مەحمود محەمەد به بۆنه‌ی سه‌ركه‌وتنی كۆنگره‌ی 14 په‌یامێكی بڵاو كرده‌وه
ئەم کاتەتان باش هەڤاڵانی بەڕێز
بەبۆنەی سەرکەوتنی کۆنگرەی ١٤ـی پارتیمان (پارتی دیموکراتی کوردستان) خۆشحاڵی خۆم دەردەبڕم و، ئومێد دەکەم پڕۆگرام و پەیڕەو و، بڕیار و راسپاردەکانی کۆنگرەکەمان لە زوترین کاتدا کاریگەرییە ئەرێنیەکانیان لەسەر پارتیمان و دنیا بینی هەڤاڵان دەربکەوێت و، هەنگاوەکانی داهاتوشمان بەهەمان ئاراستەی خزمەت و پابەندی بە رێبازی پیرۆزی بارزانی بن.
لەم بۆنەیەدا سوپاس و پێزانینی خۆم ئاراستەی سەرجەم هەڤاڵانی پارتیمان بەگشتی و ئەندامانی کۆنگرەی چواردە بەتایبەتی دەکەم کە خەمخۆر و خۆشحاڵی سەرکەوتنمان بوون، ماندوبوون و دڵسۆزی و وەفاداری ئێوەی بەڕێز سەرمایەیەکی بەنرخی هەموو قۆناغەکانی خەباتی کوردایەتی و پارتایەتیمە.
پیرۆزبایی لە جەنابی سەرۆک و بەڕێزان جێگرانی سەرۆکی پارتیمان و سەرجەم هەڤاڵانی هەڵبژێردراو بۆ کۆمیتەی ناوەندی دەکەم و، بۆ ئەو هەڤاڵانەش کە لە هەڵبژاردن دەرفەتی دەرچونیان نەبوو گیانی بەرزی کادیرانە و پارتیانەیان جێگای سوپاس و پیرۆزباییە کە بوونە بەشێکی دیاری سەرخستنی کۆنگرە و نیشاندانی رووی گەشی کادیرانی پارتیمان.
لە کۆتاییدا بەڵێنی بەردەوامی و پابەندیم بە باوەڕی نەگۆڕی کوردایەتی و پارتایەتی و رێبازی پیرۆزی بارزانی دووپات دەکەمەوە، متمانە و باوەڕی جەنابی سەرۆک مەسعود بارزانی و ئەندامانی کۆنگرە بۆ ئێمە هەمیشە هاندەری زیاترمان بووە و دەبێ بۆ خزمەتکردن و ماندونەبوون لە سەرخستنی رێبازەکەمان و پاراستنی پیرۆزیەکانمان.
مەحمود محەمەد
٨ـی ١١ـی ٢٠٢٢