بەڕێوەبەری نەخۆشخانەی هیوا ڕایگەیاند “بەراورد بە ساڵی ڕابردوو، لە 10 مانگی ئەمساڵ، گۆڕانێکی ئەوتۆ لە ژمارەی تووشبووانی شێرپەنجە لە پارێزگای سلێمانی ڕووی نەداوە.”
پێنجشەممە، 07-11-2024، دكتۆر یاد نەقشبەندی، بەڕێوەبەری نەخۆشخانەی هیوا لە کۆنفرانسێکی ڕۆژنامەوانیدا ئاماری ئەو تووشبووانەی شێرپەنجەی ڕاگەیاند کە لە ساڵی 2023 و 10 مانگی ساڵی 2024، چارەسەریی پزیشکییان لە نەخۆشخانەکەیان وەرگرتووە.
وەکوو ئەوەی بەڕێوەبەری نەخۆشخانەی هیوا باسی کرد: “لە ساڵی 2023، پشکنین بۆ شەش هەزار و 442 نەخۆش لە نەخۆشخانەکەمان کراوە، دەرکەوت لەو ژمارەیە سێ هەزار و 356ـیان تووشبووی شێرپەنجە بوون.”
لە 10 مانگی ڕابردووی ئەمساڵیش، وەکوو ئەوەی نەقشبەندی ئاماژەی پێ دا “نەخۆشخانەی هیوا پشکنینی بۆ پێنج هەزار و 866 نەخۆش کردووە کە لەو ژمارەیە سێ هەزار و 151ـیان تووشبووانی شێرپەنجە بوون.”
بەڕێوەبەری نەخۆشخانەی هیوا پێی وایە “ئەگەر بەراوردی ئامارەکانی ساڵی 2023 لەگەڵ 10 مانگی ڕابردووی ئەمساڵ، بە هەژمارکردنی هەردوو مانگی 11 و 12 بکەین؛ گۆڕانێکی ئەوتۆ لە ژمارەی تووشبووانی شێرپەنجەدا ڕووینەداوە و لە یەکدییەوە نزیکن.”
بەڕێوەبەری نەخۆشخانەی هیوا گوتیشی: “لە نەخۆشخانەکەمان بێجگە لە تووشبووانی شێرپەنجە، چارەی نەخۆشانی دیکەش دەکرێت.”
نەقشبەندی دووپاتی کردەوە: “ئەو ژمارەی تووشبووانی شێرپەنجە کە لەلایەن نەخۆشخانەی هیواوە بڵاو دەکرێنەوە، هەمووان تایبەت نین بە سەنتەری شاری سلێمانی، بەڵکوو تووشبووی شارەکانی دیکەی هەرێمی کوردستان و تەنانەت عێراقیشی تێدایە؛ هەر بۆیە ئەو دەنگۆیانەی دەڵێن ‘شاری سلێمانی بووەتە چەقی تووشبوون بە شێرپەنجە’ دوورن لە ڕاستییەوە.”