وەزارەتی دەرەوەی عێراق رایگەیاند، 223 عێراقی لە ئۆکرایناوە گەیشتوونەتە پۆڵەندا.
ئەحمەد سەحاف، گوتەبێژی وەزارەتی دەرەوەی عێراق ئەمڕۆ سێشەممە 1-3-2022 لە راگەیێندراوێکدا باسی لەوە کرد، 223 هاووڵاتیی عێراقی لە ئۆکرایناوە چوونەتە پۆڵەندا، ئەوەش بەپێی ئاماری فەرمیی کە لەلایەن دەسەڵاتدارانی پۆڵەنداوە پێیاندراوە، بە هاوئاهەنگی لەگەڵ باڵیۆزخانەی عێراق لە وارشۆ.
گوتەبێژی وەزارەتی دەرەوەی عێراق ئاماژەی بەوەش کرد، لەڕێگەی باڵیۆزخانەی عێراق لە بوخارست داوایان لە وەزارەتی دەرەوەی رۆمانیا و فەرمانگەی کۆچ کردووە کە مانەوەی ئەو عێراقییانە لەو وڵاتە درێژبکاتەوە کە لەگەڵ ئۆکراینییەکان ژیانی هاوژینییان پێکهێناوە تاوەکو دۆخەکە سەقامگیر دەبێت.
ئێوارەی دوێنێ دووشەممەش ئەحمەد سەحاف لە بەیاننامەیەکدا رایگەیاند، باڵیۆزخانەی عێراق لە ئۆکراینا، هەنگاریا، پۆڵەندا و رۆمانیا پاسپۆرتی پەڕینەوە دەدەنە ئەو عێراقییانەی کە پاسپۆرتەکانیان لەدەستداوە لەکاتی جێهێشتنی خاکی ئۆکراینا.
گوتەبێژی وەزارەتی دەرەوەی عێراق رۆژی هەینی رایگەیاند، 5 هەزار و 537 عێراق لە ئۆکراینا نیشتەجێن، نزیکەی 450یان خوێندکارن و لە 37 زانکۆی ئۆکراینا دەخوێنن.
ئەحمەد سەحاف گوتیشی، باڵیۆزخانەی عێراق لە 14-2-2022 نووسراوی فەرمیی بۆ زانکۆکانی ئۆکراینا کردووە و داوای لێکردوون مۆڵەتی خوێندن بدەنە ئەو قوتابییانەی کە دەیانەوێت ئۆکراینا جێبهڵن بەهۆی ئەو دۆخەوە وڵاتەکەی گرتووەتەوە.
رۆژی پێنجشەممە 24-02-2022 ڤلادیمیر پووتین، سەرۆکی رووسیا فەرمانی بە سوپای وڵاتەکەی کرد هێرش بکاتە سەر ئۆکراینا و بەرەبەیانی ئەو رۆژە هێرشی سوپای رووسیا بۆ سەر ئۆکراینا دەستیپێکرد و تاوەکو ئێستاش هەوڵەکان بۆ چارەسەرکردنی کێشەکە لە رێگەی دیپلۆماسییەوە ئەنجامیان نەبووە.