عەمەر ئەرگوشی
پارتی دیموکراتی کوردستان، لە کاتێکدا دەیەوێت خزمەتی خەڵک و نیشتمان بکات، ئەم کارە بە ئەرک و بەرنامەی خۆی دەزانێت و هەر بۆ ئەم مەبەستەش دامەزراوە. ئامانجی پارتی پاراستنی خاک و نیشتمانە، هەروەها دابینکردنی خزمەتگوزاری شایستە بۆ ئەو خەڵکەی کە بە درێژایی مێژوو لە مافەکانیان بێبەش بوون و قوربانی زۆریان لە پێناو ئەمڕۆدا داوە.
پارتی کاتێک پڕۆژەیەک پێشکەش دەکات، مەبەستی بانگەشەی هەڵبژاردن نییە، بەڵکوو ئەنجامدانی کارێکە باوەڕی پێیەتی. پێشتریش بەبێ دوودڵی بەڵێنی بە خەڵکی کوردستان داوە و بەڵێنەکەشی بردووەتە سەر.
بەختەوەری و سەرکەوتن لەوەدایە پارتی ئەو خزمەتگوزارییانەی پێشکەشی دەکات، بە شێوەیەکی خۆکار دەبنە بەڵگە و گەواهی ئەوەی کە پارتییەکان لە کاتی بانگەشەی هەڵبژاردنەکاندا بە دەنگی بەرز هاوار دەکەن: “ئەوە ئێمەین خزمەتتان دەکەین، ئێمە وتە و کردارمان یەکن، ئێمە لەسەر ڕێبازی پیرۆزی بارزانی بە شێوەیەک پەروەردە کراوین کە خزمەتکاری گەلەکەمان بین.” لە هەر کوێی کوردستان چاو هەڵبێنن، ڕاستەوخۆ شوێن پەنجەی خزمەتگوزارییەکانی حکوومەتی هەرێم بە زەوییەوە دەبینن. لە هەر شوێنێک پشوو بدەن، چاوتان بەو جوانییانە دەکەوێت کە پاسەوانانی خاک و وڵات و پێشمەرگەکانی بارزانی دەستی باڵایان هەبووە لە دروستکردنی. من لێرەدا باسی دابینکردنی ئاو و کارەبا و ژیانی ئارام بۆ هاووڵاتیانی کوردستان ناکەم، بەڵکوو تەنیا باسی ڕاستگۆیی و وەفاداری و دڵسۆزی پارتییەکان دەکەم بەرامبەر ئەو گەلەی هەمیشە گیانی خۆیان فیدا کردووە و سۆز و وەفای بێسنووریان بەخشیوە لەپێناو پاراستنی ئەو ناوبانگەی بە خوێن و فرمێسک بۆ گەلی ژێردەست بەدەستیان هێناوە.
پارتییەکان بەبێ ماندووبوون لە خزمەتی خەڵکی کوردستاندان، ئامانجیان پاراستنی خۆیان و وڵاتەکەیانە، هەروەها بەدەستهێنانەوەی متمانەی ئەو گەلەیە کە قوربانی زۆریان لە پێناویدا داوە. ئەمڕۆ پارتی لە گەلی کوردستان چاوەڕوان دەکات کە خۆیان بە خاوەنی لیستی ژمارە ٢٧٥ بزانن و متمانەی خۆیانی پێ ببەخشنەوە، بۆ ئەوەی ئەو دڵسۆزی و خزمەتگوزارییانە بەردەوام بن و گەلی کوردستانیش سەرکەوتوو و سەرفراز بێت.