سه‌رۆكی سیاده‌ی سوننه‌كان ڕۆڵی سه‌رۆك بارزانی له‌باره‌ی چاره‌كردنی پرسی سه‌رۆكی په‌رله‌مان به‌رز ده‌نرخێنێت؛ هاوكات ئاماژه به‌وه ده‌كات له ڕۆژانی داهاتوودا هه‌نگاوه‌كان به ئاراسته‌ی چاره‌كردنی پرسه‌كه ده‌بن.
ڕۆژی سێشه‌ممه 25ـی حوزه‌یرانی 2024، خه‌میس خه‌نجه‌ر، سه‌رۆكی سیاده‌ی سوننه‌كان له كۆنفرانسێكی ڕۆژنامه‌وانیدا له پارێزگای نه‌ینه‌وا سه‌رنجی خسته سه‌ر هه‌وڵه‌كان بۆ هه‌ڵبژاردنی سه‌رۆكی په‌رله‌مان عێراق و ڕایگه‌یاند، هه‌نگاوه‌كان له ڕۆژانی داهاتوودا به ئاراسته‌ی چاره‌كردنی ئه‌و پرسه‌ن.
سه‌رۆكی سیاده‌ی سوننه‌كان گوتیشی، سه‌قامگیریی پێكهاته‌كانی شیعه، سوننه و كورد كاریگه‌ریی له‌سه‌ر سه‌قامگیریی هه‌موو عێراق ده‌بێت، هه‌روه‌ها به پێچه‌وانه‌یشه‌وه سه‌قامگیریی عێراق كاریگه‌ریی له‌سه‌ر سه‌قامگیریی هه‌موو پێكهاته‌كان ده‌بێت.
خه‌میس خه‌نجه‌ر له باره‌ی پرسی سه‌رۆكی په‌رله‌مان كه تا ئێسته په‌رله‌مانی عێراق سه‌رۆكێكی نوێی له دوای محه‌ممه‌د حه‌لبووسی، سه‌رۆكی دوورخراوه بۆ دیاری نه‌كراوه، ئاماژه‌ی به ڕۆڵی سه‌رۆك بارزانی كرد له هه‌وڵه‌كانی بۆ چاره‌كردنی ئه‌و پرسه و كۆتاییهێنان به ناكۆكییه‌كان و له‌م باره‌وه گوتی “سه‌رۆك بارزانی ڕۆڵێكی گه‌وره‌ی له پێناو چاره‌كردنی پرسه‌كه بینیوه.”
ڕۆژی سێشه‌ممه 25ـی حوزه‌یرانی 2024، خه‌میس خه‌نجه‌ر، سه‌رۆكی پارتی سیاده به مه‌به‌ستی ئاگه‌داربوون له بارودۆخی پارێزگای نه‌ینه‌وا، سه‌ردانی دیوانی پارێزگاكه‌ی كرد و له‌گه‌ڵ عه‌بدولقادر ده‌خیل، پارێزگاری نه‌ینه‌وا دیارترین ئه‌و پرس و بابه‌تانه‌یان تاوتوێ كرد كه کاریگەرییان لەسەر ژیانی هاوڵاتیان هەیە.
ڕۆژی 18ـی ئایاری 2024، به ئاماده‌بوونی 258 په‌رله‌مانتار گه‌ڕی یه‌كه‌می دەنگدان بۆ هەڵبژاردنی سەرۆکی نوێی په‌رله‌مانی عێراق دەستی پێ کرد و دوای جیاکردنەوەی دەنگەکان هیچ کام لە کاندیدەکان 167 دەنگی نەهێنا، دواتر گه‌ڕی دووەمی پرۆسه‌كه له نێوان مەحموود مەشهەدانی و سالم عیساوی بۆ پۆستی سەرۆکی پەرلەمانی عێراق ده‌ستی پێ كرد و سالم عیساوی 114 و مه‌حموود مه‌شهه‌دانی 102 ده‌نگیان به‌ده‌ست هێنا.
پاشان پرۆسه‌ی ده‌نگدان بۆ هه‌ڵبژاردنی سه‌رۆكی په‌رله‌مانی عێراق چووه گه‌ڕی سێیه‌م و ده‌نگه‌كان به‌م شێوه‌یه بوو:
كۆی ده‌نگه‌كان: 311
سالم عیساوی: 158 ده‌نگی به ده‌ست هێنا
مه‌حموود مه‌شهه‌دانی: 137 ده‌نگی به ده‌ست هێنا
عامر عه‌بدولجه‌بار: 3 ده‌نگی به ده‌ست هێنا
ته‌ڵاڵ زه‌وبه‌عی: هیچ ده‌نگێكی به‌ده‌ست نه‌هێنا
ده‌نگی پوچه‌ڵ: 13
دواتر موحسین مه‌نده‌لاوی، سه‌رۆكی په‌رله‌مانی عێراق به وه‌كاله‌ت رایگه‌یاند، پشوێك ده‌ده‌ن، دواتر ڕایده‌گه‌یه‌نین، ده‌چنه گه‌ڕێكی دیكه‌ی ده‌نگدان یاخوود دانیشتنه‌كه كۆتایی پێ ده‌هێنین.
رۆژی 14ـی تشرینی دووەمی 2023، دادگای فیدراڵی بڕیاری کۆتاییهێنان بە ئەندامێتی هەر یەکە لە محەممەد حەلبووسی و لەیس دلێمی لە پەرلەمانی عێراق هێنا و بەمەش راستەخۆ حەلبووسی لە پۆستی سەرۆکی پەرلەمانی عێراق دوورخرایەوە، ئەمەش بەهۆی ئەو کێشانەی لەگەڵ ئەو پەرلەمانتارە لەماوەی رابردوو لە نێوانیان روویاندا.
لە یەکەم کاردانەوەشیدا، حەلبووسی لەمیانی دانیشتنی پەرلەماندا، سەرسوڕمانی خۆی بە بڕیارەکەی دادگای فیدراڵی نیشاندا و رایگەیاند، هەندێک لایەن هەوڵی لێکترازانی پێکهاتە کۆمەڵایەتییەکانی عێراق دەدەن.