كارزان گلی – هه‌ولێر
پڕۆسەی دادگاییكردنی ئەكرەم ئیمامئۆغڵو، سەرۆكی شارەوانیی ئیستانبۆڵ بەردەوامی هەیە، رەنگە لە ناوەڕاستی مانگی یەكی ٢٠٢٥، دوابڕیار لەبارەی دۆسیەكەیەوە بدرێت و ئەگەر زۆرە كە قەدەغەی سیاسەتی لەسەر جێبەجێ بكەن و، بیشخرێتە زیندانەوە.
ئیمامئۆغڵو، دوو جار سەركەوتنی بەسەر ئاكەپەدا هێناوە، لە هەردوو جاردا، رەجەب تەیب ئەردۆغان، سەركۆماری توركیا هاتووەتە ناو بانگەشەی هەڵبژاردن. جاری بەكەم هەڵبژاردنی شارەوانییەكانی ٢٠١٩ بوو، كە بەربژێری ئاكەپە بیناڵی یڵدرم بوو، جاری دووەمیش هەڵبژاردنی شارەوانییەكانی ٢٠٢٤ بوو، كە بەربژێری ئاكەپە مراد كوڕووم بوو.
بەڵام هەڵبژاردنی ٢٠٢٤ بۆ ئیمامئۆڵو خاڵی وەرچەرخان بوو، چونكە ئەگەر بدۆڕایە لەناو جەهەپەش كۆتاییی پێ دەهات، بەڵام بردنەوەی بەو شێوە گەورەیە، دەرگای بۆ ئەو سیاسییە كردەوە، كە ببێتە رکابەری ئەردۆغان لە هەڵبژاردنی سەرۆكایەتیی داهاتوو.
ئیمامئۆغڵو، لە ٢٠١٩ بەربژێری هەموو پارتە ئۆپۆزسینەكان بوو، بۆیە سەركەوتنی بەدەست هێنا، بەڵام لە ٢٠٢٤، پارتە ئۆپۆزسیۆنەكان بەربژێری خۆیان هەبوو و ئیمامئۆغڵو بەتەنیا رووبەڕووی هاوپەیمانیی كۆماری بووەوە، كە ئەردۆغان بۆ خۆی بانگەشەی بۆ بەربژێرەكەیان، مراد كوڕووم دەكرد، ئەمەش وای كرد بڵێن سەركەوتنی ئیمامئۆغڵو دوو جار سەركەوتن بوو، جارێك بەسەر كوڕووم و جارێكیش بەسەر ئەدرۆغاندا.
بەڵام نابێت بیرمان بچێت، دەم پارتی، لەرێگەی رێككەوتنێكی نهێنییەوە پاڵپشتی لە ئیمامئۆغڵو كرد، بەوەی مەڕاڵ دانش بێشتاشی كردە بەربژێر، كە پڕۆفایلێكی لاوازی هەیە و كوردانی ئیستانبۆڵ خۆشیان ناوێ، ئەمەش بووە هۆی ئەوەی دەنگی كوردانی ئیستانبۆڵ بۆ ئیمامئۆغڵو بڕوات.
لەناو جەهەپەدا، ئیمامئۆغڵو خاوەن جەماوەرێكی زۆرە، بۆیە كاریگەریی زۆری هەبوو لە كۆنگرەدا شكستی بە كەمال كلیچدارئۆغڵو هێنا و ئۆزگوور ئۆزەلی هێنایە شوێنی.
زۆربەی شرۆڤەكارانی سیاسی ناوەخۆیی و دەرەكی پێیان وایە، ئیمامئۆغڵو خۆی ئامادە دەكات تا لە ٢٠٢٨دا ببێتە ركابەری ئەردۆغان و چاوی لەوەیە ببێتە سەركۆماری توركیا، بەڵام ئاكەپە و خودی ئەردۆغان دەیانەوێت لەنگەری بۆ دروست بكەن،
ئیمامئۆغڵو، لەسەر دوو دۆسیە دادگایی دەكرێت، ئەگەریش زۆرە لە سیاسەت دوور بخرێتەوە، یان بۆی نەبێت ببێتە سەرۆكی شارەوانیی ئیستانبۆڵ و زیندانیش بكرێت.
دۆسیەی یەكەم، دەگەڕێتەوە بۆ ئەو ساڵانەی سەرۆكی شارەوانیی بەیلیكدووزی بوو لە ئیستانبۆڵ، كە پڕۆژەیەكی داوەتە كۆمپانیایەك، ئەو كۆمپانیایە مەرجەكانی تێدا نەبووە تا ئەو پڕۆژەیە وەربگرێت، بۆیە بە تۆمەتی بەرتیلخواردن دراوەتە دادگا و لە ناوەڕاستی مانگی یەكی ٢٠٢٥ پڕۆسەی دادگاییكردنەكەی دەستپێدەكات.
دۆسیەی دووەم، بۆ ٢٠١٩ دەگەڕێتەوە، كاتێك بووە سەرۆكی شارەوانی و لە بیناڵی یڵدرمی بردەوە، ئاكەپە ئەنجامەكەی قبوڵ نەبوو و رەتیان كردەوە، بۆیە كۆمیسیۆنی باڵای هەڵبژاردنی توركیا بڕیاری دا هەڵبژاردن لە ئیستانبۆڵدا دووبارە بکرێتەوە.
ئیمامئۆغڵو، لە میتینگێكدا كە لە ئیستانبۆڵ رێكی خستبوو بە كۆمیسیۆنی گوت ”ئەحمەق“ لەسەر ئەو وشەیە دراوەتە دادگا و شەش ساڵە پرۆسەی دادگاییكردنی بەردەوامە.
بەگوێرەی هەموو ئەو راپرسیانەی كراوە، ئەگەر توركیا بچێتە ناو هەڵبژاردنەوە ئیمامئۆغڵو دەبێتە براوە و بەپێش ئەردۆغان دەكەوێت، چونكە لەناو كوردەكانیشدا زۆر خۆشەویستە و، سەلاحەدین دەمیرتاش خۆی پشتگیری لێ دەكات.
ئەمە وای كردووە ئاكەپە و ئەردۆغانیش لێی بترسن و بە شێوەیەكی یاسایی دووری بخەنەوە و لە رێگەی ئەو دوو دۆسیەی بۆی كراوەتەوە قەدەغەی سیاسەتی لەسەر جێبەجێ بكەن و پاشان بخرێتە زیندانەوە.
ئیمامئۆغڵو، لەناو پارتەكەی خۆشیدا كە جەهەپەیە، كێشەی بۆ دروست دەكەن و رێگە خۆش دەكەن تا لە سیاسەت دوور بخرێتەوە، بەتایبەت ئەوانەی پشتگیری لە مەنسوور یاڤاش، سەرۆكی شارەوانیی ئەنكەرا دەكەن تا لە هەڵبژاردنی داهاتوو ببێتە بەربژێری جەهەپە. جیا لەوەش كەمال كلیچدارئۆغڵو، پێی وایە لە پشتەوە خەنجەریان لێی داوە، ئەویش ئیمامئۆغڵوە، بۆیە لە رێگەی ئەو سیاسی و بەرپرسانەی لەناو جەهەپەن و تاوەكوو ئێستا هەر كلیچدارئۆغڵویان پێ سەرۆكە، دەیەوێت ئیمامئۆغڵو لاواز بكات و هەر هیچ نەبێت رێگری بكەن لەوەی ببێتە بەربژێری جەهەپە بۆ هەڵبژاردنی سەرۆكایەتیی داهاتووی توركیا.
بەڵام وەكوو ئەوەی چەند رۆژنامەنووسێكی سەر بە جەهەپە باسی دەكەن، ئیمامئۆغڵو لە كاتی دادگاییكردنیدا سزا نەدرێت و دادوەر بڕیار بدات بەردەوام بێت لە سیاسەت، ركابەرەكانی ناو پارتەكەی نابێتە كێشە بۆی، چونكە بەشێكی زۆری سەركردایەتی و بنكەی جەماوەری جەهەپە لەگەڵ ئیمامئۆغڵودایە، لە هەڵبژاردنی شارەوانییەكانی ٢٠٢٤یش ئەوە سەلمێنرا كە ئیمامئۆغڵو خاوەن چی جەماوەرێكی بەرچاو و گەورەیە لە توركیا و باكووری كوردستان.
ئایە ئیمامئۆغڵو لە سەرۆكی شارەوانیی توركیاوە دەچێتە كۆشكی كۆماری كە خەونی گەورەیەتی، یان دەچێتە زیندان و كۆتایی بە ژیانی سیاسی دێت؟