ئەم وەرزە بە بەشداریی ٣٠ یانەی پلە نایابەکان و پلە یەکەکان قۆناغی یەکەمی جامی هەڕێمی کوردستان بەڕێوە چوو، ١٥ یانەی لە جامەکە ماون و لە ماوەی سێ رۆژدا یارییەکانی قۆناغی ١٦ بەڕێوە دەچن، هەندرێن لەم قۆناغە یاری ناکات و بەبراوە داندرا.
لەماوەی سێ ڕۆژ یارییەکان دەکرێن
فیدراسیۆنی تۆپی پێی کوردستان بڕیاریدا ئەم وەرزە بەشداریکردن لە جامی کوردستان بۆ یانەکانی پلە نایاب و یەکەکان ئیجباری بێت و هەموو یانەکان بەشداری بکەن، ئەم وەرزە جامەکە جیاواز دەبێت، ٣٠ یانە بەشدار دەبن، لە قۆناغی یەکەم یانەکان بەشێوازی ناوچەی جوگرافی دابەش بوون و بە شێوازی دەرچوون بە یەک دۆڕان یاریان کرد، ١٥ یانە گەیشتنە قۆناغی دووەم و جارێکی تر تیروپشکیان بۆ ئەنجامدرا.
لە یارییەکانی قۆناغێ یەکەم یانەکانی خاک، ئاکرێ و زاخۆ سەرکەوتنی گەورەیان بەدەستهێنا و سەرکەوتن بەسەر یانەکانی شۆرجە، و رواندز و سێمێلدا، لەم قۆناغەدا ٣٤ گۆڵ تۆمار کران، هەریەک لە یاریزانانی خاک ئیبراهیم، ئاراس و هەوراز ئیدریس و کەریچ پێکسۆن هێرشبەری یانەی شێروانە لە یەکەم یاریدا دوو گۆڵیان تۆمار کرد و لەسەرووی ڕیزبەندی گۆڵکارانی خولەک دێن.
بڕیاری وایە ڕۆژانی هەینی و شەممە و یەکشەممەی داهاتوو، یارییەکانی قۆناغی شازدەی بەڕێوەبچن، بەهۆی ئەوەی کە ١٥ یانە لە جامەکە ماون، یانەی هەندرێن لەکاتی ئەنجامدانی تیروپشک بەبراوە داندرا و ڕاستەوخۆ گەیشتە قۆناغی چارەگی کۆتایی.
لەگرنگترین و بەهێزترین یارییەکانی ئەم قۆناغەدا ڕۆژی یەکشەممە یانەی پێشمەرگەی هەولێر میوانداری یانەی سیروانی نوێ دەکات، هەر لە هەمان ڕۆژ لە شاری زاخۆ، یانەی ڕزگاری دەبێتە میوانی یانەی زاخۆ.
خشتەی سەرجەم یارییەکانی قۆناغی ١٦ بەم شێوەیە دەبێت:
هەینی ٢٨/٢/٢٠٢٥
دهۆک – زانکۆی جیهان – یاریگەی دهۆک٢
چەمچەماڵ – سۆران – یاریگەی چەمچەماڵ
بابان – کفری – یاریگەی زانکۆ
شەممە/ ١/٣/٢٠٢٥
خاک – برایەتی – یاریگەی خاک
یەکشەممە ٢/٣/٢٠٢٥
ئاکرێ – ڕانیە – یاریگەی ئاکرێ
زاخۆ – ڕزگاری – یاریگەی زاخۆ
پێشمەرگەی هەولێر – سیروانی نوێ – یاریگەی پێشمەرگەی هەولێر
مێژووی جامی کوردستان
ئەگەرچی خولی نایابی کوردستان لە ساڵی ٢٠٠٦ تاوەکو ئێستا بەردەوامە، بەڵام هەموو وەرزەکان جامی هەرێمی کوردستان و جامی سوپەری کوردستان بەڕێوەنەچووە، تا ئێستا تەنیا شەش جار جامی هەرێمی کوردستان بەڕێوەچووە و چوار جاریش جامی سوپەر ئەنجامدراوە، پاڵەوانەکانی جامی کوردستان بەمشێوەیە بوون، وەرزی ٢٠٠٦-٢٠٠٧ یانەی ئارارات بووە پاڵەوان، دواتر جارێکی تر لە وەرزی ٢٠١٠-٢٠١١ جامەکە بەڕێوەچوو یانەی زاخۆ لەسەر دەستی سلێمان ڕەمەزان بووە پاڵەوان، وەرزی ٢٠١٢-٢٠١٣ سێیەم وەشانی جامەکە ئەنجامدرا و یانەی پێشمەرگەی سلێمانی بووە پاڵەوان، دوای ئەو وەرزی ٢٠١٣-٢٠١٤ بۆ چوارەم جار جامەکە بەڕێوەچوو تیایدا یانەی زێرەڤانی توانی ببێتە پاڵەوان، دواتر تا وەرزی ٢٠٢١ – ٢٠٢٢ جامەکە بەڕێوەنەچوو تیایدا یانەی برایەتی توانی ببێتە پاڵەوان، وەرزی ٢٠٢٢ – ٢٠٢٣ یانەی پێشمەرگەی هەولێر لە شەشەمین وەشانی جامەکە قەڵغانی جامەکەی بەرزکردەوە، وەرزی ڕابردوویش یانەی هەندرێن دوای بردنەوەی لە یانەی ئاکرێ بووە پاڵەوانی جامەکە، پاڵەوانانی جامی سوپەریش تا ئێستا هەریەک لە یانەکانی، ساڵی ٢٠٢١ یانەی برایەتی بووە پاڵەوان، وەرزی ٢٠٢٢ یانەی شێروانە بووە پاڵەوان ساڵێک دوای ئەو یانەی پێشمەرگەی هەولێر بووە پاڵەوان، وەرزەی ڕابردویش یانەی ئاکرێ توانی ببێتە پاڵەوان، یانەی سیروانی نوێ تاکە یانەیە دوو جار لە یاری سوپەری کوردستان لە ساڵەکانی ٢٠٢١، ٢٠٢٢ تووشی شکت بووە، بەرانبەر بە یانەکانی برایەتی و شێروانە.