ڕائیب جادر – هە‌ولێر
ھەنگاوەکانی پێکھێنانی کابینەی نوێی حکوومەتی ھەرێمی کوردستان لە قۆناخەکانی کۆتاییدایە، ھەفتەی داھاتوو پارتی و یەکێتی لەسەر پێکھێنانی کابینەی دەیەم کۆبوونەوەیەکی چارەنووساز دەکەن، پارتی دەیەوێت لە حکوومەتی داھاتوودا ئەولەویەت خزمەتکردن و خۆشکردنی ژیان و گوزەرانی خەڵک بێت. گوتەبێژی پارتی، ڕایگەیاند: زۆربەی بابەتەکانی گفتوگۆی نێوان لیژنە تەکنیکییەکانی پارتی و یەکێتی چارەسەر کراون.
ئێستا خەڵکی کوردستان و کوردانی ھەر چوار پارچە بەپەرۆشەوە خوازیاری پێکھاتنی کابینەی نوێن، بەڵام ئەم کابینەیە دەبێت کابینەیەکی جیاواز و بەھێزتر و یەکگرتووتر بێت لە ھەموو کابینەکانی پێشوو، بۆ ئەمەش پارتی دیموکراتی کوردستان بەرنامەی خۆی خستووەتەڕوو کە داخوازی مەرجەعی باڵای کوردستان سەرۆک بارزانییە و، ڕەنگدانەوەی داخوازییەکانی خەڵکی کوردستانە بە سەرجەم چین و توێژەکانییەوە، ئەویش ستراتیژی یەک حکوومەت، یەک ھەرێم و یەک ھێزی پێشمەرگەیە.
تاوەکو ئێستا ھەردوو شاندی پارتی و یەکێتی پێنج جار لەبارەی پێکھێنانی کابینەی دەیەمی حکوومەتی ھەرێمی کوردستان کۆبوونەوەتەوە، دوایین جار ٤ی مانگی ڕابردوو بوو لە ھەولێر.
دوای تەواوبوونی کۆبوونەوەکە، ھەردوولا ڕاگەیەندراوێکی ھاوبەشیان بڵاو کردەوە و باسیان لەوە کرد، لێکگەیشتنی ھاوبەش و ڕێککەوتنی سەرەتایی لەسەر زۆربەی تەوەرەکان ھاتووەتە ئاراوە، ھەروەھا ئەنجامی کۆبوونەوەکان دەخرێتە بەردەستی لیژنەی باڵای دانووستاندنکاری ھەردوولا، بۆ یەکلاکردنەوەی پرسەکان.
لە ھەڵبژاردنی خولی شەشەمی پەرلەمانی کوردستان کە ڕۆژی ٢٠-١٠-٢٠٢٤ کرا، پارتی ٣٩ کورسی و یەکێتیش ٢٣ کورسی بەدەست ھێنا.
لە قۆناغی دوای ھەڵبژاردن پارتی دیموکراتی کوردستان پابەندە بە دروشمەکانی خۆی ئەویش ھێنانەدی ئارامی و ئاوەدانی و پێکەوەییە، پارتی ھیچ مەرجێکی پێشوەختەی نییە بۆ پێکھێنانی کابینەی دەیەم، بەڵام وەک سەرۆک بارزانی، دەڵێت، یەک حکوومەت و یەک پەرلەمان و یەک ھێزی پێشمەرگە داواکاری پارتییە. مەحموود محەممەد، گوتەبێژی پارتی دیموکراتی کوردستان، ئاشکرای کرد: گفتوگۆکان گەیشتوونەتە قۆناغی بیرۆکەی ھاوبەش بۆ پێکھێنانی حکوومەت و تەنیا یەک دوو خاڵ ماون کە پێویستی بە گفتوگۆ لە ئاستێکی دیکەدا ھەیە و لە چەند ڕۆژی داھاتوودا گفتوگۆ دەکرێت و خاڵە ناکۆکەکان کۆتایی پێ دەھێندرێت.
گوتەبێژی پارتی، گوتیشی: ھەردوو لا گەیشتوونەتە ئەو باوەڕەی دەبێت لە پێکھێنانی حکوومەت پەلە بکرێت و تەنیا ڕای جیاوازمان لەسەر چۆنیەتی پێکھێنانی حکوومەت و بەڕێوەبردنیەتی و تا ئێستا قسە لەسەر پۆستەکان نەکراوە.
لەلایەکی دیکەوە قوباد تاڵەبانی، لێپرسراوی مەکتەبی سکرتارییەتی مام جەلال، جەختی لەوە کردەوە، نووسراوێکی ھاوبەش لە نێوان پارتی و یەکێتی ئامادە کراوە، نووسراوەکە لە سێ جۆر بابەت پێکھاتووە و بەسەر سێ خانەدا دابەش کراون، ئەو بابەتانەی ھەردوولا لەسەریان ھاوڕان و گەیشتوونەتە ڕێککەوتن، ئەو بابەتانەی ڕێککەوتنی سەرەتاییان لەسەر کراوە، بەڵام پێویستییان بە ئالییەتێکی داڕێژراوە بۆ ئەوەی قابیلی جێبەجێکردن بن، ئەو خاڵانەی ناکۆکییان لەسەرە و ھەردوو شاندی پارتی و یەکێتی لەسەری ڕێک نەکەوتوون.
لێپرسراوی مەکتەبی سکرتارییەتی مام جەلال دووپاتیشی کردەوە: وەکو یەکێتی مەبەستمانە بە زووترین کات حکوومەتێک پێک بێت، ئەمە وەکو دیدگای سەرەکیی ئێمە و ئاراستەش کراوین، حکوومەتێک پێک بھێنین، بەڵام دەبێت حکوومەتێک پێک بھێنین، باشترین جۆری حکوومەت بێت، باشترین شێوازی حوکمرانی ھەبێت، ئەمەش پێویستی بە ڕێککەوتنێکی قووڵ و لێکگەیشتنێکی قووڵ و ئالییەتی جێبەجێکردنێکی توکمە لەنێوان ھەردوو پارتی دەسەڵاتدار لە ھەرێمی کوردستانە، کە پارتی و یەکێتین.
سەرۆکی پارتی سۆسیال دیموکراتی کوردستان دەڵێت: بە ھەستکردن بە کاریگەرییەکانی ڕۆژھەڵاتی ناوەڕاست و ناوچەکە، پێویستە پارتی و یەکێتی پەلە لە پێکھێنانی کابینەی نوێی حکوومەت بکەن بۆ ئەوەی ھەرێمی کوردستان لە گۆڕانکارییە نەرێنییەکانی ناوچەکە بپارێزن.
محەممەد حاجی مەحموود، سەرۆکی پارتی سۆسیال دیموکراتی کوردستان، لە کۆنگرەیەکی ڕۆژنامەنووسیدا دەڵێت: پارتی و یەکێتی لە دانووستاندنەکانیان بۆ پێکھێنانی کابینەی نوێی حکوومەت قۆناغی باشیان بڕیووە، ھەروەھا جەختی کردەوە، بە لەبەرچاوگرتنی گۆڕانکارییەکانی ناوچەکە، پێویستە پارتی و یەکێتی پەلە بکەن لە گەیشتن بە ڕێککەوتنی کۆتایی بۆ ئەوەی بتوانن ھەرێمی کوردستان لە کاریگەرییە نەرێنییەکانی ئەو گۆڕانکاریانە بپارێزن.
سەرۆکی پارتی سۆسیال دیموکراتی کوردستان، گوتی: نێوانی پارتی و یەکێتی ھەندێک شتی ماوە، ڕەنگە لەم ڕۆژانەدا دووبارە دەست بە دانیشتنەکانیان بکەنەوە، لەسەر بابەتە سەرەکییەکان ڕێککەوتوون، ھەندێک بابەتی ھونەری ماوە کە ئەوانیش کۆتایی دێت.
محەممەد حاجی مەحموود، سەرۆکی پارتی سۆسیال دیموکراتی کوردستان، گوتیشی: پارتی و یەکێتی ھەست بە گۆڕانکارییەکان دەکەن کە لە ڕۆژھەڵاتی ناوەڕاست و ناوچەکە ھاتووەتە ئاراوە، بۆیە پێویستە پەلە بکەن لە پێکھێنانی حکوومەت، پەرلەمان و سەرۆکایەتی ڕێک بخەن، جارێکی دیکە سەرۆکی ھەرێم ھەڵبژێرنەوە، سەرۆکی ھەرێمیش داوا لە فراکسیۆنی گەورەی پەرلەمان بکات حکوومەت پێکبھێنێت.