بەفرین ئاکرەهی
ئافرەتێن کورد ب درێژاهیا مێژوویا کورد وکوردستانێ، و تەڤایا هەمی بەربەستێن لهەمبەر مل ب ملی زەڵامان بۆ خاک و نەتەوە ونشتیمانێ خۆ خەباتکریە ودناڤا سیاسەتێدا ڕۆلەکێ مەزن وکاریگەر هەبوویە کو ئەڤڕۆکە زێدەتر ل هەمی دەمان دیدەڤانیا ڕۆل وبەشداریا وانا یا دیارە.
ب تایبەتیش د شوڕەشێن سەردەمێ کەڤن یێ مێژوویا کوردستانێ .
پرسا بەشداریکرنا ئافرەتان د خەبات وسیاسەتێدا ئێکە ژ پرسێن هەرە گرنگ وهەنووکەیا کوردستانێ یە وبەردەوام ب دید ونەرینێن جودا بەحس لێدهێتەکرن وبەرز دهێنە نرخاندن وقەلەمدان. ئافرەت د کوردستانێدا ب گشتی و د ڕۆژهەڵاتێ ب تایبەتی، هەردەم ڕۆلەکێ ئەکتیڤ وگرنگ د خەباتێن دژی وێرانکارێ وگەهشتن ب ئازادێ هەبوویە.
هەر ژ دەستپێکا قۆناغا خەباتا چەکدارێ دژی ڕژێم و شەڕکەران ئافرەت د هەر چوار پارچێن کوردستانێ جل و بەرگێن پێشمەرگان ل بەرخۆ کرینە ومل ب ملی زەڵامان مینا پێشمەرگان بەرگری ژ ناسنامە ونەژاد و خاک ونەتەوەیێ خۆ کریە؛ ئەڤ ڕۆلێ چارەنڤیسسازێ ئافرەتان د بەرەنگاربوونا تاڕیەتێ و زۆرداریێدا د هەمی ساڵێن خەباتا چەکداری ل دژی داگیرکەران و وێرانکاریان ب ڕووهنی دهێت نەمازەکرن ود ئەڤێ رێیا پیرۆزدا هەتا نها ب دەهان وسەدان ئافرەتێن قارەمان وپێشمەرگە بریندار یان شەهیدبووینە و وانا جانفیدایێ وخۆڕاگرێ فێری جڤاکی کرییە.
و دنهادا کو دیسان خەباتا گەلێ کورد ل ڕۆژئاڤایا کوردستانێ دبینین کو ئافرەتێن کورد د رێزا پێشێا بەرگریکرنێدانە ل خاکا کوردستانێ. ئەو خۆدانێن شانازیا بەرخۆدانا مێژوویا کوبانێنە ل دژی ڕەشبەرێن داعشێ وهەمی ئافرەتێن جیهانێ ب چاڤەکێ مەزن وهێمایا ئازادێ وجانفیدایێ چاڤ ل وان دکەن.
هەروەسا لدوویڤ وان ئالوگوڕیان کو بڕیارە د ناوچەیدا و هەمی کوردستانێ بهێنە کرن، بێگۆمان زێدەتر ل هەمی دەمەکی ڕۆلێ ئافرەتا کورد دێ بینین.
خەباتا ئافرەتێن کورد دژی داگیرکەرێ و تاریکە پەرستێ بەردەوامە…
