هاودەنگ فارووق
ئیدی خوێندنەوەی كایەی هەڵبژاردن و، تۆماركردنی تێبینی لەسەر قۆناغی ئایندە، هەروا گەڵاڵەكردنی كۆی تێبینییەكان لە ڕوانگەی بەرژەوەندیی نەتەوەیی و مافەكانی گەلی كوردستان، لەسەر یاسای نادادپەروەریی هەڵبژاردن و تەواوی پرۆسەكە و بارودۆخی عێراق، ئەركی هەموو لایەنە كوردییەكانە.
ڕاستیەكەی سەركەوتنی گەورەی پارتی و بەدەستهێنانی زیاتر لە یەك میلیۆن دەنگ، چەندین ڕەهەندی قووڵی سیاسی و مێژوویی و تەنزیمی و هەروەها هۆشیاریی سیاسی و نەتەوەیی ئەندام و لایەنگران و جەماوەری پارتی هەیە.
ئەم سەركەوتنە و بەدەستهێنانی زیاتر لە یەك ملیۆن دەنگ، بەرهەمی ڕێبوارانی ڕێگەی بیروباوەڕی ڕێبازی بارزانی و ئیرادەی خۆنەچەماندن و مێژووی دوورودرێژی خەبات و قوربانیدانی جەماوەر و لایەنگرانی پارتییە.
ئەو سەركەوتنەو پشتیوانیی گەلی كوردستان بۆ پارتی پەیامێكی بەهێزە و، پێگە و ڕەوایەتیی دروشم و داواكارییەكانی پارتی بۆ هەموو لایەك دەخاتەڕوو. پێویستە بە بەردەوامی ئەو سەروەریی و سەروەتە مەزنەی پارتی وەك چاومان بپارێزین و خزمەتی بكەین، وەبەرهێنانی ڕاستگۆیانەی لەسەر بكەین.
نابێت تەنیا لە ئانی هەڵبژاردنەكاندا، ڕوومان لەم جەماوەرە بەوەفاودڵپاكە بێت، بەڵكوو هەموو كات خزمەتكاریان بین. هەروەك دەبێ جەخت لە ژمارەی زیاتر لە یەک میلیۆن دەنگ، سەرووی یەک میلیۆن و زیاتر بکرێتەوە، ئەنجامەكانی ئەو هەڵبژاردنە سەلماندی كە پارتی حزبی یەكەمی كوردستان و حزبی یەكەمی هەموو عێراقە.