گوته‌بێژی سه‌رۆكایه‌تی هه‌رێمی كوردستان ئه‌مڕۆ پێنجشه‌م به فه‌رمی واده‌ی به‌ڕێوه‌چوونی هه‌ڵبژاردنی په‌رله‌مانی كوردستانی دیاری كرد.
دلشاد شه‌هاب گوته‌بێژی سه‌رۆكایه‌تی هه‌رێمی كوردستان ئه‌مڕۆ پێنجشه‌م و كه‌مێك پێش ئێستا له كۆنگره‌یه‌كی رۆژنامه‌وانیدا ڕایگه‌یاند: نێچیرڤان بارزانی سەرۆکی هەرێمی کوردستان لە مەرسوومێکدا رۆژی 25ـی شوباتی 2024ی وەک رۆژی ئەنجامدانی هەڵبژاردنی پەرلەمانی کوردستان دیاری كرد.
دلشاد شه‌هاب ئاماژه‌ی به‌وه‌ش دا كه سه‌رۆكی هه‌رێم سەرجەم حزب و لایەنەکانی راسپاردووە بۆ ئەنجامدانی رێکارە پێویستەکان سه‌باره‌ت به به‌ڕێوه‌چوونی هەڵبژاردنی پەرلەمانی کوردستان.
گوته‌بێژی سه‌رۆكایه‌تی هه‌رێمی كوردستان ڕاشیگه‌یاند: سه‌باره‌ت به دیاریكردنی رۆژه‌كه، سه‌رجه‌م حزب و لایه‌نه سیاسییه‌كانی هه‌رێمی ڕازین كه هه‌ڵبژاردنی په‌رله‌مانی كوردستان له رۆژی 25ی شوباتی 2024 به‌ڕێوه بچێت.
هه‌روه‌ها ڕایگه‌یاند: هه‌ڵبژاردنی ئه‌نجوومه‌نی نوێنه‌رانی عێراق له مانگی 12 به‌ڕێوه ده‌چێت، له ڕێكه‌وتی 7/1/2024یش به فه‌رمی واده‌ی یاسایی كۆمیسیۆنی باڵای سه‌ربه‌خۆی هه‌ڵبژاردنه‌كانی عێراق كۆتایی دێت، بۆیه پێده‌چێت ماوه‌ی كاركردنی كۆمیسیۆنی عێراق درێژ بكرێته‌وه تا بتوانێت هه‌ڵبژاردنی په‌رله‌مانی كوردستانیش ئه‌نجام بدات.