شۆڕشی گوڵان

‎هاودەنگ فارووق
ئەزموونی نیوسەدە خەبات و دەستكەوتەكانی گەلی كوردستان، لە ئەنجامی ڕاستەوخۆی شۆڕشی گوڵانی ئازادیخوازەوەیە، ئەم شۆڕشە خاڵی وەرچەرخان بوو بۆ گۆڕانكاریی جەوهەری و شێوازێكی نوێی بەرخودان، لەو دیدگایەیشەوە شێوەی ڕوانینی ئێمەش بۆ شۆڕشی گوڵان پێویستە گۆڕانكاری ڕیشەیی بەسەردا بێت. ئەم گۆڕانكارییە لەوەوە سەرچاوە دەگرێت كە بڵێین:شۆڕشێك توانیبیتی لەناو قوڕگی دڕندەیەكی وەكو دەوڵەتی داگیركەری عێراق، نەك هەر كورد لە مەرگی حەتمی ڕزگار بكات، بەڵكوو ئومێدی بۆ بگێڕێتەوە زۆرێك لەمافەكانی مسۆگەر بكات، بیكاتە خاوەنی قەوارەیەكی دەستووری خۆی كە تاكە قەوارەی یاسایی كوردە بەدرێژایی مێژووی هاوچەرخی كورد.
سەرباری ئەوەش بتوانێت بە ئەقڵ و سەلیقەیەكی زۆرەوە، هەنگاوی ژیرانە بهاوێ و لە هەستیارترین چركەساتی ناوچەكەدا، ئەو قەوارە كوردییە بپارێزێت و، بتوانێت بیكاتە خاوەنی كارتی گرنگ و لەگەڵ زلهێزەكان و لەسەرویانەوە لەگەڵ ئەمریكا و ئەورووپا ببێتە هاوپەیمانی ستراتیژی، لەكاتێكدا كە زۆرێك لەوڵاتانی سەربەخۆ و خاوەنی سەروەری لەگێژاودان و ناتوانن خۆیان لەو تەنگەڵانە دەربكەن كە ئەمریكا لەناوچەكەدا دروستی كردووە.
شۆڕشی گوڵان، ئەقڵێكی گەورەی لەپشت بوو، سەلیقەیەك كەتوانی لەئاست ئاڵنگارییە جیهانییەكانی ئەوسا بجوڵێتەوە، ڕاستییەكەی گوڵان زۆر مەزنترە لەو شێوازە ناساندنەی كە تاكو ئێستا ئێمە پێشكەشمان كردووە، بۆیە هەر كادرێكی پارتی دەبێت هەڵوەستەیەكی عەقڵانی لە ئاست هەستانەوەی ئەو كاروانەی كوردایەتی بكات و بەدوای وەڵامی ئەو پرسیارانەدا بگەڕێت، كە ئایە دەبێت چۆن قسە لەسەر شۆڕشی گوڵان بكەین؟ چۆن پێناسەی بكەینەوە؟
لەڕووی گوتاری سیاسی، توێژینەوەی زانستی و ئەكادیمی، دۆكیۆمێنتاری و لەئاستی پەروەردەی نەتەوەیییەوە چۆن سوود لەو ئەزموونە وەربگرین؟ چۆن چارەسەری ئەو بابەتە لەگوتار و مادەو ئەدەبیاتی ئیعلامیدا بكەین؟ چۆن نەوەی ئێستاو داهاتووی كورد بەو شۆڕشە ئاشنا بكەین؟
كۆمەڵێك پرسیارن و، پێویستە هەڵوێستەی ڕاستەقینەیان لەسەر بكرێت. نابێ هەروا بەئاسانی بەسەریاندا تێپەڕ ببین. ڕاستە تاكو ئێستا بەجۆرێك لەجۆرەكان قسە لەسەر ئەو شۆڕشە كراوەو لەسەری نووسراوە، خەڵكی كوردستان دەزانن كە بەردی بناغەی ڕزگای ئەوان لەژێر چنگاڵی داگیركەردا، بەهۆی ئەو شۆڕشەوەیە، بەڵام هێشتا هەقی تەواوی خۆی پێنەدراوە.
ئەگەر پێشتر پێمان وابووبێت كە شۆڕشی گوڵان، ئیسپات وجودی نەتەوەیی بووەو نیشانەی هەرمانی ئەم گەلە بووە، ئێستا ئەو دیدە دیدێكی تەسكە و، درەختی گوڵان بەری زیاتری گرتووەو، پێویستە دیدی خۆمانی لەبارەوە فراوانتر بكەین.
پوختەی كەلام ئەوەیە: شۆڕشی گوڵانی ڕزگاریخواز، سەركەوتووترین شۆڕشە كە لەتەمەنی نەوەی یەكەمی شۆڕشەكەدا، سەركەوتنی گەورە تۆمار بكات، نەتەوەیەك لەتوانەوە ڕزگاربكات و، بیكاتە خاوەنی قەوارەی ددانپێدانراو، دواتریش بیكاتە هاوپەیمانی زلهێزەكانی جیهان. ئایا كاتی ئەوە نییە كە پێناسەیەكی نوێ بۆ ئەو شۆڕشە مەزنە بكەین و، بە بەرنامەیەكی نوێوە لێی بچینە پێشەوەو بیخوێنینەوە؟