دامەزرانی ٢٠هەزار مامۆستا لە تورکیا

كارزان گلی – هه‌ولێر

وەزارەتی پەروەردەی توركیا، دامەزراندنی ٢٠هەزار مامۆستای لە تەواوی توركیا راگەیاند، سەرەڕای ئەو هەموو كەمپین و هەوڵدانە تا لە باكووری كوردستان رێگە بدەن كورد بە زمانی دایك بخوێنێت، كەچی لەو رێژەیە، تەنیا سێ مامۆستای زمانی كوردی جێگەی بۆ كراوەتەوە.

لەمساڵدا، لە باكووری كوردستان، كەمپینێكی گەورە راگەیێندرا، تا رێگە بدەن كورد بە زمانی خۆی بخوێنێت، بۆیە وەزارەتی پەروەردە بڵاوی كردەوە، ئەوانەی دەیانەوێت منداڵەكانیان بە زمانی كوردی بخوێنن، دەتوانن ناوی خۆیان تۆمار بكەن.
لەباكووری كوردستان، هەزاران كەس ناوی منداڵی خۆی تۆمار كرد تا بە كوردی بخوێنن، كەچی لە كاتی دامەزراندنی ئەو بیستهەزار مامۆستایە، دیسان كورد فەرامۆش كرا.
پرۆفیسۆر عەزیز یاگان، پێیوایە خوێندن بە زمانی كوردی زۆر گرنگە، بەتایبەت بۆ كۆمەڵگەی كوردی، چونكە لە باكووری كوردستان، زۆر منداڵ هەن، نازانن بە كوردی قسە بكەن، لە كاتێكدا خۆیان كوردن.
سەید ئۆزتورك، یەكێك بوو لەو كەسانەی لە كەمپینی خوێندن بە زمانی كوردی رۆڵێكی باشی هەبووە و دەڵێت، دامەزراندنی ئەو ٢٠هەزار مامۆستایە و نەبوونی مامۆستای زمانی كوردی، عەیبەیەكی گەورەیە بۆ توركیا.
ئەو دەڵێت: ”لە كەمپینەكەی خۆمان بەردەوام دەبین و دەستبەرداری نابین. ئێمە چاوەڕوان بووین كە سێسەد تا پێنسەد مامۆستای زمانی كوردی دابمەزرێنن، كەچی سێ هاتووەتەوە؛ ئەمە عەیبەیە و قبوڵ ناكرێت.
یاگان لە بەشێكی تری قسەكانیدا ئاماژەی دا، ئەگەر لە ٢٠هەزار مامۆستا تەنیا سێیان زمانی كوردی بێت، كەواتە تۆ بەشێكی گەورەی كۆمەڵگات فەرامۆش كردووە و گرنگییان پێ نادەین.
ئەو پێی وایە، بەلایەنی كەمەوە، دەبوایە لەو رێژە مامۆستایەی دادەمەزرێنرێت، ٢٠٠یان مامۆستای زمانی كوردی بونایە، ئەوكات باڵانسەكە تا ئاستێك باش دەبوو.
بەگوێرەی ئەو زانیارییانەی لە میدیاكانی توركیا بڵاوكراوەتەوە، تەنیا بۆ خوێندنی ناوەندی لە باكووری كوردستان، ٢٠هەزارو٢٦٥ قوتابی ناوی خۆیان تۆمار كردووە و داوایان كردووە خوێندنیان بە زمانی كوردی بێت.
بەڵام ئەو ئامارانەی لە دەستی پارتی دیموكراتی گەلان (هەدەپە)دایە، كە لە وەزارەتی پەروەردەی توركیا وەریان گرتووە، ١٦هەزارو٨٤٢ قوتابی داوایان كردووە بە زمانی كوردی بخوێنن.
توركیا ٢٠ملیۆن كوردی لێیە؛ ئەو ژمارەیەش زۆرجار لەسەر زاری بەرپرسانی حكوومەتی توركیا بڵاو دەكرێتەوە، کەچی تەنیا ٧٦ مامۆستای زمانی كوردیی لێیە تورکیا.
هەموو پارتە سیاسییەكانی توركیا، كاتێك دێنە باكوور، یاخود دیمانەی تەلەڤیزیۆنی دەکەن، باس لە گرنگیی خوێندن بە زمانی كوردی دەكەن و دەڵێن ئەگەر بێینە سەر دەسەڵات، رێگە دەدەین كورد بە زمانی دایك بخوێنێت.
بەڵام هەرگیز ئەو گوتانەیان نەبووەتە كردار و بەردەوام لە بەڵێنەكەیان پاشگەز بوونەتەوە و منداڵانی كورد لە خوێندن بە زمانی دایك بێبەش بوونە.
زۆرجار رەخنە لە هەدەپەش دەگیرێت، بەوەی بەهیچ شێوەیەك گرنگیی بە زمانی كوردی نەداوە و تەنانەت فشاری توندیشی نەكردووەتە سەر حكوومەت بۆ ئەو مەبەستە، بۆیە هەزاران قوتابی كورد لە باكووری كوردستان، نازانن بە زمانی كوردی قسە بكەن و بنووسن.