سەرۆکی حکوومەتی هەرێم و جێگری یاریدەدەری وەزیری دەرەوەی ئەمریکا کۆبوونەوە
ئەمڕۆ چوارشەممە 13ی نیسانی 2022 مەسرور بارزانی، سەرۆکی حکوومەتی هەرێمی کوردستان پێشوازیی لە جۆوی هوود، جێگری یاریدەدەری وەزیری دەرەوەی ئەمریکا کرد.
لە کۆبوونەوەکەدا، گفتوگۆیان دەربارەی بارودۆخی گشتیی و پرۆسەی سیاسی لە عێراق و هەوڵەکانی پێکهێنانی کابینەی نوێ و پەرەپێدانی پەیوەندییەکانی هەرێمی کوردستان و ویلایەتە یەکگرتووەکانی ئەمریکا کرد.
جێگری یاریدەدەری وەزیری دەرەوەی ئەمەریکا، ئاماژەی بەوەدا کە هەرێمی کوردستان، هاوبەشێکی گرنگی ئەمەریکایە لە ناوچەکەدا و وڵاتەکەی، بەردەوام دەبێت لە پشتگیریکردنی هەرێمی کوردستان لە چوارچێوەی عێراقێکی فیدراڵدا.
لای خۆیەوە سەرۆکی حکوومەت دووپاتی کردەوە کە هەرێمی کوردستان، خوازیاری چارەسەرکردنی بنەڕەتی کێشەکانە لەگەڵ حکوومەتی فیدراڵی لە سەر بنەمای دەستوور و لە ژێر هیچ گوشارێکیشدا، دەستبەرداری مافە دەستوورییەکانمان نابین.
