کاروان رسول- لەندەن
هەولێر، یەکێکە لە کۆنترین شارەکانی جیهان کە بەردەوام دانیشتووانی ڕوو لە زیادبوونەو شانازی بە مێژووی دەوڵەمەندییەوە دەکات. شارەکە بە دیزاینە بازنەییەکەی کە لە گەڵ قەڵای دێرینی هەولێر گونجێنراوە، وەک هێمایەکیشە بۆ تێکەڵەیەک لە فرەیی نەریت و ئایین و کلتورە جیاوازەکان. هەولێر وەک پایتەختی هەرێمی کوردستانی-عێراق بووەتە شارێکی فراوان و قەرەباڵغ و ژمارەی دانیشتووانەکەی بە خێرایی زیادی کردووە. ئەوەی دەیبینین ئێستا شارەکە ڕووبەڕووی کۆمەڵێک کێبڕکێو دەرفەت بۆەتەوە، چونکە هەوڵدەدات خۆی وەک ناوەندێکی ناوچەیی بۆ ڕۆشنبیری و بازرگانی و گەشتیاری جێگیر بکات.
هەولێر خێرا گەشە دەکات
بەهۆی ژمارەی دانیشتووان کە لەم ساڵانەی دواییدا بەردەوام لە زیادبووندایە، ئابووری و ژێرخانی هەولێر لەژێر فشاردایە بۆ ئەوەی هاوسەنگ بێت لەگەڵ پێداویستییەکانی دانیشتووانەکەی و ئەوانەی ڕووی تێدەکەن. شارەکە بۆتە موگناتیسی هەم بۆ دانیشتوانی ناوچەکە و هەم بۆ کۆچبەرانی ناوچەکانی دەوروبەری، کە هەموویان بەشدارن لەو کۆمەڵگە هەمەچەشن و زیندووە. بەڵام لەگەڵ زیادبوونی ژمارەی دانیشتووان، خواست لەسەر دامەزراندن بەرز دەبێتەوە. لە کاتێکدا هەولێر گەشەسەندنی ئابووری بە تایبەتی لە بواری بازرگانیدا بەخۆیەوە بینیوە، بەڵام ژمارەی ئەو هەلی کارانەی کە لەبەردەستدان و هێزی کار پێویستە بۆ دابینکردنی داواکارییە پەرەسەندووەکان و هێشتا وەکو پێویست نەتوانراوە لەگەڵ خێرایی ئەم فراوانبوونەدا بگونجێت. لە ئەنجامدا ڕەخساندنی هەلی کار بووەتە پێویستییەکی بەپەلەو هەنووکەیی، بەتایبەتی لە کەرتە سەرەکییەکانی وەک بیناسازی، فرۆشتنی تاکەکەسی و گەشتیاریدا.
دەرفەتی ئابووری
سەرەڕای ئەوانە، هەولێر بووەتە مەرزێکی بازرگانی لە ناوچەکەدا، هەم بازرگانی ناوخۆیی و هەم بازرگانی نێودەوڵەتی بۆ خۆی ڕادەکێشێت. بەڵام بۆ ئەوەی هەولێر بتوانێت ئەم گەشەیە بپارێزێت، پێویستی بە وەبەرهێنان هەیە نەک تەنها لە درووستکردنی هەلی کاری زیاتر بەڵکو لە باشترکردنی پرۆگرامەکانی ڕاهێنان بۆ هێزی کارەکەی. هەولێر بە پەرەپێدانی چوارچێوەیەکی کاری لێهاتوو، دەتوانێت بەرهەمی ئابووری و توانای کێبڕکێی خۆی زیاد بکات، بەمەش شارەکە زیاتر سەرنجڕاکێش دەبێت بۆ وەبەرهێنەرانی بیانی.
پەرەپێدانی کشتوکاڵ
گرنگە وەزارەتی پلاندانان هاوکاری وەزارەتی کشتوکاڵ بکات بۆ پەرەپێدانی کەرتی کشتوکاڵ، بە کردنەوەی خول و هێنانی کەسی پسپۆرو شارەزاو گواستنەوەی ئەزموونی وڵاتانی پێشکەوتوو، چونکە نەنگیە تا ئێستا بەرهەمی لەقوتوکراوی وڵاتان لەوڵاتی تۆ ساغ بکرێتەوەو بەرهەمی ناوخۆش لەشەقامەکان وەک ناڕەزایی فڕێبدرێتە سەر شەقام، بۆیە دەکرێت ئەو پڕۆژەی لەقوتونانە بۆ بەرهەمە ناوخۆییەکان پەرەی پێبدرێت و حکومەت وەک ئەولەویات لەسەر وەزارەتی پەیوەندار بیکاتە مەرج.
پەرەپێدانی ژێرخان و پلاندانانی شار
لە ساڵانی ڕابردوودا وەبەرهێنانی بەرچاو لە ژێرخانی ئابووریدا کراوە. یەکێک لە گۆڕانکارییە هەرە بەرچاوەکان فراوانکردن و باشترکردنی تۆڕی ڕێگاوبانەکانی شارەکە بووە، کە ئێستا شەقامە فراوان و ناحیە جیاوازەکان بەیەکەوە دەبەستنەوە. ئەم پێشهاتە قەرەباڵغی لە چەند شوێنێکی شارەکەدا کەمکردۆەتەوە، کە بۆ جووڵەی خەڵک و هەڕمێنی کاڵاکان زۆر گرنگە، بەتایبەتی لە ژێر ڕۆشنایی چالاکییە بازرگانییەکانی شارەکەدا کە فراوانتر دەبن. بەڵام لەگەڵ بەردەوامبوونی گەشەسەندنی شارەکە، خواست لەسەر گواستنەوەی گشتی مۆدێرن و متمانەپێکراو زیاتر دەبێت.
دابینکردنی پاسە بەرزەکان
لێرەدا بۆ جوانترکردنی ئەو شارە خاوەن شارستانییەتە، ڕاکێشانی سەرنجی زیاتری گەشتیاران و گەڕانەوەی هێزی دەروونی بۆ خەڵکە ماندووەکەی، جێی خۆیەتی دەیان پاسی مۆدێرن و دوو نهۆمی هاوردەی ئەو شارە بکرێت، کە دەتوانێت یارمەتیدەر بێت لە کەمکردنەوەی کێشەکانی هاتوچۆ و ئامرازێکی گواستنەوەی کارامە بۆ دانیشتووان و گەشتیاران، چونکە ڕەنگە پێتان سەیربێت کە بڵێین شەقامەکانی هەولێر لە شەقامی بەشێکی زۆری وڵاتانی ڕۆژئاوا فراوانترو گونجاوتر بێت کە ئەو ئامرازانەی وەک ترام و ئەندەرو ئۆڤیر گراون و شەمەندەفەری تێدایە. وەک هەنگاوی یەکەم ئەم پاسانە گونجاون بۆ شەقامە فراوانەکانی شارەکە و دەتوانن ژمارەیەکی زۆر لە سەرنشینەکان لەخۆبگرن، ئەمەش بە ئەگەرێکی زۆرەوە پێویستی تاک بە ئۆتۆمبێلی تایبەت کەمدەکاتەوە. تۆڕێکی پاسی پلان بۆ داڕێژراو دەتوانێت شوێنە سەرەکییەکانی سەرتاسەری شارەکە بەیەکەوە ببەستێتەوە، لەوانە ناوچە بازرگانییەکانی ئێستاو ئەوانەی دەکەونە پلانی داهاتووی حکومەت، شوێنە مێژووییەکان، ناوچەی بازاڕکردن، شوێنەکانی کات بەسەربردن، ئەمەش ئاسانکاری بۆ خەڵک دەکات بۆ گەشتکردن لە هەولێر. ئەم هەنگاوە نەک تەنها بۆ دانیشتووان بەڵکو بۆ گەشتیارانیش سوودی دەبێت، کە زۆرجار ڕووبەڕووی ئاستەنگ دەبنەوە لە جووڵەکردن بە دەوری شارەکەدا.
ستراتیژییەت و گەشەپێدانی بەردەوام
بۆ ئەوەی هەولێر جێگای خۆی وەک شارێکی گەورە لە ڕۆژهەڵاتی ناوەڕاست مسۆگەر بکات، پڕۆژەی ستراتیژیی شارستانی زۆر پێویستە. بۆیە دەبێت ئەم پڕۆژانە بە وردی پلانیان بۆ دابنرێت بۆ ئەوەی چارەسەری پێداویستییەکانی ئێستای شارەکەو لە هەمان کاتدا پێشبینی داواکارییەکانی داهاتووش بکرێت. ئەمەش دروستکردنی سەنتەری بازرگانی و هۆتێل و بینای ئۆفیسەکان دەگرێتەوە، تا هەولێر بگاتە ئاستی داواکاریی کۆمەڵگەیەکی بازرگانی گەشەسەندوو، بۆیە گرنگە وەبەرهێنان لە شوێنە گشتیەکان بکرێت، وەک پارک و شوێنە وەرزشییەکان و شوێنی پشوودانی زۆر پێویست بۆ دانیشتووان، ئەمە کوالیتی ژیان باشتر دەکات و پشتگیری هەستکردن بە بەرپرسیارەتی کۆمەڵایەتی زیاد دەکات.
گرنگی چاودێریی تەندروستی
بوارێکی گرنگی دیکە بۆ پەرەپێدانی ستراتیژی لە دامەزراوەکانی پەروەردە و چاودێریی تەندروستیدایە. لەگەڵ زیادبوونی ژمارەی دانیشتووان، دڵنیابوون لە دەستڕاگەیشتن بە قوتابخانە و زانکۆ و ناوەندەکانی چاودێری تەندروستی کوالیتی بەرز زۆر گرنگە. جگە لەوەش، دامەزراندنی ناوەندەکانی ڕاهێنانی پیشەیی دەتوانێت یارمەتیدەر بێت لە پڕکردنەوەی بۆشایی کارامەیی لە بازاڕی کاردا، ئامادەکردنی نەوەی نوێی کرێکاری لێهاتوو کە ئامادەن بۆ دابینکردنی پێداویستییەکانی شارێکی گەشەسەندوو.
هاندانی جووڵە و بەرکەوتنی نێودەوڵەتی
لەگەڵ گەشەسەندنی هەولێر، هاندانی جووڵە لەنێو هاووڵاتیانیدا گرنگ دەبێت بۆ پاڵپشتی هەردوو گەشەسەندنی تایبەتی و ئابووری بۆ زۆرێک لە دانیشتووان، دەرفەتی خوێندن یان کارکردن لە دەرەوەی وڵات نوێنەرایەتی چانسێکی بەنرخ دەکات بۆ بەدەستهێنانی کارامەیی و ئەزموونی نوێ کە تا ئاستێک پێشتر ئەو دەرفەتە بۆ قوتابیان ڕەخسێنراوە. پاشان دانیشتوانی گەڕاوە دەتوانن دیدگا و زانیاری نوێ بهێننەوە بۆ هەولێر، ئەمەش بەشدارە لە گەشەپێدانی شارەکە. سەرەڕای ئەوەش، ئاسانکاری بۆ گەشتکردن بۆ دەرەوەی وڵات دەتوانێت یارمەتی گەنجانی هەولێر بدات، بەتایبەتی بۆ دروستکردنی تۆڕ و فێربوون لە ڕەوتە جیهانییەکان، ئەمەش توانای کێبڕکێکردنیان لە ئابووری مۆدێرن بەرز دەکاتەوە. ئەو بەرنامە و دەستپێشخەریانەی کە هاندەری ئەزموونی خوێندن لە دەرەوەی وڵات یان ئاڵوگۆڕی پیشەیی دەتوانن هەولێر بگەیەننە ئاستی وڵاتانی پێشکەوتوو.
کردنەوەی هەفتە بازاڕ
ئێستا لە دونیادا، هەفتە بازاڕی گەڕۆک لە سەر شەقامە سەرەکی و شوێنە فراوانەکان دەکرێتەوە، کە هەر ڕۆژەی دەکەوێتە سنوری شارەوانییەک، کە کاسبکاران ئەو کەل و پەل و خۆراکانە لە ژێر خەیمەی بەکرێگیراوی شارەوانی بە چارەگە نرخ دەفرۆشنە کڕیاران، ئەمە سوودی هەمە لایەنەی هەیەو شارەوانی ئەو سنورانەش دەتوانن سوود ببینن لە داهات و کرێی هەفتانەی ئەو بازاڕە گەڕۆکانە بۆ خزمەتگوزاری سەوزایی و شەقام و باخچەو..تد
هەڵبەتە، ئەوە بە پلانێکی تۆکمە شوێنی شیاوی بۆ دابین دەکرێت، کە تەواوی خزمەتگوزارییەکانی کڕیارو فرۆشیاری لە شوێنی ڕاگرتنی ئۆتۆمبێل و ئاودەست و چێشتخانەو..تد تێدا بێت.
بێگومان لەم هەفتە بازاڕەدا هەرچی خەڵک پێویستی بێت ڕێگە پێدراوە بۆ فرۆشتن بەمەرجێک زیانی کۆمەڵگەی نەبێت