له ته‌قینه‌وه‌ی كانێكی خه‌ڵوز له ئێران، ده‌یان كرێكار گیانیان له‌ده‌ستدا. ئاژانسی هه‌واڵی ئیرنای ئێران، له‌سه‌ر زاری محەممەد عەلی ئاخوندی، بەڕێوەبەری گشتیی قەیرانەکانی خۆراسانی باشوور ڕاگەیاندووە، دره‌نگانی شەوی ڕابردوو تەقینەوە لە 2 بلۆکی کانێکی خەڵووزی سنووری شاری تەبەس ڕوویداوه و به‌هۆیه‌وه 30 كرێكار گیانیان له‌ده‌ستداوه و 17 كرێكاری دیكه‌ش برینداربوون.
سه‌رچاوه‌كه ئاماژه‌ی به‌وه‌شكردووه له‌و دوو بلۆكه‌ی كانی خه‌ڵوزه‌دا شه‌ست و نۆ كرێكار كاریان تیادا كردووه. بە گوتەی ئاخوندی، 40 ئەندامی شارەزای تیمەکانی فریاگوزاری لە هه‌وڵه‌كان به‌رده‌وامن، بۆ ڕزگارکردنی ئه‌و كرێكارانه‌ی كه گیریان خواردووه له‌ناو كانه‌كه‌دا، بەڵام بەهۆی بڵاوبونه‌وه‌ی گازی میسان و ژه‌هراویبونی ناوچه‌كه، ئاسته‌نگی بۆ پرۆسەی ڕزگارکردنەکە دروست كردووه.
کانی خەڵووزی تەبەس دەکەوێتە باکووری ڕۆژئاوای شاری بیرجەندی ناوەندی پارێزگای خۆراسانی باشوور لە ئێران، ڕووبەری کانەکە 30 هەزار کیلۆمەتر چوارگۆشەیە و زیاتر له 75 ملیار تۆن خەڵووزی تێدایە و بە گەورەترین كانی خه‌ڵوزی یەدەگی ئێران داده‌نرێت.