رەنگە قەدەغەی سیاسەت لەسەر ئیمامئۆغڵو جێبەجێ بكرێت
كارزان گلی – هه‌ولێر
دۆسیەی ئەكرەم ئیمامئۆغڵو، سەرۆكی شارەوانیی ئیستانبۆڵ، تاوەكوو ئێستا لە دادگادا لێكۆڵینەوەی لێدەكرێت، بڕیارە لە سەرەتای مانگی ئەیلوولی ئەمساڵدا، بڕیاری كۆتایی لەبارەوە بدرێت، شڕۆڤەكارێكی سیاسیش پێیوایە، ئەگەر هەیە قەدەغەی سیاسەت لەسەر ئیمامئۆغڵو جێبەجێ بكرێت.
لە هەڵبژاردنی شارەوانیی ٢٠١٩، ئیمامئۆغڵو بە جیاوازی هەشت هەزار دەنگ، بەپێش بیناڵی یڵدرم، بەربژێری ئاكەپە كەوت، بەڵام ئاكەپە داوای یاسایی تۆمار كرد و هەڵبژاردن هەڵوەشایەوە و كەوتە گەڕی دووەم. ئیمامئۆغڵو، ئەوكات كۆنگرەیەكی رۆژنامەوانیدا ئەنجامدا و وشەی (ئەحمەق)ی بەرامبەر بە كۆمیسیۆنی باڵای هەڵبژاردنەكانی توركیا بەكارهێنا، ئێستا ئەو وشەیەی بەكاریهێناوە بووەتە بەڵا بۆی و دادگا هەر دەیهێنێت و دەیبات، چوونكە كۆمیسیۆن داوای یاسایی لەسەر تۆمار كردووە.
بەگوێرەی زانیارییەكان، یەكێك لەو هۆكارانەی وای كرد لە هەڵبژاردنی سەرۆكایەتیی ٢٠٢٣دا، جەهەپە ئیمامئۆغڵو نەكاتە بەربژێر، ئەو دۆسیەیە بووە، چونكە ترسیان هەبووە لە كاتی پروپاگندەدا دادگا بڕیاری لەدژی بدابوایە و قەدەغەی سیاسەتی لەسەر جێبەجێ بكردایە، ئەوكات نەیدەتوانی بچێتە كێبڕكێوە لەگەڵ رەجەب تەییب ئەردۆغان.
سایگی ئۆزتورك، نووسەر و شڕۆڤەكاری سیاسی، لە نووسینێكدا كە بۆ رۆژنامەی (سۆزجو)ی توركی نووسیوە، پێیوایە تا ئەو دۆسیەیە یەكلایی نەبێتەوە، ئیمامئۆغڵو ئارام نابێت و هەر لە دڵەڕاوكێدا دەبێت.
ئەو دەنووسێت: ”دەمەوێت ئەوەتان بەبیر بهێنمەوە، كە رەنگە دادگا بڕیاری قەدەغەی سیاسەت لەسەر ئیمامئۆغڵو جێبەجێ بكات، بۆیە دەبێت ئەو ئەگەرەیان لەبەر چاوبێت و هەر لەئێستاوە ئیمامئۆغڵو، خۆی ئامادە بكات تا بڕیارەكە تەمیز بكاتەوە“
بەگوێرەی بۆچوونی چەند سیاسییەكی تر، ئیمامئۆغڵو، ركابەرێكی سەرسەختی ئەردۆغان دەبێت لە هەڵبژاردنی داهاتووی سەرۆكایەتیی توركیا، بۆیە رەنگە لەسەر ئەو دۆسیەیە سزای بدەن و بۆ ماوەی ٢ ساڵ قەدەغەی سیاسەتی لەسەر جێبەجێ بكەن، بەڵام ئەگەر ئەو قەدەغەیە بكەوێتە ٢٠٢٧، ئەوكات ناتوانێت بەربژێری سەرۆكایەتیی بێت، چوونكە بەگوێرەی دەستووری توركیا، هەر سیاسییەك بۆ ماوەی ساڵێك زیاتر دەستگیر كرا، یان قەدەغەی سیاسەتی لەسەر جێبەجێ كرا، بۆی نییە بەشداری هیچ كایەیەكی سیاسی بكات.
رەنگە تەنیا بەو رێگەیە، ئەردۆغان و ئاكەپە، مەترسی ئیمامئۆغڵو لەسەر خۆیان لاببەن.
ئیمامئۆغڵو، راستە سەرۆكی شارەوانیی ئیستانبۆڵە، بەڵام رۆڵێكی گەورەی لەناو پارتەكەیدا هەیە و هەر ئەوبوو وای كرد، كەمال كلیچدارئۆغڵو، لە پۆستی سەرۆكی جەهەپە لا ببات و ئۆزگور ئۆزەل بهێنێتە شوێنی، بۆیە هەموو هەوڵێكی بۆ ئەوەیە، ئەو دۆسیەیە لەبەرژەوەندی ئەو كۆتایی پێبێت و ئیدی خۆی بۆ هەڵبژاردنی سەرۆكایەتیی ٢٠٢٨ ئامادە بكات، ئەمە ئەگەر توركیا نەچێتە ناو هەڵبژاردنی پێشوەختەوە و ئەگەر چووە ناو هەڵبژاردنی پێشوەختەش، ئەگەر زۆرە لە مانگی ١١ی ٢٠٢٥ ئەنجام بدرێت.