لەیلا ئیسکەندەر
چ هەڤوەلاتییەک ل کوردستانێ نینە کو ب خێزانڤە تووشی دەردەسەرییەکێ نەبووبیت، ب تایبەت نڤشێ نوکە و یێ بەری وی. ژ درێژاهییا دیرۆکێ بگرە هەتا ئەنفالان، کۆچا ملیۆنی و هێرشێن داعشێ، هەر دەم مە دیتییە چانتکا مە ب ملێن مەڤە بوویە و ژ سنوورەکێ بۆ یێ دی، ژ وەلاتەکێ بۆ یێ دی، ئەم بۆ لێگەریانا هەناسەکا ئازادیێ سەرگەردان بووینە.
ڕاستە ئەڤرۆ ئەم ل ناڤا پێشکەفتیترین وەلاتێن جیهانێ، د ژیانەکا خۆش و ڕێک و پێک دا دژین، لێ ئەو برینێن د دلێ مە دا ناهێنە وەسفکرن. دلێ مە هەر ل دویڤ خەلک و کەس و کارێن مە یە ل کوردستانا هەتا ئەڤرۆ بریندار. مە چ ژ دەست بهێت، ئەم ب گەرم و گوڕی ل گەل وەلاتێ خۆینە و زارۆکێن کوردستانێ بۆ مە ناڤەندا جەرگێ مەنە.
گەلەک باس ل بزاڤ و تێکۆشینان ل دەرڤەی وەلاتی دهێتە کرن. ئەرێ ئەم، وەک کوردێن دیاسپۆڕایێ و سامانەکێ مرۆڤی، چ بکەین دا بلۆکەکێ دی لسەر دیوارێ کوردستانێ زێدە بکەین و هەر ڤالاهییەکا هەبیت پڕ بکەین؟ ڕاستە ئەڤرۆ جیهان پێشکەفتییە و دەنگێ مەزلوومان دگەهیتە هەموو جیهانێ، لێ دەنگێ مە ب ڕێیا چالاکیێن ڕاستەوخۆ و ل بەردەم دەستهەلاتێن وەلاتێن مەزن، زووتر و ب هێزتر دگەهیت، هەم ب زمانێ وان و هەم ژی ب ئامادەبوونا بەردەوام.
بۆچوونا من بۆ بهێزئێخستنا پێگەهێ وەلاتێ مە ئەوە کو “کوردستانەکا دیاسپۆڕایێ” بهێتە ئاڤاکرن؛ واتە کۆمەڵگەهەکا بهێز و چالاک. پێدڤییە هەر تاکەک ژ لایێ خۆڤە خەمخۆرییا خۆ بکەتە کریار و ب هەموو ڕەنگان مللەتێن دی تێبگەهینیت کو مللەتێ مە گەلەک هاتییە چەوساندن و ژ بچووکترین مافێن خۆ بێبەهر کریە. پێدڤییە بەس بیت دەنگێن نەرێنی لسەر ناڤێ کوردستانێ بهێنە بەلاڤکرن، ب تایبەت ژ لایێ کوردان بخۆ ڤە. وەک کورد دبێژن: “تف یا سەرئەڤرازە” و “بەرا نههاڤێژە وێ کانییا تە ئاڤ ژێ ڤەخواری!”. یێ خراب، بۆ خۆ خرابە و “بەندکێ خرابیێ یێ کورتە.”
ل دوماهیێ، نیشاندانا پاکی و جوانییا ناڤێ کورد و کوردستانێ، دڤێت پەیاما هەر کوردەکێ دیاسپۆڕایێ بیت.