ڕیفراندۆمێك بۆ كێشەی مووچە

مەشخەڵ كەوڵۆسی
دەساڵی ڕەبەقە بەغدا سزای خەڵكی كوردستان دەدات، ئامانجی ئەو بڕیارەی عێراق، هەڵوەشاندنەوەی هەرێمی كوردستانە. ئێمە لەسەر ئەو سیاسەتە ومیكانیزمەكانی سزادانی كورد و، پاشخانە عەقیدەییەكەی لەناو دەوڵەتی قووڵی عێراقدا، بەردەوام قسەمان هەبووەو، تەنانەت تاكە دەنگێك بووین هەمیشە ڕووی ڕاستی بابەتەكەمان خستۆتە ڕوو.
هەمیشە و بەردەوام دووبارەمان كردۆتەوە، كە هیچ ڕێككەوتنێك ناتوانێت كۆتایی بەو سیاسەتەی عێراق بهێنێت، ئەویش لەبەر دووهۆكار:
یەكەم: سیاسەتەكە كارایی خۆی سەلماندووە لە لاوازكردنی كورد و كۆمەڵگەی كوردی وسزادانی خەڵكی كوردستان و، لاوازكردنی قەوارەی هەرێمی كوردستاندا.
دووەم: لەبنەڕەتەوە عێراق بەدیراسە و بە وشیارییەوە دەستی بردووە بۆ بڕینی مووچەی خەڵكی كوردستان و، ئامانجێكی ڕوونی بۆ ئەو سیاسەتە دیاریكردووە كە ئەویش هەڵوەشاندنەوەی قەوارەی هەرێمی كوردستانە.
ئینجا بۆ هەركەسێك كە تۆزقاڵێك لە پرۆسەی بڕیاردانی دەوڵەت شارەزابێت، تێدەگات كە مادەم میكانیزم و سیاسەتێك كارایی خۆی سەلماند لە گەیشتن بە ئامانجێك، ئەو كاتە هیچ بابەتێكی تر نابێتە هۆی هەڵوەشاندنەوەی یان ڕاگرتنی كاركردن بەو میكانیزمە.
ئیدی لەسۆنگەی ئەو ڕاستییە ڕۆتینییەو، لەپەنای خوێندنەوەی ئەقڵیەتی كۆمەڵگەی عەرەبی، هاوكات لەگۆشەی ئەو دابەشبوونە قووڵەی لەنێوان سیاسییەكان و، كۆپی بوونەوەی ڕقی قووڵیان بەرانبەر كوردستان، هەمیشە و بەردەوام لەدژی هەموو ڕێككەوتنێك بووم كە لە نێوان كورد و عێراقدا واژۆبكرێت و، سەركۆنەی هەر بەرپرس و میدیاكار و سیاسییەكیشم كردووە كە نوقڵانەی كۆتاییهاتنی سزای برسیكردنی كورد لێبدات.
دواجار پەیتاپەیتا سیاسییەكانی كوردیش، بەوانەشەوە كەبەردەوام ڕیكلامیان بۆ عێراق دەكرد و پاساویان بۆ دەهێنایەوە، خەریكە دەگەنە ئەو بڕوایەی ئێمە، ئێستا زۆرینەیان باس لەوە دەكەن كە عێراق كێشەی لەگەڵ كورد هەیە و ئەوەی دەیكات بۆ برسیكردنی كوردە و، سیاسەتێكی دیراسەكراوە. ئەگەرچی درەنگە، بەڵام ئەمە پێشهاتێكی زۆر گرنگە بۆ ئەوەی كورد و حیزبەكانی كوردستان، بەشێوەی دەستەجەمعی و بەیەك ڕیز لەدژی ئەو سیاسەتی برسیكردن و ئەپارتایدەی عێراق ڕابوەستن.
لەدوای ئەوەی تێگەیشتنێكی جیاواز خەڵاوە بەرانبەر ئەو سیاسەتەی عێراق و خەریكە كۆدەنگییەكی ڕاستەقینە دروست دەبێت، پێویستە چوار ئاراستەی سیاسی و میدیایی كار بكرێت:
یەكەم: حكومەت كۆبوونەوەیەكی ڕاوێژكاری سازبكات بۆ ئەوكەسانەی كە ئەهلی بیروران، لەوێدا یەك پرسیار بكرێت: چۆن وەڵامی عێراق بدرێتەوە، كارتەكانی كورد چین؟
دووەم: گوتاری میدیایی سەرجەم حیزبەكان، بەئاراستەی ڕوونكردنەوەی زیاتری ئەو ستەمەی لەكورد دەكرێت لەبەر كورد بوونی، بۆ خەڵكی كوردستان ڕوون بكرێتەوەو، خەڵك ئامادە بكرێت بۆ بەرەنگاربوونەوەی ئەو ستەمە. هەم لەڕووی دەرونیشەوە، ئامادەسازی بكرێت بۆ قۆناغی داهاتوو.
سێیەم: لەڕووی سیاسییەوە، هەڵمەتێكی ڕاستەقینە و فراوان لەگەڵ نێردە بیانییەكان و، دۆستەكانی كورد لەناو عێراق و دەرەوەی عێراقیش بەڕێوەببرێت. هەوڵبدرێت هاوسۆزییەك بۆ كورد پەیدا بكرێت بۆ ئەوەی لەقۆناغی دواتردا، كورد بێ پشت و پەنا نەبێت. ئەگەرچی لەڕووی سیاسیشەوە بێت.
چوارەم: لەدوای دیاریكردنی ئۆپشن و كارتەكانی بەردەستی كورد، گرنگترین هەنگاو، سازكردنی ڕیفراندۆمێكە و پێویستە بگەڕێینەوە بۆ خەڵك و لەخەڵكی كوردستان بپرسین: كام لەو كارتانەی لەبەردەستی كوردن بۆ سزادانی عێراق لەبەرانبەر برسیكردنی كورددا بەكاربهێنرێت؟.
ئەنجامی ڕیفراندۆمەكە یەكجار زۆر گرنگە بۆ ئەوەی كاردانەوەی كورد شەرعیەتی هەبێت. هاوكات هاوسۆزی و پشتیوانیشی هەبێت. چونكە دوای دەساڵ، ئیتر كاتی ئەوە هاتووە وەكو میللەتێكی زیندوو، كورد بە عێراق بڵێت: ئەم برسیكردنە بەسە.