لە سەردەمی عەدنان درجال، سەرۆكی فیدراسیۆنی تۆپی پێی عێراق، شۆڕشێكی گەورە بۆ گۆڕینی راهێنەری سەرجەم ئاستەكانی هەڵبژاردەی عێراق دەستی پێكردووە، هەمووان گۆڕدران، تەنیا عیماد محەمەد لە پۆستی راهێنەرایەتی هەڵبژاردەی لاوانی عێراق ماوەتەوە.
عەدنان درجال، دوای ئەوەی وەكوو سەرۆكی تۆپی پێی عێراق هەڵبژێردرا، پڕۆتۆكۆڵێكی گەورەی لەگەڵ یەكێتیی تۆپی پێی ئیسپانیا كردووە، رێك كەوتوون ئەركی هەڵسەنگاندن و پێشخستنی سەرجەم تیمەكانی عێراق لە لایەن ئەنجوومەنی لالیگای ئیسپانیا سەرپەرشتی بكرێت.
عەدنان درجال دەیەوێت راهێنەری سەرجەم تیمەكانی عێراق رادەستی راهێنەرانی ئیسپانی بكات، پلانەكەشی لەگەڵ دەستبەكاربوونی خیسۆس كاساسی ئیسپانی و ستافەكەی دەست پێكرد، لە دوایین گۆڕانكاریش، هەفتەی رابردوو ستافێكی ئیسپانی دیكە ئەركی راهێنەرایەتی هەڵبژاردەی تازەپێگەیشتووانی عێراقی وەرگرت.
دوایینجاریش رازی شنێشل لە راهێنەرایەتی هەڵبژاردەی ئۆڵمپی عێراق دوورخرایەوە و پێشبینی دەكرێت ستافێكی ئیسپانیش، ئۆڵمپی عێراق بەڕێوە ببات، بەڵام تا ئێستا بوێری ئەوە نەكراوە دەست بۆ عیماد محەمەدی راهێنەری هەڵبژاردەی لاوانی عێراق ببەن لە كاتێكدا شەش ساڵە ئەركی تیمەكانی تازەپێگەیشتووان و لاوانی عێراقی وەرگرتووە و لە چەندان پاڵەوانێتی گەورەش تاقی كراوەتەوە و نەیتوانیوە خەونی عێراقییەكانیش بەدی بهێنێت، هۆكارەكەش بۆ ئەوە دەگەڕێننەوە عیماد محەمەد لە لایەن سەرۆكی ڕەوتێكی سیاسییەوە پاڵپشتی دەكرێت، بۆیە هیچ كەسێك كاری لەسەر گۆڕینی عیماد محەمەد نەكردووتەوە.
عیماد محەمەد وەكوو راهێنەری هەڵبژاردەی عێراق بۆ خوار تەمەن 20 لە لایەن عەدنان درجال سەرۆكی فیدراسیۆنی تۆپی پێی عێراق زۆر پشتگیری كرا بۆ ئەوەی لە مۆندیالی خوار 20 ساڵ سەری وڵاتەكەی بەرز بكاتەوە، تەنانەت یاریی دۆستانەشی بەرامبەر بەرازیل بۆ رێكخرا، بەڵام لە مۆندیالی لاوان لە قۆناغی كۆمەڵەكان دوورخرایەوە كاتێك هاوشانی ئینگلاند، ئۆروگوای و توونس یاریی كرد، عێراق لە گرووپەكەی تەنیا یەك خاڵی بەرامبەر توونس بەدەستهێنا و ماڵئاوایی كرد.
هەڵبژاردەی عێراق لەژێر سەرپەرشتی عیماد محەمەد بەشداریی لە جامی نەتەوەكانی ئاسیای 2022ـش كرد و لە قۆناغی كۆمەڵەكان دوو سەركەوتنی بەرامبەر كوێت و هیند بەدەستهێنا بۆ قۆناغی 16 سەركەوت، بەڵام نەیتوانی بۆ چارەكی كۆتایی سەربكەوێت و ماڵئاوایی كرد.
دوایین جار عیماد محەمەد پێش جامی نەتەوەكانی ئاسیای خوار 20 ساڵ سەرەڕای ئەوەی چەندان كەمپی مەشقی لە بەغدا و تایلەند و ئۆزبەكیستان بۆ رێكخرا، لە ماوەكانی رابردوو زیاتر لە یەك ملیار دیناری بۆ خەرج كرا، بەڵام نەیتوانی عێراق لە چارەكی كۆتایی جامی ئاسیای خوار 20 ساڵ دەرباز بكات، لە دوایین یاریی بەرامبەر ئوسترالیا دۆڕا و عێراق لە بەدەستهێنانی بلیتی مۆندیالی 2025 بۆ خوار تەمەن 20 ساڵ بێبەش بوو، لە كاتێكدا بەشێكی زۆر لە یاریزانەكانی لە خولی ئەستێرەكانی عێراق یارییان دەكرد، یاریزانی لە یانەكانی قوە جەوییە، زەورا و هەولێر و كارەبا بردبوو، تەنانەت 5 یاریزانی سەرەكی یانەی مینای بردبوو، بەبێ ئەوەی هیچ یانەیەك بتوانێت رێگری لێ بكات.
عیماد محەمەد لە دایكبووی شاری كەربەلایە و یەكێك بووە لە گۆڵكارەكانی مێژووی تۆپی پێی عێراق، لە لایەن سەرۆكی یەكێكی لە ڕەوتە سیاسییەكانی عێراقەوە پاڵپشتیی كرا بۆ ئەوەی لە 2019 ئەركی راهێنەرایەتی هەڵبژاردەی عێراقی خوار تەمەن 17 ساڵان وەربگرێت، لەوكاتەوە لە پۆستەكەی بەردەوامەوە.
عیماد محەمەد بەوە ناسراوە كە پەیوەندییەكی بەهێزی لەگەڵ سەرۆك و بەرپرسان و گەورە هۆزەكانی كەربەلا و نەجەف هەیە، بۆیە توانیویەتی پارێزگاری لە پۆستەكەی بكات.