ڕۆژنامەی هەولێر
لە کاتێکدا هەموو خەڵک بە هیواوە دەڕواننە کۆبوونەوە و گفتوگۆی نێوان پارتی و یەکێتی بۆ گەیشتن بە ڕێککەوتنێکی گونجاو لەگەڵ بەغدا، کە ببێتە هۆی چارەسەری قەیرانی بڕینی مووچە و کەمکردنەوەی ئازارەکانی خەڵکی کوردستان، ئا لەم کاتە ناسک و هەستیارەدا، کەناڵی کوردسات بە بڵاوکردنەوەی گۆرانییەکی ئاستنزمی دوور لەبەها باڵاکانی هونەری ڕەسەن، هەستی خەڵکی بریندار کرد و، نیگەرانی کردن.
ئەو كەتنەی کوردسات، لە کاتێكدایە کە خەڵکی کوردستان چاوەڕوانی مووچەکانیان دەکەن، کە لەلایەن دەسەڵاتدارانی بەغداوە نزیکەی سێ مانگە بڕاوە، ئەوەش بووەتە خراپبوونی دۆخی ئابووریی خەڵک.
ئەم دۆخە خراپە، سەرلەبەری ناوچە و شارەکانی کوردستانی گرتووەتەوە، واتە دەسەڵاتی بەغدا، دژایەتیی سەرجەم دانیشتوانی کوردستان دەکات، نەک تەنیا شار و ناوچەیەک. لە لایەکی دیكەوە پەلاماری گرووپە تیرۆریستییەکان بۆ سەر شادەماری ئابووریی کوردستان، هێندەی دی بارودۆخەکەی ئاڵۆزتر کردووە؛ لەم کاتە هەستیارەدا، دەبێ میدیاکان ڕۆڵێکی هۆشیارانەتر و بەرپرسانەتر بگێڕن و هەوڵبدەن یەکڕیزیی و ئارامیی کۆمەڵگە بپارێزن، نەک ئەوەی ببنە مایەی نانەوەی دووبەرەکی و سەختترکردنی دۆخەکە.
بڵاوکردنەوەی ئەم گۆرانییە ئاستنزمە، نەک خزمەت بە هیوا و ئامانجەکانی گەلەکەمان ناکات، بەڵکوو بە پێچەوانەوە، دەبێتە هۆی دڵخۆشیی دووژمنان و دڵڕەنجانی خەڵکی کوردستان، هەرچەندە ڤیدیۆ ناشیرنەكەیان سڕییەوە، بەڵام هێشتا لێرە و لەوێ بە ناڕاستەوخۆ و بە ئەنقەست بڵاو دەكرێتەوە.
هونەرمەندان ئەرک و ڕۆڵیان ئاشتەوایی و ڕەنگڕێژکردنی جیاوازییەکانە نەک بەکارهێنانیان بۆ دووبەرەکی و گەیاندنی پەیامی نابەجێی سیاسی.
ئەمەش لە کاتێکدایە وەڵامدانەوەی ئاسانە، بەڵام دۆخی کوردستان و قۆناغەکە وامان لێ دەخوازێت کە بە بەرپرسیارییەتیەوە مامەڵە بکەین.
لە کۆتاییدا دەپرسین؛
ئاخر بۆ فیتنەگێڕیی؟، کە خزمەت بە کوردستان ناکات و پشت کردنە لە پرەنسیپە نیشتمانییەکان و یەکڕیزیی گەلی کوردستان و پێچەوانەی خواستەکانی خەڵکە.