خوسرهو جاف
ڕێكهوتی 27/12/1995ـی زایینی، باران بهخوڕ دەباری؛ لە گەراجی ماڵەوەم تا دەرگای بەژوورەوەچوون ڕێک هەشت مەترە، بارانەكە ڕەهێڵەیەكی وابوو تا ڕۆیشتمە ماڵەوە تەڕتەڕ بووم و خووسام.
نامەیەكی قەبارەداریان دا بە دەستمەوە؛ وتیان ئافرەتێكی كورد هێنابووی، هەرچی خوڵكمان كرد نەڕوا، هەر ڕۆیشت.
– هەروا باران بوو؟
– نەخێر ئەو هات باران نەدەباری..
– باشە نەیوت كێیە و لە كوێوە هاتووە؟
– نەخێر هیچی نەوت، تەنها ئەوە نەبێ وتی پەلەمە دەبێ بڕۆم.
نامەم كردەوە دەست و خەتێكی زەریفی مەرەكەبی ڕێكوپێك و ڕەوان، سەرجەم یانزە لاپەڕەی قەبارەزل نووسراو، بە ناوی (محەمەد ناسحی كوڕی مەلاكەریمی گوێرەك) دوا چمكی نامەكەی واژوو كردبوو بە ئیمزایەكی سەیر، ڕەنگە زۆر كەس وەك من ئەو ئیمزایەی دیبووبێت، بەڵام چزەی داسەكەی و كلكی چەكوشەكەی وەك من سەرنجی ڕانەكێشابێت.
دەستم بە خوێندنەوەی كرد، تا دەمخوێندەوە زیاتر سەرنجی ڕادەكێشام و پێوەی دەپلكام، كەڕەتێك و دووان وەك ڕەخنەگرێك خوێندمەوە، كەوتمە بیری نووسەری نامەكەوە.
ئەو لادێیەی ئەوی تیادا هاتووەتە دنیاوە وەك پێشمەرگەیەك چەندان جار بە ناویدا گوزەراوم، دێیەكی چەند ماڵەی لەبیرچووی جیهان و زەمان، سەرجەم دە دوانزە ماڵ نەدەبوون، هەموو شت قوڕ و خۆڵ بوو، هەر كات بەوێدا تێپەڕبووبێتم كەڵەشێرێك و سێ چوار مریشك بەسەر سڕكەوانەوە چینەیان دەكرد و یەك دوو گوێدرێژی بەرەڵای بێتاقەت، بێ ڕەمەق سەریان بەرەو زەوی شۆڕ كردبوویەوە؛ سێ چوار سەگی دڕ و چەمووش تا لەناو دێش وەدەر دەچووین تەڵەبكارانە بە دوامانەوە بوون؛ بێحەیاییەکەی ئەو سەگانەی گوێرەكم لەبیر نەچووەتەوە؛ لە ئاوا چوارتەنیشتێكی نەزۆركدا منداڵێك هەڵكەوێ و بتوانێ سەرنجی كابرایەكی وەك من ڕاكێشی و سەرسامم بكا، هەوانتە نییە.
بەو موفرەداتە پڕ لە زەرافەتانە، بەو وشە و واژە هەڵبژێراوانە، دەم لە دنیای ڕۆشنبیری و سیاسەتە قەدەغەكراوەكان بكوتێت و، سواركارانە لە مەیدانی نووسیندا ئەسپی پەرمیان (باوەڕبەخۆبوون) تاو دات، بە لای منەوە شایانی ڕێز و تەقدیرە.
ئاخر لە ڕۆژگارێكی سەیردا دەژیین، كوردستان كاولە، خەڵكەكە مەزڵووم و كڵۆڵە، هەژاری و نەداری هێڵەی تیادا دەكات، چوارتەنیشت پڕە لە كوێرەوەری…
لە ئاوا دەوروبەرێكدا لێرە و لەوێ وەك ئەم كوڕە گوێرەكییەی بەرچاو بكەوێ…پەكوو لە كوردستان ئاوا بێت وڵاتە خێرنەدیوەكەم.
ئافەرین حەمە ناسیح بۆ لێهاتووییەکەت! بێترس لە ڕەشەبای ڕووداو، لە تاریكی بەستووی ڕچاو و ڕێچكەهەڵگرتن بێ مەبادا لە هەڵدێرگا لە هەوراز، لە مردن، بەرەو ئەشقێكی ماندوو، لە هەوارگەی هێلانەی دەردا نوونكردن.
تۆ و ئەوان خۆیان بە چلەنشینی ئەشكەوتی ئەشق دەزانن، ئەوانەی وەك تۆ وان بزنەڕێ دەگرنە بەر لە بێدەنگی خۆرئاوادا بە هەوای بەرەبەیانی سوور و سووتاوەوە هەنگاوی یەقین دەنێن، بێ ترس و تۆقیان لە داهۆڵی یەئس و نائومێدی دەگوزەرن و سنووری بەستەڵەك بەجێ دەھێڵن.
ئاوا بێ كوردستان! بەردەوام بێت گەرمیان! وا لە كۆرە لادێیەكی بكا، یەكێك لەو دێ لەبیرچووانە وا سەدان ساڵە لە سێوەری تەزیودا خۆر ماوەتەوە، كۆماوەتەوە، لە بێشكەی ماندووی مێژوودا لە دەوربەرێكی ماندووا، لە هەڕەشەی نەگبەتا لە هەوری هەرادا، بتوانێت و نەترسێ و كراسی تیشك لەبەر كا و بڕواتە پرسەی بێ تەرمی وژدانەوە.
بەردەوام بێت حەمە ناسیحی گوێرەكی وا سەرفرازانە لە پای شەمعی شەبستانی وردەكاریدا چۆك لە باوەش بكەوێتە فكر و زكری ستایش، ئەوە هەر بەدەم ئاسانە.
من نازانم ئەو حەمە ناسحە لە چ تەمەنێكدایە، ئەوەندە دەزانم لەو چەند لاپەڕەیدا وا دەربارەی ڕۆمانی ‘كۆردەرە’ی نووسیوە؛ داستانی هەزارساڵەی گێڕاوەتەوە، من زۆر شتی لێوە فێر بووم، رۆحی ژەنگگرتوومی خاوێن كردەوە، هەرچی كووچە و كۆڵانی تاریك و ئاڵۆزی “ئەنا”ی پەژمەردەم هەیە، چراخانی كردەوە و دووبارە بەرەو دەروازەی ئیمكانی ڕەوانە كردم.
كەوتمە پرسوجۆ دەربارەی كاكە حەمەی ناسح؛ شەقولقەمەرم كرد هیچ نیشانەیەكم نە لە خۆی و نە لە بەرهەمی و نە لە نووسراوەكانی ناو ڕۆژنامە و گۆڤارەكاندا هیچم بە هیچ نەكرد.. تۆ بڵێی لەم ڕۆژە تاریكەیدا كەوتبێتە بەر گوللەی ژاژۆر تەقینێكەوە؟
تۆ بڵێی لە دەردەسەریەكی وا دابێت نەیپڕژێتە بەر نووسین؟ تۆ بڵێی لە شەوی شەوەزەنگدا پای لە تەلی ڕووداودا هەڵكەوتبێت؟
ئەوانەی وا وتم لەم ڕۆژە تاریكەیدا لە ڕێگەی هەموواندایە.
بەش بە حاڵی خۆم ئەی حەمە ناسحی مەلا كەریمی كوێرەكی لە هەر كوێیەکەدا هەیت، سڵاوی گەرمی منت پێشكەش….
با ئەوەیش بڵێم كاتێك ئەو نامەم بەدەست كەوتەوە، پێنج ساڵ و چوار مانگ و حەوت ڕۆژ لە ڕۆژی نووسینی گوزەراوە.
1/4/2020
کۆردەرە؛ ئاودڕگەیەکی گەورەیە لە شاری خانەقیندا؛ لە کاتی باراندا، پڕ دەبێ لە ئاو.
نامەیەک لەژێر ڕەهێڵەی باراندا
