دەبن، كاتێك پارتەكەی لەناو پەرلەمانی توركیا زۆرینە بێت، چونكە هەموو بڕیارنامەیەك دەنگی زۆرینەی پەرلەمانی دەوێت.
ئاكەپە زۆرینەی پەرلەمانی لەدەست داوە، هاوپەیمانیی مەهەپەیە وای كردووە لەناو پەرلەمان ببنە زۆرینە و هەموو بڕیارنامەیەكی لەلایەن سەركۆمارەوە دەربچێت تێپەڕێنرێت.ئەگەر مەهەپە لەو هاوپەیمانییە بكشێتەوە، بەئەگەرێكی زۆرەوە توركیا دەچێتە ناو هەڵبژاردنی پێشوەختە و پەرلەمان هەڵدەوەشێتەوە، چونكە ئەردۆغان ئامادە نییە سەركۆمار بێت، بەڵام دەسەڵاتی نەبێت و بڕیارنامەی پێدەرنەچێت، هەر ئەمەشە وای كردووە بڵێین مردنی باخچەلی، پەیوەندییەكی زۆری بە گۆڕینی هاوكێشەی سیاسی توركیاوە هەیە.
ئیسماعیل سایماز، رۆژنامەنووسی بەناوبانگ لە توركیا، پەیوەندیی بە بەرپرسێكی باڵای مەهەپەوە كردووە، لێی پرسیوە راستە باخچەلی مردووە؟ لە وەڵامدا گوتویەتی نەخێر نەمردووە و لە ماوەیە نزیكدا دەگەڕێتەوە ناو كایەی سیاسی. بەڵام چەند سەرچاوەیەكی تر، باس لە مردنی دەكەن و دەڵێن ئەگەر نەشمردبێت كۆتایی بە ژیانی سیاسی هاتووە و تەندروستیی ناگەڕێتەوە جاری جاران. دەبێت ئەوەش بەبیر خوێنەر بهێنینەوە، لە ساڵانی نەوەدەكاندا، تورگوت ئۆزەل، پرسی كوردی هێنایە بەرباس و باسی لەوە دەكرد توركیا ببێتە سیستەمی ولایەت و باكووری كوردستان ببێتە ولایەتێكی سەربەخۆ و خۆیان خۆیان بەڕێوە ببەن، بەڵام سەر بە توركیا بن، وەكوو سیستەمی ولایەتی ئەمریكا، بەڵام بەشێوەیەكی گوماناوی كۆچی دوایی كرد و پاشان دەركەوت ژەهرخوارد كراوە. باخچەلیش، ئەگەرچی دوژمنی كوردە و بەردەوام هێرشی توندی كردووەتە سەر كورد، بەڵام لە ماوەی چوار مانگی رابردوودا ئەوبوو پرسی كوردی هێنایەوە بەرباس و داوای كرد، عەبدوڵا ئۆجەلان، سەرۆكی زیندانیكراوی پەكەكە بهێنرێتە پەرلەمان و وتارێك پێشكەش بكات و داوای هەڵوەشانەوەی پەكەكە بكات، پاشان ئۆجەلان ئازاد بكرێت، دوای ئەو هەوڵانە لەناكاو تەندروستیی تێكچوو و ئێستاش باس لە مردنی دەكرێت.