کۆمیسیۆنی هەلبژاردنەکانی عێراق: هەفتەی داهاتوو لیستی کاندیدان پەسەند دەکەین

کۆمیسیۆنی هەڵبژاردنەکانی عێراق ڕایگەیاند، هەفتەی داهاتوو لیستی کاندیدان پەسەند دەکەن و وادەی دەستپێکردنی بانگەشەی هەڵبژاردنیش دیاری دەکەن.

پێنجشەممە، 19-09-2024، جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق ڕاگەیاند “هەفتەی داهاتوو، ئەنجوومەنی کۆمیسیاران لیستی کاندیدانی هەڵبژاردنی پەرلەمانی کوردستان پەسەند دەکات”.

بە گوتەی غەلای، هەر لە هەفتەی داهاتوو و دوای پەسەندکردنی لیستی کاندیدان، وادەی دەستپێکردنی بانگەشەی هەڵبژاردنی خولی شەشەمی پەرلەمانی کوردستان لەلایەن ئەنجوومەنی کۆمیسیارانەوە دیاری دەکرێت.  

هەڵبژاردنی خولی شەشەمی پەرلەمانی کوردستان، ڕۆژی 20-10-2024، بە سەرپەرشتیی کۆمیسیۆنی باڵای سەربەخۆی هەڵبژاردنەکانی عێراق بەڕێوە دەچێت.

دابەشکاریی ژمارەی کورسییە گشتییەکانی پەرلەمانی کوردستان بەسەر پارێزگاکاندا:

1.  هەولێر: 32 کورسی

2.  سلێمانی: 36 کورسی

3.  دهۆک: 24 کورسی

4.  هەڵەبجە: سێ کورسی

(کۆی گشتی: 95 کورسی)

دابەشکاریی ژمارەی کورسیی کۆتای پەرلەمانی کوردستان بەسەر پارێزگاکاندا:

1.  هەولێر: دوو کورسی

2.  سلێمانی: دوو کورسی

3.  دهۆک: یەک کورسی

4.  هەڵەبجە: سفر کورسی

(کۆی گشتی: 5 کورسی)