شێرکۆ حەبیب
پاراستنی کوردستان و ئەزموونەکەی ئەرکێکی نیشتمانی سەرجەم پێکهاتەکانیەتی، هەڵبەتە ئەمەش یەک دەنگی و یەک هەڵوێستی پێویستە، نەخاسمە لەم ساتە وەختەدا کە ناوچەکە ڕووبەڕووی گژی بۆتەوە و هەندێ لە وڵاتانی هەرێمی دەوربەری کوردستان لە ئەگەری ئاڵۆزی و دۆخێکی نەخوازراون، جگە لەوەی عێراق ئەگەری داڕمانی هەیە و دووچاری گرفت بووە .
بەتایبەتی دوای واژۆ کردنی ڕێککەوتنی ئەمنی لە نێوان ئێران و عێراق، و هەوڵدان بۆ تێپەراندنی یاسای حەشدی شەعبی لە پەرلەمانی عێراق، ئەمانە دەبنە هۆکاری ئەوەی عێراق دووچاری گرژی ببێتەوە و بکەوێتە ژێر هەژموونی وڵاتانی دیکەوە، و هێزە سیاسییەکان بەتایبەتی شیعەکان ئەو هاوپەیمانیەتیەی لە نێوانیانە دووچاری هەڵوەشانەوەبێت، و هەروەها دابەشبوونی زیاتری سوننەکان ئەگەری هەیە، لە لایەکی دیکەوە ڕەتکردنەوەی کۆمەڵێک کاندیدی ئەنجوومەنی نوێنەرانی عێراق لەلایەن کۆمسیۆنی باڵای سەربەجۆی هەڵبژاردن، کە هەندێکیان ئەندام پەرلەمان و پۆستی باڵایان لە حکوومەت هەبووە و سەربەلایانە سیاسییەکانن کە سەر بە حزبی بەعس بوونە ئەمەش گرفتێکی دیکەیە ڕووبەڕووی شەقامی عێراق دەبێتەوە.
ئەوەی گرنگە کورد لەو هاوکێشەیەدا بتوانێ بەبێ زیان دەربچێت و لەم گۆڕانکاریانە ئەگەر ڕوو بدات لە ڕۆژهەڵاتی ناوەڕاست بە دەسکەوت دەرچێ یا بەلانی کەم پارێزگاری لە قەوارەی ئیستای خۆی بکات، کە ئەمەش یەک هەڵوێستی و یەک گوتاری پێویستە، و ئەمەش بەتەبایی و لێک نزیکبوونەی بۆچوونەکان لە بەرژەوەندی باڵای کوردستان دێتە ئامانج، دووبەرەکی و دژایەتی یەکدی تەنیا جێ بەجێکردنی ئەجندای دوژمنانە، و سوودی نەیارانی لێدەکەوێتەوە، چەک بۆ ئەوە نییە کورد دژی کورد بەکاری بهێنێت، بەڵکو بۆ پاراستنی کورد و کوردستانە، بەڵام وا دیارە دژایەتی یەکدی لە دێر زمانەوە بەرۆکی کوردی گرتووە و دژی یەکدینە تا ئەمڕۆش هەروا بەردەوامە، دەبێ بۆ هەر گرفت و ناکۆکییەک یاسا سەروەر بێت نەک چەک، هەر دژایەتیەک یا گرژییەکی نێوان خودی کورد دەبێتە هۆی لە دەست دانی کۆمەڵێک دەسکەوت وسەرکەوتن، تا کەی کورد پەند و وانە لە ڕابردوو وەرناگرێت و یەک هەڵوێست نابن؟ نەخاسمە ئەمڕۆ کوردستان بە ناوچەیەکی ئارام و سەقامگیر ئاماژەی پێدەکرێت کە ئەرکی هەموو دڵسۆز و نیشتمان پەروەرێکە بیپارێزێ.