هاودەنگ فارووق
ئەگەر حزبەكان دەستوبرد بكەن لە پێكهێنانی كابینەی دەیەم ئەو پەیامە دەدەن بە جیهان، كە ئەگەرچی لەم ناوچەیەدا خوێن و ئاگر دەبارێت، بەڵام ئەوەتا كورد كار بە ڕۆحی دیموكراسیەت دەكات و ئامادەیە بۆ دروستكردنی حوكمی مەدەنی. ئەم پەیامەش هۆكاری دڵنیاكردنەوەی دۆستەكانە لەسەر بەردەوامی كورد لەسەر ڕیتمی دیموكراسی. ئەوەش لە كاتێكدایە پێكهاتەكانی دیكەی ناوچەكە بە لوولەی تانك و شریخەی فیشەك لەگەڵ یەكتر دەدوێن و بە شمشێر و قەمە یەكتری قەتڵوعام دەكەن.
لە كاتێكدا دۆستەكان چاوەڕوان دەكەن سەركردایەتی كورد ئەدایەكی سەركەوتووتر بكات، نابێت كورد وەكو حزبی بچووكی كورتبین و پەرتەوازەو بەرژەوەندی تەسك بچێتە كایەكەوە. بەڵكو پێكهێنانی حكوومەت وا دەكات كورد وەك یەك قەوارەی سیاسی، یاسایی و شەرعی، وەك كەناڵێكی بەرپرسیار بۆ هەڵگرتنی ئەركەقورسەكانی ئێستاو داهاتوو، سیاسەت و ستراتیژی خۆی نمایش دەكات. بێگومان ئەوەش متمانەیەكی زۆر بە دۆستەكانمان دەبەخشێت كە بزانن كێ نوێنەری كوردە و لەگەڵ كێ وتوێژ و
ڕێككەوتن بكەن.
پێكهێنانی كابینەی داهاتوو، چاوپۆشینی لایەنەكان لە هەندێ ماف و داخوازی حزبی لە پێناوی بەرژەوەندیی باڵای گەلی كوردستان، وا دەكات كورد وەكو یەك جەستە بێتە بەرچاو، وەك نەسیجێكی توندوتۆڵ و یەكگرتوو. لە كاتێكدا ئەوانیتر یەكتر دەتوێننەوە، باشتر كورد خەریكی تۆكمەكردنی خۆی بێت. كەواتە گەلی كورد لەبارترە بۆ هەڵگرتن و پێڕاسپاردنی ئەركە قورسەكانی ناوچەكە.
هەروەك بەدەر لە دۆخی ناوچەكەش، حزبەكان پێویستە حیساب بكەن بۆ داخوازی و چاوەڕوانییەكانی خەڵكی كوردستان. خەڵك بۆیە دەنگی داوە تاكو ئەنجامەكەی لەسەر ئەرزی واقیع ببینێت. ناكرێت لایەنەكان پرس بە خەڵك بكەن و لە چاوەڕوانیدا بیانهێڵنەوە. دەبێ كار بەو پرنسیپە جوانە بكرێت كە دەڵێت: سازشكردن بۆ یەكتر، سەركەوتنە.
ئاخر لەوەختێكدا خەڵك چاوەڕوانی خزمەتگوزاری و باشتركردنی گوزەران و چارەسەركردن و بنەبڕكردنی كێشەكانی لە حزبەكان دەكات، نابێ حزبەكان ئیجازە بە خۆیان بدەن ببنە كێشە و خەڵك دووچاری بێئومێدی بكەن.
هەرچۆن بێت، چ لە ناوخۆی كوردستان وە چ لە ئاستی گۆڕانكارییەكانی ناوچەكەدا، ئەگەر لایەنە كوردستانییەكان دەیانەوێت براوەی یارییەكان بن، پێویستە زوو ناوەڕۆكی پەیامەكەی سەرۆك بارزانی جێبەجێ بكەن، ئەگینا نە دەبنە جێگەی متمانەی دۆستەكانمان، نە دەشبنە دڵخوازی جەماوەرەكەی خۆیشیان.
ئەگەر كورد بیەوێت براوەی یارییەكان بێت
