ئاریان دەرگەڵەیی – هەولێر
د. گۆڤەند حوسێن شێروانی، شارەزای كەرتی وزە و بەربژێری ژمارە ٢٥ی لیستی ٢٧٥ی پارتی دیموكراتی كوردستان لەگەڵ (هەولێر) رایگەیاندووە، یەكێك لە بەرنامە بەهێزەكانمان هەوڵ دەدەین وەك پارتی لە بەغدا یاسای نەوت و غاز دەربچوێنین و گەرەنتیی مووچەی فەرانبەرانی كوردستان بكەین. دەشڵێت: “دەرچواندنی یاسای نەوت و غازی عێراق بۆ هەرێمی كوردستان گرنگییەكی ستراتیژیی هەیە و دەتوانێت مافە دەستووری و ئابوورییەكانی مسۆگەر بكات و كۆتایی بە ساڵانێكی زۆر لە ناكۆكی و ناسەقامگیری بهێنێت.”
د. گۆڤەند حوسێن شێروانی، شارەزای كەرتی وزە و بەربژێری ژمارە ٢٥ی لیستی ژمارە (٢٧٥)ی پارتی دیموكراتی كوردستان پێی وایە كە پڕۆژەیاسای نەوت و غازی فیدراڵی عێراق یەكێكە لە پرسە هەرە گرنگ و چارەنووسسازەكان بۆ هەرێمی كوردستان، چونكە ڕاستەوخۆ كاریگەریی لەسەر دەسەڵاتە دەستوورییەكان، سەقامگیریی ئابووری و داهاتووی سیاسی هەرێمی كوردستان دادەنێت.
ئەو بەربژێرە دەڵێت: گرنگیی ئەم یاسایە لە چەند لایەنێكەوە دەردەكەوێت، بەتایبەتی لە ڕووی ئابووری و سیاسییەوە، دەرچوواندنی یاسایەكی فیدراڵی بۆ نەوت و غاز دەتوانێت بە تەواوەتی كۆتایی بە ناكۆكییە چەندین ساڵەكانی نێوان هەولێر و بەغدا بهێنێت و گەرەنتیی مووچەی فەرمانبەران بكات، بەدڵنیاییەوە پارتی لەو هەوڵەی بەردەوام دەبێت بۆ دەرچوواندنی ئەو پڕۆژە یاسایە، واتا پارتی چەند بەهێز بێت دۆخی خەڵكی كوردستان باشتر دەبێت.”
راشیگەیاند، ئەم یاسایە میكانزمێكی ڕوون بۆ بەڕێوەبردنی كێڵگە نەوتییەكان، پڕۆسەی هەناردەكردن و دابەشكردنی داهات دادەنێت كە دەبێتە هۆی مسۆگەركردنی پشكی هەرێمی كوردستان لە بودجەی گشتیی عێراق و فراكسیۆنی پارتی دیموكراتی كوردستان لە بەغدا كار دەكات بۆ دەستەبەركردنی مافەكانی خەڵكی كوردستان، چونكە ئەگەر ئەو یاسایە دەربكرێ، تەواوی پشكی بودجەی هەرێمی كوردستان چارەسەر دەبێت و بەوەش چارەسەری بنەڕەتی بۆ كێشەی مووچە و بودجە دەدۆزرێتەوە.”
سەبارەت بە پشكی هەرێمی كوردستان لە بودجەی فیدراڵی، شێروانی روونیكردەوە، بەپێی دەستوور و بە رەچاوكردنی زیانەكانی رژێمی بەعس، دەبێت پشكی هەرێمی كوردستان زیاتر بێت لە 12.6%، بەڵام ئەوەی ئێستا بە كردەیی دەگاتە هەولێر كەمترە لە 8%. و “پشكی هەرێمی كوردستان دەبوو ساڵانە 16تریلیۆن دینار بێت، بەڵام ئەوەی بە مووچەشەوە پلانی بۆ دانراوە بیگاتە هەولێر، ناگاتە 11تریلیۆن دینار، ئەمەش نادادپەروەرییەكی گەورەیە و پێشێلكردنی مافە دەستوورییەكانمانە.”
لە بەشێكی دیكەی قسەكانیدا شێروانی گوتی: دووبارە هەناردەكردنی نەوتی هەرێم بەڵگە و سەلماندنێكە بەوەی بەپێی دەستووری عێراقی فیدراڵ، هەرێمی كوردستان مافی هەیە لە پیشەسازیی نەوتدا كار بكات، هەروەها لە ماددەی ١١٢ی دەستووری عێراقدا ڕێگەی داوە ئەم هاوبەشییە لە نێوان حكومەتی فیدراڵ و پارێزگا و هەرێمەكاندا بكرێت، هەروەها ڕێگەی داوە پارێزگاكان و هەرێمەكان ڕۆڵیان هەبێت لە داڕشتنی سیاسەتی بەڕێوەبردنی كەرتی نەوتدا، بە مەرجێك ئەم داهاتە بە شێوەیەكی دادپەروەرانە دابەش بكرێت. عێراق دەتوانێ زۆر سوود لە كەرتی نەوت و گازی هەرێمی كوردستان وەربگرێت، ئەم سامانە نەوتی و گازییەی هەرێمی كوردستان دەكرێت ببێتە تەواوكەری سامانی عێراقی فیدراڵ و، عێراق بەهێزتر دەبێت لەگەڵ هەرێمێكی بەهێز لە سێكتەری نەوتدا.