هاودەنگ فارووق
ئێستا ناوچەكە دەكوڵێت، دەبێ بۆ دۆزی كورد تێزێك دابڕێژرێ، كە تێزی دەربازبوون نەبێ لە مەترسییەكان بەڵكوو تێزێك بێت بۆ خوڵقاندنی وەرچەرخان لە بوونی كورد لەم ناوچەیەدا، ستراتیژێك بۆ بڕیاردان لە مافی چارەی خۆنووسین، ئێستا قۆناغی یەكەمی هەڵتەكاندنی سیستەمەكانی ناوچەكە دەستیپێكردووە. پێش ئەوەی ترامپ بگاتە ناو كۆشكی سپی، بەشێكی باش زەمینەسازی كرا بۆ ئەوەی كارەكانی دواتری ترامپ، ئاسانتربن و، بەشێوازێكی ڕوونتر دەستبەرێت بۆ دۆسییەكانی ناوچەكە.
دەبینین ئەمڕۆ سیستەمی ناوچەكە گەیشتووەتە بنبەست و، زلهێزەكانیش لەو باوەڕەدانین كە گەلانی ناوچەكە بتوانن لەپەنای ئەم داڕشتنەی ئێستای ناوچەكەدا پێكەوە بژین، یاخود بتوانن ململانێی تۆقێنەری نێوانیان كۆتایی پێبهێنن. ئەڵبەتە تاكوو ئەو بابەتە كۆتایی نەیەت و، گەلانی ناوچەكە بە قەناعەتەوە بڕیاری پێكەوە ژیان نەدەن و، نەگەنە قۆناغی گەشەكردنی كۆمەڵایەتی و شارستانی و پێكەوەژیان و هاووڵاتیبوون، بەهیچ شێوەیەك بینەری ئاسایشێكی بەردەوام نابین لەناوچەكەدا، بەڵكوو بەهەمیشەیی ئاسایشی وزە و ئاسایشی نێودەوڵەتی لەژێر هەڕەشەدا دەبێت.
بۆیە دەبێ دڵنیابین كاتێك زلهێزەكان وەڵاتی كوردانیان دابەشكرد و وەڵاتی دیكەیان لێدروست كرد، لەدوای سەدەیەك بۆیان دەركەوت، دابەشكردنەكە نەلەقازانجی كورد بوو، نەلەقازانجی گەلانی ناوچەكە، نەتوانیشی ئاساییش و سەقامگیری هەرێمایەتی دابین بكات. بۆیە ئێستا بڕیاریانداوە دووبارە ناوچەكە دابەش بكەنەوە.
بەچاو پۆشین لەوەی شێوازی دابەشكردنەكە چۆن دەبێت، پێویستە كورد زۆر بەمتمانە و بڕوابەخۆبوونەوە، ئاڵۆزییەكان و تێكچوونی شیرازەی ناوچەكە بقۆزێتەوە بۆ دروستكردنی قەوارەی خۆی لەسەر خاكی ڕزگاركراوی خۆی. نەك تەنها ئامانجی ئەوەبێت، بەرگری لەمانەوەی خۆی بكات.
پێویستە كورد لەوە هۆشیارانەتر تێبگات كە زلهێزەكانی دنیا بە بەرنامەی ورد كاردەكەن بۆ گۆڕینی خەریتەی ناوچەكە.
لە پێكهاتەكانی ناوچەكەدا، كورد سەرەكیترینیانە، شاڕەگ و شاڕەگەزی گۆڕانكارییەكەن، تەنانەت ئەگەر لەڕووی دیموگرافیاشەوە بێت، كورد گەورەترین نەتەوەی بێدەوڵەتەو خاوەنی دۆزێكی گەورەیە و، لەجوگرافیای كوردستانیشدا زۆرترین سەرچاوەی وزەی دەست لێنەدراو هەیە، كە هەر بۆخۆی دەتوانێت پارێزگاری لەو سەرچاوانە بكات.
دەبێت بەپەرۆش و باوەڕو بەرنامەیەكی ورد و زانستی و دیپلۆماسیەتێكی پراگماتیكی و بەئەقڵی دەوڵەتداری، زلهێزەكان تێبگەیەنین، كە كورد هەم دەتوانێت پارێزەری وزەبێت لەسەدەی بیست و یەكدا، هەم دەتوانێت ببێت ڕەگەزێكی گەورەی هەنووكەیی بۆ گۆڕانكارییەكان، بەوەش دەتوانین بەرژەوەندی بۆ زلهێزەكان دروستبكەین. لەكاتێكدا ئەوان تەنها لەزمانی بەرژەوەندی تێدەگەن.
ئێستا دەرفەتە زێڕینەكەیە و، نابێت كورد چاوی لەوەبێت دەستكەوتەكانی ئێستای بمێننەوە. لە هەرێمی كوردستان بێت، یان لەڕۆژئاوای كوردستان. بەڵكو پێویستە لەو هەقیقەتە واقیعی و سیاسییە بەباشی تێبگات كە، نەتەوە زیندووەكان بەتەنها چاویان لەوەنییە دەستكەوتەكانیان بمێنێتەوە، یان لەناو نەچن. یان كێشە و ئاڵۆزییەكان تێپەڕێنن. بەڵكو ئەوان لەپێناوی دەستكەوتی زیاتر، كێشە دروست دەكەن! هەر ئەوە جیاوازییەكەیان لەگەڵ نەتەوەیەكی بێدەوڵەتی وەكوو كورد.
لەئێستادا، كە كێشە بەرۆكی ناوچەكەی گرتووە، هەمووان چاویان لەوەیە بەسەلامەتی كێشەكان تێپەڕێنن، باشترە كورد جیاوازبینبن و چاومان لەوەبێت، كێشەكان بەدەستكەوتی زیاتر و دروستكردنی دەوڵەتێك بۆ كورد كۆتاییان بێت. چونكە دروستبوونی ئەو دەوڵەتە لەبەرژەوەندیی كوردیش و زلهێزەكانیش و گەلانی ناوچەكەیش و، تەنانەت لەبەرژەوەندیی دەوڵەتانی داگیركەری كوردستانیشە.