ئەستێرەی تۆپی پێی بەڕازیلی، نێیمار دا سیلڤا، دوای شكستخواردنی لە ئەزموونی سعوودیە، بەهۆی ئەو پێكانە سەختەی تووشی بوو، ئێستە چاوەڕێ دەكرێ جارێكی دیكە بگەڕێتەوە یانەی بەرشلۆنە.
دوای هەڵوەشاندنەوەی بۆندەكەی لەگەڵ یانەی هیلالی سعوودی لە ماوەی گواستنەوەی زستانەی ڕابردوو و گەڕانەوەی بۆ یانەی سانتۆس، كە یانەی هەرەپێشتری بوو، ئێستە مێدیاكان باسوخواسی ئەوەیان بڵاو كردووەتەوە كە ڕەنگە نێیمار بگەڕێتەوە بەرشلۆنە.
سەرەڕای ئەوەی كارگێڕیی وەرزشیی یانەی بەرشلۆنە، نێیمار بە بژاردەیەكی باش و دڵخوازی خۆیان نازانن لەم كاتەدا، بەڵام هەندێ هۆكار وا دەكەن لە ماوەكانی داهاتوودا لەو رووەوە هەڵوێستیان بگۆڕن، ئەوەش بەپێی زانیارییەكانی رۆژنامەی سپۆرتی نزیك لە یانە كاتەلۆنییەكە.
رۆژنامەی سپۆرت باسی لەوەش كردووە، كە بینی زەهاڤی، بریكاری ناسراوی جیهانی و بریكاری نێیمار، پەیوەندییەكی باشی لەگەڵ بەرشلۆنەدا هەیە، ئەوەش وای كردووە بگوترێ ئەگەری گەڕانەوەی نێیمار بۆ بەرشلۆنە زۆرە. هاوكات نێیمار خۆیشی پێی خۆشە بگەڕێتەوە بەرشلۆنە.
نێیمار دوای تەواوبوونی بۆندەكەی لەگەڵ یانەی سانتۆسی بەڕازیلی، بە بۆندێكی خۆڕایی دەچێتە بەرشلۆنە، ئەوەیش دەكەوێتە هاوینی داهاتوو، لەگەڵ ئەوەش ئامادەشە مووچەكەی كەمتر بكرێتەوە، بۆ ئەوەی ئاستی بگەڕێتەوە باری پێشتری و سەرلەنوێ گۆڕەپانی جیهانی بگرێتەوە.
سەرەڕای ئەوە، بەربەستێكی گەورەی دارایی كە یانەی بەرشلۆنە تووشی هاتووە، دەبێتە بەربەستی بەردەم سەرخستنی ئەو بۆندە، مەگەر لە بارێكدا لە هاوینی دادێ، یەكێك لە ئەستێرەكانی بفرۆشێ.
هەروەها دەستەی هونەریی بەرشلۆنە بە سەركردایەتیی هانز فلیك، وا دەرناكەوێ بەجۆش بێ بۆ گەڕانەوەی نێیمار، وەك هەندێ ڕاپۆرتی مێدیایی باسیان لێوە كردووە.
بۆ بیرهێنانەوە، خوان لاپۆرتای سەرۆكی یانەی بەرشلۆنە، پێش دوو ساڵ هەوڵی دا نێیمار بگەڕێنێتەوە بەرشلۆنە، بەڵام ئەو كات نێیمار یانەی هیلالی هەڵبژارد.