ئەمڕۆ سێشەممە مەسرور بارزانی سەرۆکی حکوومەتی هەرێمی کوردستان پەیوەندییەکی تەلەفۆنی لە مارگریتس شیناس جێگری سەرۆکی کۆمسیۆنی یەکێتی ئەورووپاوە پێگەیشت و له‌و میانه‌یه‌دا داوای له وڵاتانی یه‌كێتیی ئه‌ورووپا كرد، فریاگوزاری و هاوکاری پێویست بگەیەننە کۆچبەران.
سەرۆکی حکوومەت و جێگری سەرۆکی کۆمسیۆنی یەکێتیی ئەورووپا دۆخی کۆچبەرانی سەرسنووری بێلارووس و پۆڵەندایان تاووتوێ کرد، سەرۆکی حکوومەت داوای کرد، وڵاتانی یەکێتیی ئەورووپا، فریاگوزاری و هاوکاری پێویست بگەیەننە کۆچبەران. هەردوولاش هاوڕابوون لەسەر ئەوەی، بازرگانانی مرۆڤ و تۆڕی نێودەوڵەتی قاچاخچییەکان، کۆچبەران بۆ مەبەستی سیاسی بەکاردەهێنن.
سەرۆکی حکوومەت ئاماژەی بە گەڕانەوەی زیاتر لە 400 کۆچبەر دا، کە بە شێوەیەکی ئارەزوومەندانە گەڕاونەتەوە هەرێمی کوردستان و عێراق، بڕیارە بەم نزیکانەش، چەندین کۆچبەری دیکە بگەڕێنەوە.
سەرۆکی حکوومەت جەختی لە گرنگیی هەبوونی ستراتیجییەکی درێژخایەن لە نێوان عێراق و هەرێمی کوردستان و یەکێتیی ئەورووپا کردەوە، بۆ سنووردانان بۆ کۆچکردنی نایاسایی، هەروەها داواشی لە جێگری سەرۆکی کۆمسیۆنی یەکێتیی ئەورووپا کرد، لە ڕێگەی پەرەپێدانی ئالوگۆڕی بازرگانی و وەبەرهێنانی ئەورووپا و هاوکاری دارایی و تەکنیکی، پشتیوانی لە کارنامەی چاکسازیی حکوومەتی هەرێمی کوردستان بکەن و ئەمەش دەبێتە هۆی زیادبوونی دەرفەتی کار بۆ خەڵکی کوردستان، سەرۆکی حکوومەت، هەروەها دووپاتی کردەوە کە پێویستە کۆمەڵگەی نێودەوڵەتی هاوکاری زیاتر پێشکەشی ئەو ئاوارە و پەنابەرانە بکات کە لە هەرێمی کوردستانن.
لە پەیوەندییەکەدا، هەروەها باس لەو ڕێکارانەش کرا کە لە لایەن حکوومەتی هەرێمی کوردستان و حکوومەتی فیدرالییەوە گیراونەتەبەر سەبارەت بە ڕێگەگرتن لە کۆچکردنی نایاسایی.
سەرۆکی حکوومەت، ئامادەیی هەرێمی کوردستانی دەربڕی بۆ پێشوازیکردن لە تیمێکی تەکنیکی کە لە بروکسلەوە سەردانی هەولێر و بەغدا بکات بۆ گرتنەبەری ڕێکاری پێویست.
هەردوولا هاوڕابوون لە سەر بەردەوامبوونی پەیوەندیی و هەماهەنگیی، بۆ ئەو بابەتانەی جێی بایەخی هەردوولان.