سەرۆک وەزیرانی بەریتانیا: مەرجەکانی پێدانی فیزە ئاسان دەکات
بە مەبەستی بەرزکردنەوەی ئابووری بەریتانیا و دابینکردنی دەستی کاری زیاتر، لیز ترەس، سەرۆکوەزیرانی نوێی بەریتانیا پلانی هەیە ئاسانکاری لە پێدانی فیزادا بکات.
بە گوێرەی هەواڵێکی رۆژنامەی زە گاردیانی بەریتانی، بەریتانیا کرێکاری بیانی وەردەگرێت و مەرجەکانی پێدانی ڤیزا ئاسان دەکات، ئەمەش بەھۆی کەمی دەستی کار لە ناوەندە بازرگانی و پیشەسازییەکاندا.
رۆژنامەکە باسی لەوەشکردووە، سەرۆکوەزیرانی نوێی بەریتانیا مەرجەکانی پێدانی ڤیزا بۆ کرێکارانی بیانی ئاسانتر دەکات و پێشبینی دەکرێت یاساکانی پەیوەست بە کۆچبەرانیش ھەڵبوەشێنێتەوە.
لیز ترەس لە ماوەی کەمپەینی خۆیدا بۆ سەرۆکایەتی پارتەکەی، بەڵێنی ئەوەیدا دەستی کاری زیاتر بۆ کەرتی کشتوکاڵ دابینبکات، کە بەهۆی رەشنووسی برێکست و یاساکانی پەیوەست بە کۆچبەرانەوە، خاوەنکارانی بەریتانیا دووچاری کەمی دەستیکار هاتبوون.
ئاماژە بەوەشدرا، خاوەنکارانی بەریتانیا ناڕەزایەتییان دەربڕیووە و داوایان کردووە حکومەتی بەریتانیا مەرجەکانی پێدانی ڤیزا ھەڵبگرێت.
لەلایەکی دیکەوە، ئاژانسی ئەسۆشیەتد پرێسی ئەمەریکی بڵاویکردەوە، ئیدارەی حکومەتی بەریتانیا رەتی نەکردەوە کە سەرۆکوەزیران پلانی هەیە ئاسانکاری بۆ هاتنی کرێکارە بیانییەکان بکات.