سێبەر بەرواری
ژنێ د دیرۆکا وه‌لات و جڤاکێ مه دا ڕۆلەکێ سه‌ره‌کی گێرایه. ئه‌ڤ ڕۆله ژ ده‌ستپێکا مێژوویا ملله‌تێ مه هه‌تا نوکه به‌رده‌وامه و ژنان شیاینه ژینگه‌هه‌کا ته‌ندروست و ساخله‌م ئاڤا بکه‌ن. به‌شداریا وان یا به‌رده‌وام د بیاڤێن جودا یێن ژیانێ دا، خۆڕاگرییا وان و پشته‌ڤانیا وان بۆ زه‌لامان، به‌لگه‌یه‌کا ب هێزه لسه‌ر وێ چه‌ندێ کو ئه‌و فاکته‌ره‌کێ سه‌ره‌کی نه د دروستکرنا گوهۆڕینێن ئه‌رێنی و بمفا دا بۆ جڤاکێ مه.
گوهۆڕینێن ئه‌رێنی د جڤاکی دا، ب ڕێژه‌یه‌کا به‌رچاڤ، پشت ب شیان و به‌شداریا ژنێ ڤه گرێدایه. گرنگییا شیانێن ژنێ ب تایبه‌ت د بیاڤێ په‌روه‌ردێ دا دیار دبیت. ژنان پشکدارییه‌کا به‌رچاڤ د پێشخستنا داموده‌زگه‌هێن په‌روه‌ردێ دا کریە ل سه‌رانسه‌ری جیهانێ، ب تایبه‌ت ب ڕێکا فێرکرنا خواندن و نڤیسینێ.
پێتڤی و گرنگه کو ژن د ڕێڤه‌برنا جڤاکی دا هه‌ڤپشک بیت. ژن نیڤا جڤاکی یە و نیڤا دی پەروەردە دکەت. ل جیهانێ، ژن وه‌ک ده‌یكا جڤاکی و بنیاتێ شارستانیه‌تێ دهێته هژمارتن. ل هه‌ر وه‌لاته‌کێ پێشکه‌فتی، به‌شداریا بهێز یا ژنێ د داموده‌زگه‌هان دا، فاکته‌ره‌کێ سه‌ره‌کی یێ سه‌رکه‌فتنێ بوویە.
هه‌رێما کوردستانێ ژی نموونه‌یه‌کا به‌رچاڤه ل ڕۆژهه‌لاتا ناڤین، کو تێدا گرنگییه‌کا مه‌زن ب شیان و به‌شداریا ژنان د داموده‌زگه‌هێن حکومی و که‌رتێ تایبه‌ت دا هاتیه دان. هه‌روه‌سا، ب درێژاهییا مێژوویێ، ژنا کورد ڕۆله‌کێ سه‌ره‌کی و کاریگه‌ر د سه‌رکه‌فتنا هه‌می شۆڕه‌ش و سه‌رهلدانێن کوردستانێ دا گێرایه.