کاربەدەستانی خزمەتگوزاری فریاکەوتن ئەمڕۆ یەکشەممە رایانگەیاند رووسیا زیاتر لە دوو هەزار کەسی لە ناوچەکانی لافاو لە رۆژهەڵاتی وڵاتەکە گواستەوە، ئەمەش دوای ئەوەی زریانی “خانون” رووی لەناوچەکە کرد.
وەزارەتی باری لەناکاو لە تەلەگرام رایگەیاند، “زیاتر لە دوو هەزار کەس، کە 405 یان منداڵ بوون، گواستووەتەوە ناوچەی پریمۆریە”.
ئاماژەی بەوەشکرد، لافاوەکە نزیکەی پێنج هەزار باڵەخانە لە هەرێمی پریمۆری گرتەوە، کە هاو سنوورە لەگەڵ چین و کۆریای باکوور، هەر بەگوێرەی وەزارەتەکە، تیمەکانی فریاکەوتن 13 پەناگەی کاتییان لە ناوچەکە دامەزراندووە.
ئاژانسی هەواڵی فەرمی تاس لە رووسیا رایگەیاند، لافاوەکە لە شاری ئوسوریسک خراپترین لافاوبووە لە ماوەی 10 ساڵی رابردوودا.
لافاو یان زریانی “خان” لە سەرەتای ئەم هەفتەیەدا ژاپۆنیشی گرتەوە پێش ئەوەی بەرەو کۆریا بڕوات.