يادى شەست و سێ ساڵه‌ى دامەزراندنی یەکێتيی مامۆستایانی کوردستان لە هەموو مامۆستایانی خۆشەویستی کوردستان و سکرتارییەتی یەکێتیی مامۆستايان پیرۆز دەکەم، هیوای سەرکەوتن و پێشکەوتنی بەردەوامیان بۆ دەخوازم.
پەیامى بەرز و ڕۆڵی مامۆستایان لە پێگەیاندنی نەوەکان بەرز دەنرخێنین و هه‌موو هه‌وڵێك له‌پێناو دابينكردنى ژیانێکی شایستە بۆ ئه‌وان ده‌ده‌ين کە لەگەڵ پێگەی پەروەردەیی و نیشتمانیياندا بگونجێت. به‌رده‌وام ده‌بين له كاركردن بۆ دابینکردنی ژینگەیەکی فێرکردنی گونجاو و هاوچەرخ كه وەبەرهێنانێکی ڕاستەوخۆیە لە داهاتووی کوردستاندا.
مامۆستایان پێشه‌نگ و کۆڵەکەی سەرەکيی بنیاتنانی کۆمەڵگەن و گەرەنتيی پەروەردەکردنی مرۆڤی هۆشیارن كه شانازى به ناسنامه‌كه‌يانه‌وه دەکەن. لە هەموو قۆناغەکاندا دڵسۆزییان سەلماندووە، هه‌ر لە گۆڕەپانەکانی خەباته‌وه تا هۆڵه‌كانى خوێندن، هەمیشە پارێزەری هۆشیاری و زمان و بەهاکان بوون. ڕۆڵیان لە بەردەواميى پرۆسه‌ى فێرکردن لە سەختترین هەلومەرجدا، جێى ڕێز و پێزانينه.
ده‌ستخۆشى له یەکێتيی مامۆستایانی کوردستان دەکەین بۆ نوێنەرایەتیکردنی توێژی مامۆستایان و بەرگریکردن لە مافەکانیان. بە ڕێزەوە قوربانیدانی ئەو مامۆستایانە بەبیر دێنینەوە کە گیانیان لەپێناو ئازادیدا به‌خشى. سڵاو بۆ هەموو ئه‌و مامۆستایانه‌ى به دڵسۆزی و له‌خۆبوردوويى ئەرکی پيرۆزيان جێبەجێ دەکه‌ن.
نێچیرڤان بارزانی
سەرۆکی هەرێمی کوردستان
2025/5/15