بارزان ئەکرەم – هەولێر
لە چوارچێوەی یارییەکانی خولی نایابی کوردستان، سبەی هەینی گەڕی 24 خولەکە بەڕێوە دەچێت، یانەکان هەوڵ دەدەن ئەو ئامانجەی لە سەرەتای وەرز دیارییان کردبوو لەگەڵ نزیکبوونەوە لە کۆتایی وەرز بیهێننە دی، سەرجەم یارییەکانی ئەم گەڕە کاتژمێر (3:00)ی ئێوارە ئەنجام دەدرێن، لە گرنگترین یارییەكانی ئەم گەڕە یانەی زاخۆ لە یاریگای خۆی میوانداریی یانەی شێروانە دەکات، ئاکرێ دەبێتە میوانی رزگاری، هەندرێن میوانداریی رانیە دەکات، پیشەسازی و شەقڵاوە بۆ مانەوە ڕووبەڕووی یەکتر دەبنەوە، پێشمەرگەی هەولێر لەگەڵ سیروانی نوێ یاری دەکات، رۆژنامەی هەولێر هەموو گەڕێک شەن و کەوی یارییەکان دەکات و دوایین زانیاریی دەخاتەڕوو.
یانەی زاخۆ دەیەوێت شێروانە رابگرێت
یانەی زاخۆ لە یاریگەی خۆی میواندریی یانەی شێروانە دەکات، زاخۆ ئەم وەرزە بە ئاستێکی نایاب دەردەکەوێت و تیپێکی بەهێزیان دروستکردووە، هەوڵدەدەن بۆ یەکەمجار خەونی بردنەوەی نازناوەکە بۆ زاخۆییەکان بەدەستبهێنن، لە رووی هێرشبەریەوە خاوەن تیپێکی بەهێزن هیچ گرفتێکیان نییە، گەڕی رابردوو لەنێو ئاکرێ خاڵێکیان بەدەستهێنا، ئەگەر لەشێروانە ببەنەوە جیاوازییەکەیان دەبیتە یەک خاڵ و کێشە بۆ شێروانە دروست دەکەن و هیوای بردنەوەی نازناوەکە بۆ زاخۆ زیندوو دەبێتەوە، 42 خاڵیان هەیە و لە خانەی سێیەم دێن.
شێروانە ئەم وەرزە بە نایابترین قۆناغی بەشداریکردن لە خولەکەدا تێدەپەڕێت، سەروو ریزبەندییەکەی گرتووە، بەڵام تا ئێستا لە بردنەوەی نازناوەکە نزیک نەبووەتەوە، چونکە پێنج گەڕلە یارییەکان ماون، ئەگەر لە زاخۆ بباتەوە ئەوا بردنەوەی نازناوەکە بۆ ئەو یەکلادەبێتەوە، چونکە یاریی زەحمەتی نامێنێت، بەتایبەت لەگەڵ رکابەرکانی کە پێشمەرگەی هەولێر و زاخۆن، بەڵام ئەگەر بیدۆڕێنێت ئەوا کێشەی بۆ دروسی دەبێت و دەکەوێتە ژێر فشار وبۆ بردنەوەی نازناوەکە مەترسی دەکەوێتە سەر، بە 46 خاڵ لە پێشنەگ دێت.
یانەی ئاکرێ میوانی رزگارییە
یانەی رزگاری لە یاریگەی خۆی میوانداریی یانەی ئاکرێ دەکات، رزگاری گەڕی رابردوو لەم یاریگەیە یەکەم دۆڕانی لەسەر دەستی رانیە لەم وەرزە تووشهات، کە ئەمە یەکەم شکستی ئەو تیپەبوو لەنێو یاریگەی خۆی، بۆیە ئاکرێ بەدەرفەت دەزانێت تا ئەنجامی یارییەکە راستبکاتەوە و نێوانی خۆی لەگەڵ هاندەرانی یانەکە ئاشتبکاتەوە، رزگاری بە 28 خاڵ لە خانەی هەشتەمی کۆمەڵەکەی دێت.
ئاکرێ نەیتوانی بە هەمان ئاستی وەرزی رابردوو دەربکەوێت و رکابەری لەسەر بردنەوەی نازناوەکە بکات، سەرەتای وەرز وەلید محەممەد راهێنەربوو، دواتر یانەکە دووریخستەوە و هەژار سابیر ئەرکی راهێنانی تیپەکەی وەرگرت، بەڵام ئەویش نەیتوانی یانەکە بباتەوە نێو رکابەری بردنەوە لەسەر نازناوەکە، خاوەنی 30 خاڵە و لە خانەی حەوتەم دێت.
یانەی پێشمەرگە چاوی لە بردنەوەی خۆی و شکستی شێروانەیە
یانەی پێشمەرگەی هەولێر لە یاریگەی خۆی میوانداریی یانەی سیروانی نوێ دەکات، تەها قادری راهێنەر هەوڵ دەدات بە بردنەوە لەم یارییە پێشەنگ لە شێروانە وەربگرێت، ئەگەر شێروانە لەسەر دەستی زاخۆ تووشی شکست بێت، پێشمەرگە هەردوو یارییەکە لەگەڵ شێروانە براوە بووە، بۆیە بە بردنەوە لەم یارییە و دۆڕانی سیروانی نوێ پێشەنگی خولەکە وەردەگرێت، بە تایبەتی دوای دۆڕانیان لە جامی کوردستان لەسەر دەستی کفری تەنیا نازناوی خولی نایابی کوردستان ماوە هەوڵی بۆ بدەن، 43 خاڵیان هەیە و لە خانەی دووەم دێن.
یانەی سیروانی نوێ ئامانجی ئەم وەرزەی ماەوەیە لە خولی نایابی کوردستان، سیروانی نوێ بە کۆمەڵێ یاریزانی لاو کێشە بۆ زۆربەی تیپەکان دروست دەکەن، بە کۆمەڵ یاریدەکەن، فشار دەخەنە سەر تیپی بەرامبەر، لە هێرشی پێچەوانەدا مەترسیدارن، بۆیە دەیانەوێت لەم یارییە گرفت بۆ پێشمەرگەی هەولێر دروست بکەن و سێ خاڵی لێ وەربگرن، 30 خاڵیان هەیە و لە خانەی شەشەم دێن و بە ڕێژەیەکی زۆر مانەوەیان لە خولەکە مسۆگەر کردووە.
یارییەکانی دیکەی ئەم گەڕە
برایەتی – دەربەندیخان
چوارقوڕنە – هەولێر
پیشەسازی – شەقڵاوە