ئه‌مڕۆ پێنجشه‌ممه 2022/5/26 به‌ڕێز نێچیرڤان بارزانی، سه‌رۆکی هه‌رێمی کوردستان، به‌شداری له ڕێوڕه‌سمی ده‌رچوونی خولی (27)ى کۆلێژی سه‌ربازیی دوودا له زاخۆ کرد. له‌م خوله‌دا (499) ده‌رچووى پێشمه‌رگه له هه‌موو ناوچه‌كانى هه‌رێمى كوردستانه‌وه مه‌شق و ڕاهێنان و خوێندنى ئه‌كاديمييان ته‌واو كردووه و به پله‌ى ئه‌فسه‌ر له ڕيزه‌كانى پێشمه‌رگه‌دا ده‌ست به خزمه‌ت ده‌كه‌ن.
كۆلێژى سه‌ربازيى دوو له زاخۆ كه به ئه‌كاديمياى سه‌ربازيى زاخۆ ده‌ناسرێت، ساڵى 1996 دامه‌زراوه و سه‌ر به وه‌زاره‌تى به‌رگريى عيراقه. يه‌كێك له باشترين كۆلێژه سه‌ربازييه‌كانه و چه‌ندين جار له‌سه‌ر ئاستى عيراق پله‌ى يه‌كه‌مى به ده‌ست هێناوه.
له ڕێوڕه‌سمه‌که‌دا که ژماره‌یه‌ک له به‌رپرسانی باڵای حکوومی و حزبی و سه‌ربازی ئاماده بوون، سه‌رۆک نێچیرڤان بارزانی وته‌یه‌کی پێشکه‌ش کرد. تيايدا وێڕاى پيرۆزبايى و ده‌ستخۆشى له ده‌رچووان و مامۆستايان و ڕاهێنه‌ران، جه‌ختى له گرنگى و پێويستيى يه‌كخستنه‌وه‌ى پێشمه‌رگه كرده‌وه و داواى كرد پارتى ديموكراتى كوردستان و يه‌كێتيى نيشتمانيى كوردستان بۆ ئه‌مه مه‌به‌سته هاوكارى بكه‌ن و ده‌ستێوه‌ردان له كاروبارى پێشمه‌رگه‌دا بوه‌ستێنن.
هه‌ر ده‌رباره‌ى پرۆسه‌ى يه‌كخستنه‌وه‌ى پێشمه‌رگه، باسى له‌و هه‌نگاوانه كرد كه تا ئێستا نراوان و ژماره‌يه‌ك له هێزه‌كانى پێشمه‌رگه يه‌ك خراونه‌ته‌وه، به‌ڵام جه‌ختى له‌وه كرده‌وه كه ئه‌وه به‌س نييه و خه‌ڵكى كوردستان و دۆستانى هه‌رێمى كوردستان له كۆمه‌ڵگه‌ى نێوده‌وڵه‌تى، چاويان له‌وه‌يه پرۆسه‌كه باشتر به‌ڕێوه بچێت.
به‌ڕێزيان ئاماژه‌ى به به‌ردوه‌اميى مه‌ترسييه‌كانى داعش و پێويستيى هاريكارى و هه‌ماهه‌نگيى زياترى نێوان پێشمه‌رگه و سوپاى عيراق كرد، به‌تايبه‌تيش له ناوچه‌كانى سنوورى ماده‌ى 140ى ده‌ستوور كه بۆشاييى ئه‌منى تێدا هه‌يه و تيرۆرستان سوودى لێ ده‌بينن. هه‌روه‌ها ئاماژه‌ى به ڕۆڵى پێشمه‌رگه له تێكشكاندنى داعشدا كرد.
له به‌شێكى ديكه‌ى وته‌كه‌يدا سه‌رۆك نێچيرڤان بارزانى، باسى له گرنگيى گفتوگۆ و لێكگه‌يشتنى نێوان لايه‌نه كوردستانييه‌كان كرد و له‌مباره‌وه ئاماژه‌ى به كۆبوونه‌وه‌ى دوێنێى پارتى ديموكراتى كوردستان و يه‌كێتيى نيشتمانيى كوردستان كرد و به كۆبوونه‌وه‌يه‌كى باشى له قه‌ڵه‌م دا، هه‌روه‌ها هيواى خواست ديدار و كۆبوونه‌وه‌ى زياتر بۆ يه‌كڕيزى و ته‌بايى له‌نێوان لايه‌نه سياسييه‌كاندا ئه‌نجام بدرێن و گوتى: زه‌مينه‌يه‌كى باش بۆ نه‌هێشتنى ناكۆكييه‌كان هه‌يه.
دۆخى عيراق و چه‌قبه‌ستوويى و بنه‌به‌ستى سياسى له وڵات، ته‌وه‌رێكى ديكه‌ى وته‌ى به‌ڕێز سه‌رۆكى هه‌رێمى كوردستان بوو. تيايدا باسى له كاريگه‌رييه‌كانى دۆخه‌كه به‌سه‌ر ژيان و گوزرانى خه‌ڵك و دۆخى هه‌رێمى كوردستانه‌وه كرد و جه‌ختى له پێويستيى هاريكاريى نێوان هه‌موو لايه‌نه عيراقييه‌كان كرد بۆ تێپه‌ڕاندنى سه‌ختييه‌كان و چاره‌سه‌ركردنى كێشه‌كان.
له دوا به‌شى وتاره‌كه‌يدا سه‌رۆك نێچيرڤان بارزانى، وێڕاى دووپاتكردنه‌وه‌ى ئاماده‌يى و جددييه‌تى حكوومه‌تى هه‌رێمى كوردستان بۆ چاره‌سه‌ركردنى كێشه‌كان له‌گه‌ل به‌غدا له‌سه‌ر بنه‌ماى ده‌ستوورى عيراق، داواى له حكوومه‌تى فيدرالى و دامه‌زراوه عێراقييه‌كان كرد ئه‌گه‌ر هاووڵاتييانى هه‌رێمى كوردستان به هاووڵاتيى عێراق ده‌بينن، كۆتايى به فشاره‌كانى سه‌ر هه‌رێمى كوردستان بهێنن.
ئه‌مه ده‌قى وته‌كه‌يه:
ئاماده‌بوويێن ڕێزدار،
پێشمه‌رگێن قه‌هره‌مان،
فه‌رماندار و مامۆستا و ڕاهێنه‌رێن ڕێزدار،
ده‌رچوويێن خۆشتڤى يێن خولا (27)ێ يا بنەڕەتی ل کۆلیژا سەربازی يا دو ل زاخۆ،
كه‌سوكارێن ڤان عه‌زيزا،
هه‌مى لايه‌ك ب خێر بێن، سه‌ر چاڤا
بخێرهاتنا نێرده‌يێن ولاتێن هه‌ڤپه‌يمان دكه‌م ئه‌وێن كو د شه‌ڕێ داعشێدا هاريكاريا مه كرى. هاريكاريا وان به‌رز دنرخينين و بخێرهاتنا وان دكه‌ين. بخێرهاتنا نێردێن ديپلۆماسى يێن ولاتێن بيانى دكه‌ين ل هه‌ولێرێ. هه‌مى لايه‌ك ب خێر بێن، سه‌ر چاڤا.
خۆشحالم کو ئەڤرۆ ل ڤێرەمە ل زاخۆ دگەل هەوەیێن ڕێزدار، داكو ئەم هەمی ژ دل و پێکڤە پیرۆزباهیێ ل ئێك ب ئێكى وان (٤٩٩) دەرچوویێن خولا (٢٧)ێ بنەڕەتی یا کۆلیژا سەربازی يا دو ل زاخۆ بکەین.
پیرۆزباهیێ ل هەوەیێن خۆشتڤی و دایکوباب و کەسوکارێن هەوە دکەم بۆ ڤێ سه‌ركه‌فتنێ، ته‌مه‌ندرێژ بن، سه‌ركه‌فتى بن بۆ خزمه‌تكرنا ولاتێ خۆ. من دڤێت لێره سه‌ره‌ڕاى پيرۆزباهيێ ل وه هه‌ميا، پیرۆزباهییەکا تایبەت ل ئه‌فسه‌ر (ئیلداد ئەبریم یلدەخانی) بکەم، کو تاکە قوتابی و دەرچوویێ مەسیحییە دڤێ خولێدا.
هیڤیدارم خولێن داهاتی هژمارەکا زۆر مەسیحی، تورکمان و هژمارەکا زۆر خوشک و برایێن ئێزدی ژی به‌شدار بن. گەلەك دلخۆش بووم کو ل کۆلیژا سەربازی يا سێ ل قەلاچۆڵان من هژمارەکا دەرچوویێن ئافرەت دیتن. به‌رى نها ژى لێره ئافره‌ت ل ڤان خولێن كو ل زاخۆ هاتينه كرن، ده‌رچووينه. هیڤیدارین د خولێن داهاتيدا، هژماره‌كا زێده‌تر و به‌رچاڤتر ل ڤانه ببينين. خۆشحالم کو ئەڤرۆ دبینم دەرچوویێن ڤێ خولێ خەلکێ هەرچار پارێزگەهێن هەرێما کوردستانێ و ده‌رڤه‌ى هه‌رێمێنه.
بەشدارییا خەلکێ هەمی ده‌ڤه‌را دڤا خولادا و پێکڤەبوونا وان د يه‌ك جهدا، هاریکارييە بۆ یەکخستن و یەکبوونا هێزا پێشمەرگەیێ کوردستانێ. دەستخۆشییەکا تایبەت ل ڕاگرێ کۆلیژا سەربازی يا دو ل زاخۆ دکەم، هەروەسا دەستخۆشیێ ل هەمی وان مامۆستا و ڕاهێنەرێن سەربازی دکەم کو ب درێژاهییا ڤێ خولێ قوتابی فێری زانست و تەکنیکێن سەربازی کرینە و ڕوحا بلندا پێشمەرگانە فێری قوتابیا كرينه دڤێ خولێدا.
سوپاسییا کارێ بەردەوامێ وەزارەتا پێشمەرگەى دکەم بۆ سەرکەفتنا ڤێ خولێ، هەروەسا سوپاسییا هاریکارییا وەزارەتا بەرگرییا عێراقێ دکەم. جهێ دلخۆشیێ یە کو کۆلیژا سەربازی يا دو ل زاخۆ، د ئاستەکێ هەرە بلندايه ل عێراقێ و ژ دەمێ دامەزراندنا وێ ل ساڵا ١٩٩٦ و تا نها (٥٦) خولێن بنەڕەتی و ئەفسەرا ژ ڤێ کۆلیژێ دەرچووينە.
دامەزراندن و پێشئێخستنا کارێ کۆلیژا سەربازییا زاخۆ، هەردەم ژ ڕۆژا دامه‌زراندنێڤه جهێ بايه‌خا تایبەتى يا سەرۆک بارزانی بوویە. ئەم ب ناڤێ خۆ و هەوە هەمیا، سپاسییا جەنابێ وى دکەین. هه‌روه‌سا دڤێ ده‌ليڤێدا (60) سالييا پێشمه‌رگاتيا سه‌رۆك بارزانى و خزمه‌تا جه‌نابێ وى بۆ دۆزا ڕه‌ويا كوردستانێ، پيرۆز دنرخينين.
پێشمەرگەیێن قارەمان و خەلکێ خۆشتڤیێ کوردستانێ..
ئەڤرۆ ٢٦ی گوڵانێیە و بیرهاتنەکا پیرۆزه د دیرۆکا شۆڕەشدا، شۆڕشگێڕى و به‌رخودانا كوردستانێيه. ٢٦ی گوڵانێ بیرئینانا خۆڕاگری و سەرهلدانەڤا خەباتا پێشمەرگایەتیێیە ل کوردستانێ د ڕۆژەکا گەلەك دژواردا. کەسێن كو وی دەمی گۆتینە دوژمنا، پێشمەرگە مایە و کوردستان دێ هەر مینیت، ئه‌ڤرۆ پشتى ڤان هه‌مى سالا، ديسا ب ڕێز و پێزانينڤه بيرئانينا وان خه‌باتكه‌را، وان دلسۆزا، وان پێشمه‌رگێن قه‌هره‌ڤان دكه‌ين.
سڵاڤ ل هەمی وان قه‌هرەمانێن ڕۆژێن شۆڕەش و خەباتا پێشمەرگایەتیێ دەستپێکری. سڵاڤ ل گیانێ پاک و پیرۆزێ وان قه‌هره‌مانان بيت گیانێ خۆ کریە فيدا، كريه قوربانى ژبۆ مانا کوردستانێ و نەهێلانا دیکتاتۆریه‌تێ و بدەسڤەئینانا ئازادیێ بۆ گەلێ کوردستانێ و هەمی عێراقێ. سڵاڤ ل بیرەوەرییا هەردوو شۆڕەشێن ٢٦ی گوڵانێ و شۆڕەشا نوى كو بۆ ئازاديێ و خه‌باتێ و به‌رخودانێ و ڕزگاركرنا ملله‌تێ مه ده‌ست پێكر و خه‌بات بۆ كر.
گەلەك خۆشحالم کو دڤێ ده‌ليڤێدا لێرەمە، ل زاخۆ، زاخۆیا خۆڕاگر، زاخۆيا شۆڕەشگێڕ. زاخۆ و زاخۆییا، ڕۆلەکێ زۆر کاریگەر و سەرەکی د شۆڕەشا گولانێدا گێڕا، شۆڕەشا گوڵانێ ژی ل ڤێ ده‌ڤه‌رێ دەستپێک و بناغێ سەرکەفتنێ دانا. زاخۆ ژبەرکو ناڤەندەکا سەرەکییا خەباتا پێشمەرگەی بوویە، لەوما ئەڤ کۆلیژە ژی ل ڤێرێ هاتە دامەزراندن.
ئامادەبوویێن بەڕێز..
هێزا پێشمەرگەیێ کوردستانێ، هێزا پارێزەرا کوردستانێ یە و بەشەکە ژ سیستەمێ بەرگرییێ عێراقێ. لێ لسەردەمێ شەڕێ داعش وەک هێزەکا سەرەکییا بەرهنگاربوونا داعش، بوو بەشێک ژ هەڤپەیمانییەکا نێڤدەولەتی بۆ تێکشکاندن و ژناڤبرنا داعشێ و پاراستنا ئارامییا ده‌ڤه‌رێ و ئازادیێ و ئاراميێ ل جیهانێ.
مخابن داعش هێشتا مایە و، هێرشێن وێ زێدە دبن ل هنده‌ك ده‌ڤه‌را، بتایبەتی ژی ل ده‌ڤه‌رێن ناکۆکی لسەر. ڕۆژانە ئەڤ هێرشێن داعش دبنە سەبەبێ شەهیدبوونا خەلکێ ڤان ده‌ڤه‌را و پێشمەرگە و حەشد و سەربازێن سوپایێ عێراقێ. ده‌ڤه‌رێن ناکۆکی لسەر، بووینە بنگەهـ و کۆریدۆرێ تیرۆریستێن داعش و جهێ خۆڕێکخستنا وان، ئەڤە ژی گەفه و مەترسییەکا گەلەك مەزنە بۆ سەر هەرێما کوردستانێ و هەمی عێراقێ، هەروەسا مەترسییە بۆ سەر هه‌مى جیهانێ ژی.
زێدەبوونا هێرشێن داعشێ و گەفێن وێ یێن ڕۆژانە لسەر ژیانا گوند و شارۆچکەیێن ده‌ڤه‌رێن ناکۆکی لسەر، ب دیتنا مە پێویستی ب پێکەڤە کارکرنەکا هەمەلایەنە هه‌یە. دڤێت ئەم دڕندەیی و مەترسییا داعشێ کێم نەبینین، چونکى داعشێ کۆمکوژیێن زۆر مەزن بەرامبەر گەلێ مە ئەنجام داینە و چەندین ده‌ڤه‌ر وێران کرینە و بوونە مەترسی بۆ عيراقێ و كوردستانێ و هەمی جیهانێ.
نوکە ژی داعش خودانا هەمان فکر و ئاراستەیا کوشتن و وێرانکرنێ یە. لەوما زێدە كارکرنا پێكڤه يا پێشمەرگە و سوپايێ عێراقێ و، دەستبکاربوونا بلەز و دەمودەست یا هەردوو لیوایێن هەڤبەشێن سوپا و پێشمەرگەی، زۆر پێویستە ل وان ده‌ڤه‌را.
دڤی باردۆخیدا دابینکرنا پێداویستیێن پێشمەرگەی، پێشخستنا مەشق و ڕاهێنانا پێشمەرگەی، پێویستییەکا زۆر گرنگە بۆ بەرهنگاربوونا داعش. پێشمەرگه‌ى پێدڤى ب هەمی پێداویستی و تەکنەلۆژیا پێشکەفتی یا سەربازی هەیە.
پێشمەرگە هەتا نۆکە ب چەکێ گەلەك سادە، لێ ب فیداکارییەکا مەزن و خوينا خۆ قه‌هرەمانییەکا زۆر نیشاندایە و گەلەك داستانێن مه‌زن د به‌رخودانێدا تۆمار كرينه. نۆکە پشتەڤانیکرنا پێشمەرگەی ژلایێ حکوومەتا فیدرالییا عێراقێ و هەڤپەیمانانڤە، زۆر پێویستە، نها گه‌له‌ك پێويستتره ژ جارا. داخوازێ ژ حکوومەتا فيدرالييا عێراقێ و هەڤپەیمانا دکەم پتر هاریکارییا پێشمەرگەی بکەن ب مەشق و ئامێر و چەکێن پێشکەفتی و ڕاهێنانێ.
ئامادەبوویێن خۆشتڤی و لایەنێن سیاسی يێن كوردستانێ..
ناڤودەنگ و ڕێزا پێشمەرگەی ئەڤرۆ ل جیهانێ ژ هەمی دەمەکی زێده‌تره. بەشدارییا پێشمەرگەی د پاراستنا هەمی پێکهاتەیاندا ژ هەر دەمەکی دیارترە، كو ئه‌ڤه ئه‌و خاله يا كو ئه‌م هه‌مى گاڤا پێ سه‌رفراز و سه‌ربلندين. لێ مانا دەستێوەردانا حزبی د کاروبارێن پێشمەرگەیدا، ڕێگرە ل پێشکەفتنا هێزا پێشمەرگەیێ کوردستانێ.
هەروەسا هەبوونا دەستێوەردانا حزبی وەدکەت بەردەوام مەترسییا وێ چەندێ هەبیت کو پێشمەرگەى بکەنە بەشەك ژ ناکۆکیێن سیاسی یێن حزبان ل هەرێما کوردستانێ، ئەڤە ژی گەفه‌كا زۆر جددييه لسەر پرۆسەیا دیموکراسی و بڕێڤەبرن و یەکێتییا هەرێما کوردستانێ.
ژبەر ڤێ چەندێ جارەکا دی ل ڤێرێ وەک داخوازییەکا خەلکێ کوردستانێ، وەک پێویستییەکا نیشتمانی، وەک ئەرکێ خۆ یێ یاسایی، داخوازێ ژ پارتی دیموکراتی کوردستان و یەکێتيی نیشتمانيی کوردستان دکەم دەستێوەردانا حزبی د کاروبارێن پێشمەرگەیدا ڕابگرن و بێی پەشێمانبوون و بێ دودلى، ڤێ ده‌ستێوه‌ردانێ ب دويماهی بینن.
هەتا نۆکە هەردوو هێزێن پشتەڤانی يێن (1) و (2)، هەروەسا (٢٢) لیوایێن هێزێن (70) و (80) کەفتینە سەر وەزارەتا پێشمەرگەی، ئەڤە پێنگاڤەکا گرنگە. به‌لێ ئه‌ڤه به‌س نییە و دڤێت هەمی هێزا پێشمەرگەی ببیتە ئێك و هەڤدەم هەمی دەرگەهێن دەستێوەردانا حیزبی ژی بهێنە گرتن.
سەرۆکاتییا هەرێما کوردستانێ، وەک فەرماندەیا گشتی یا هێزا پێشمەرگەی، هەمی هەولا ددەت و ب تەمامی پشتەڤانیێ ل کارێ وەزارەتا پێشمەرگەی ژی دکەت بۆ یەکخستنا پێشمەرگەی. لێ ژبۆ ڤێ سەرکەفتنێ، دڤێت دويماهیئینان ب دەستێوەردانا هه‌مى لايه‌كى، بتايبه‌تى پارتی و یەکێتيڤه هه‌بيت و ئه‌م ژڤێ قۆناغێ ده‌رباس ببين و هێزێن پێشمه‌رگێ كوردستانێ ببنه ئێك بۆ وێ سويندا وان خارى كو دێ هه‌رتم به‌ره‌ڤانيێ ل كوردستانييا و ل كوردستانێ كه‌ن.
ئەڤە چەند ساڵە وەڵاتێن هەڤپەیمان پلان هه‌يه بۆ ئێکخستنا پێشمەرگەی و ب سپاسيڤه لسەر ڤێ چه‌ندێ كاردکەن، ئەڤە دەرفەت و پشتەڤانییەکا زۆرا مەزنە بۆ پێشمەرگە و گەلێ کوردستانێ. خەلك داخوازا ئێکخستنا هێزا پێشمەرگەیێ کوردستانێ دکەت، نۆکە ئەم دشێین ڤێ پرۆسەیێ ب هاریکارییا هەڤپەیمانا سەربێخین. خه‌لكێ كوردستانێ داخوازا ئێكبوونا هێزا پێشمه‌رگه‌ى دكه‌ت، لەوما داخازێ ژ پەرلەمانێ کوردستانێ ژى دکەم وەک نوینەرێ خەلکی، ب هویری چاڤدێرییا پرۆسەیا ئێكبوونا هێزا پێشمه‌رگه‌ى بکەت.
پێشمەرگە دەمێ دروستبووی، بۆ گەلێ کوردستانێ و بۆ پاراستنا کوردستانيا دروست بوو، نە بۆ حزب و پاراستنا حزبا. ئەڤە دەرفەتەکا زێڕینە کو هێزا پێشمەرگەی ب تەمامی ببیتە هێزەکا سەربەخۆ یا دوير ژ دەستێوەردانێ.
خەلکێ خۆشتڤیێ کوردستانێ..
ناکۆکیێن ناڤبەرا حزبا ل هەرێما کوردستانێ هوين ماندی کرینە، زیان گەهاندییە بازاڕ و کەسابەتا هەوە و ڕێ ڤەکرییە بۆ مەترسی و فشارێن زێدەتر لسەر هەرێما کوردستانێ. ئەرکێ مەیە بەرامبەری هەوە وەک سەرۆکاتییا هەرێما کوردستانێ کو هەوڵا کۆمکرن و تفاقا ناڤبەرا حزبا بدەین لسەر پرسێن نیشتمانی.
هیڤیدارین د دەمەکێ نێزیکدا گفتوگۆ و ڕێککەفتنا هەمی حزبا ب کریار لسەر ئارمانج و پرسێن سیاسی یێن نیشتمانی ببینین. دەما کۆمبوونێن مە ل سلێمانیێ، مە ئامادەییەکا زۆر باش ژ هەمی لایەنا دیت بۆ پێکڤەڕوينشتن و نەهێلانا ناکۆکییا. نۆکە زەمینە یا گونجاو بۆ گفتوگۆ و ڕێککەفتنا هه‌يه.
دوهى كۆبوونه‌كا باش د ناڤبه‌را يه‌كێتيى نيشتمانيى كوردستان و پارتى ديموكراتى كوردستاندا بڕێڤه چوو، ب پشته‌ڤانيا خودێ دڤی ماوەیدا دێ زنجیرەکا کۆمبوونێن دى بینن. ب هيڤيا هندێ كو بگه‌هينه ڕێككه‌فتنه‌كا باش و ئاراميێ و سه‌قامگيريێ و خۆشگوزه‌رانيێ بۆ ملله‌تێ خۆ دابين بكه‌ين. گەلەك پێویستە تاک ب تاکێن گەلێ کوردستانێ ژی پشتەڤانییا ڤێ ئاراستەیێ بکەن و ئەز هەوە پشتڕاست دکەم کو هیچ کێشەیەک نینە ل هەرێما کوردستانێ كو ئەم نەشێین ب پێکڤەڕوينشتنێ چارەسەر بکەین.
ئاڵۆزی و نەسەقامگیری ل هەر ده‌ڤه‌ره‌كا عێراقێ، کاريگه‌رى لسه‌ر ڕەوشا هەمی ده‌ڤه‌رێت دی یێن عێراقێ هه‌يه. بەرژەوەندی و سەروەرییا مە وەک عێراقی ل هەمی ده‌ڤه‌را هەڤبەش و یەکە. ئەم هەمی و ئەڤ پێشمەرگەیێن ئەڤرۆ ژ ڤێ خولێ دەرچووين و سويند خوارى، تەماشەی سەقامگیری و سەروەریيا كوردستانێ و عێراقێ ڤێكرا دكه‌ين.
ناکۆکیێن ناڤبەرا لایەنێن سیاسی ل بەغدا کاریگەرییه‌كا خراب ل هەمی عێراقێ و هه‌رێما كوردستانێ ژى کرییە. ناکۆکیێن ناڤبەرا حزبا ل هەرێما کوردستانێ ژی کێشەیێن زێدەتر بۆ پرۆسەیا سیاسی ل عێراقێ چێكريه. هەمی هەوڵێن ڕێککەفتنا سیاسی ل بەغدا و هەولێرێ تەمامکەرێن ئێکن.
نەهێلانا ناکۆکیێن ناڤبەرا حزبا ل هەرێما کوردستانێ، بەشەکێ تەمامکەره ژ نەهێلانا چەقبەستنا سیاسی یا ناڤبەرا لایەنێن سیاسیێن هەمی عێراقێ، لەوما دڤێت ئەم هەمی هاریکارێن ئێکودو بین ژبۆ دەربازکرنا ڤێ چەقبەستنا سیاسی.
گرانیێ، ئه‌ڤرۆ ژیانا هەمی خەلکێ جیهانێ زەحمەت کرییە. هەبوونا ناکۆکیێن سیاسی و چەقبەستنا سیاسی ل عێراقێ، وەسا کرییە كو خەلکێ عێراقێ زۆرتر بکەڤیتە بن ڤی بارێ گران. لەوما پێویستە هه‌مى هێزێن عێراقى نەرمییەکا زێدەتر بەرامبەر ئێکودو نیشان بدەین، دا ڤەکرنەکا تەمام د پرۆسەیا سیاسییا عێراقێدا دروست ببيت.
ئەم هەمی عێراقینە و بەشەکین ژ عێراقێ، لەوما ژی دڤێت ئەم هەمی ب ڤێ ڕوحێ بەرەف چارەسەرییا کێشەیان بچین ل عێراقێ. دڤێت ئه‌م هه‌مى ڤێكڕا ڕوينين و چاره‌سه‌را هه‌ڤپشك ڤه‌بينين و شكاندن و ئێكودوقه‌بوونه‌كرن دڤێت بدويماهى بێت.
ل ڤێرێ من دڤێت د هه‌مان ده‌مێدا داخوازێ ژ حکوومەتا فیدرالییا عێراقێ و هەمی دەسەڵات و دامەزراوەیێن فیدرالی ل عيراقێ كو بکەم، کو ب چاڤێ تەمامکەر و هەڤبەش به‌رێ خۆ بده‌نه هەرێما کوردستانێ بکەن. چونکی ئەم هەمی ئێکین و، سەرکەفتن و شکەستنێن مە ژی هەڤبەشن.
پاراستن و بەرژەوەندی و پێکڤەژیانا مه ل هه‌مى ده‌ڤه‌رێن عيراقێ وه‌ك ئێكه و ئەرکێ حکوومەت و دامەزراوەیێن فیدرالى یێن عێراقێ یە ب پلەیا ئێکەم. خەلکێ عێراقێ پێویستی ب ئارامی و پێشکەفتنێ یە و ب هیچ شێوەیەکی حەژ کێشەیێن زێدەتر ناکەت. ژبەرهندێ چێنابیت به‌غدا باوه‌ريا وێ ئه‌و بيت كو بێدەسهەلاتکرنا هەرێما کوردستانێ كرداره‌كێ باشه.
ئه‌ز لێره داخوازێ ژ به‌غدا دكه‌م، ئه‌گه‌ر ب جددى به‌غدا هه‌رێما كوردستانێ وه‌كى به‌شه‌ك ژ عيراقێ دبينيت، ئه‌گه‌ر به‌غدا هه‌ڤوه‌لاتيێن هه‌رێما كوردستانێ وه‌كى به‌شه‌ك ژ هه‌ڤوه‌لاتيێن عێراقێ دبينيت، دڤێت ب زويترين ده‌م كێشه‌يێن كو دناڤبه‌را هه‌رێما كوردستانێ و به‌غدادا هه‌نه، چاره‌سه‌ر بكه‌ت. نابيت و دروست نيه هه‌ڤوه‌لاتيێن هه‌رێما كوردستانێ وه‌كى به‌شه‌ك ژ عێراقێ هه‌ر هه‌يڤ د دله‌ڕاو‌كێدا بن كا ئايا بودجه دێ ژ عيراقێ بۆ هێت يان نه؟!
ئاخفتنا من بۆ ده‌سه‌لاتدارێت عێراقێ ئه‌وه ڤێ مه‌سه‌لێ بدويماهى بينن. ئه‌گه‌ر وه دڤێت و هوين دبينن هه‌ڤوه‌لاتى يێن هه‌رێما كوردستانێ به‌شه‌كن ژ عێراقێ، دڤێت دويماهيێ ب ڤێ فشارێ بينن يا كو ڤێ گاڤێ هند ل به‌غدا تێته سه‌ر هه‌رێما كوردستانێ. ئه‌ز باوه‌ر دكه‌م مه ڤێكڕا ده‌رفه‌تا هه‌ى كو هه‌مى ئاريشه و كێشه‌يان ل سه‌ر مێزا گفتوگۆيا دگه‌ل به‌غدا چاره‌سه‌ر بكه‌ين. مه جددييه‌ت دڤێت، حكوومه‌تا هه‌رێما كوردستانێ يا جددييه ڤا ئارێشا ل سه‌ر مێزا گفتوگۆيێ و ل سه‌ر بنگه‌هێ ده‌ستوورێ عێراقێ چاره‌سه‌ر بكه‌ت.
حه‌ژێكرنا باژێڕێن عيراقێ، حه‌ژێكرنه بۆ هه‌رێما كوردستانێ. خه‌لكێ مويسل، به‌غدا، به‌سرا، ئه‌نبار، كه‌ركووك، هه‌ولێرێ و سلێمانيێ، ئێكودو دڤێت. خه‌لكى چ ئارێشه دگه‌ل ئێكودو نينه. خه‌لكى پێنه‌خۆشه و حه‌ز ناكه‌ن ئه‌ڤه يا به‌رده‌وام بيت. هيڤيا من ئه‌وه دويماهيێ ب ڤێ مه‌سه‌لێ بينن و ديسا ب زويترين ده‌م كێشه و ئارێشه‌يێن ناڤبه‌را هه‌رێما كوردستانێ و به‌غدا ب ديالۆگ و ل سه‌ر مێزا گفتوگۆيێ چاره‌سه‌ر ببن.
جاره‌كا دى پيرۆزباهيێ ل هه‌وه هه‌ميا دكه‌م، هيڤيا من ئه‌وه سه‌ركه‌فتى بن بۆ خزمه‌تا كوردستانييا، ته‌مه‌ندرێژ بن، وه‌فادار بن بۆ وێ سويندا كو وه خوارى بۆ به‌ڕه‌ڤانيێ ل خاكا پيرۆزا كوردستانێ و هوين هه‌مى لايه‌ك ب خێر بێن سه‌ر چاڤا.
زۆر سپاس.