هاودەنگ فارووق
هەندێ لایەنی ناڕازی لەئەنجامی هەڵبژاردنی پەرلەمانی كوردستان، لەسەرەتای پرۆسەكەوە تا كۆتایی و ئێستایشی لەگەڵدابێت، قیبلەنمایان ونكردووە و، بێپلان و بێبەرنامە، شوێن قەرەباڵغی كەوتوون. ئێستایش، كە دەستیان لەبنی هەمبانەكەوە دەرچووە، لەبازنەیەكی بۆشدا دەخولێنەوە.
دوایەمین نمایشیان لەبەردەم مایكەكاندا دەكڕوزێنەوە و دەڵێن: با ئەنجوومەنی دادوەری كوردستان ئەنجامی هەڵبژاردنەكان قبووڵ نەكات.
پرسیارەكە ئەوەیە: ئەمانە كەی فێربوون بگەڕێنەوە بۆ لای دامەزراوەكانی كوردستان؟ ئەوە ئێوە نەبوون بە كۆمیسیۆنی كوردستان قایل نەبوون؟ داوای كۆمیسیۆنی بەغداتان كردوو، شوێنی قەرەباڵغی سۆسیالمیدیا كەوتن و لەخۆتانەوە بێ ئەوەی شارەزاییتان لەبابەتەكە هەبێت، دەتانگوت: متمانەی سەد لەسەدتان هەبێت و بێخەم بن، ئەمجارە مردووەكان دەنگ نادەن! دەركەوت ئەگەر دەنگدەری مردوو هەبن، دەنگدەری ئەوان بوون، چونكە نەك زیندو مردوویش سزایانداون.
ئێ براینە هێشتا ڤیدۆكانتان لە فەیسبووك و تیكتۆك كراشە دەكات، ئەی چ زوو، مێشكتان فۆرماتكرا و بێ ئەوەی بەڵگەتان هەبێت لەخۆتانەوە دەڵێن تەزویركراوە؟ لەوەش بەدتر چۆن داوا لەدامەزراوەیەكی كوردستانی دەكەن، كە ئێوە هەوڵی زۆرتاندا بۆ ئەوەی شەرعیەتی دەزگاكانی كوردستان نەمێنێت و، بەغدا لەورد و درشتی كارەكان بەشداربێت، چۆن هانا دێننەوە بەر دەزگایەكی كوردستان؟
پێشنیازی بەندە بۆ ئەو لایەنە بەڕێزانە ئەوەیە، دەستیان لەبنی هەمبانەكە دەربهێنن و، بچن لەدادگەی بەغدا سكاڵا بكەن لەو كۆمیسیۆنەی، كە هەمووان شاهیدی پێشوەخت و سەد لەسەدیان بۆدا. خۆ ئەگەر هیچ بەڵگەیەكیان نییە و، تەنها ورتە ورتی سۆسیالمیدیایە، دەبێ ئەوە بزانن كە مەسەلەیەكی یاسایی قورس و چارەنوسسازی وەكوو هەڵبژاردن، هی ئەوە نییە بە قسەی ڕووتی بەردەم مایكەكان چارەسەر بكرێت. ئاخر ئەمە بابەتی عاتیفە نییە، دادگاكان گوێتان بۆ بگرن.
لەبری ئەو شەڕەی بە ئەنجامەكانی دەفرۆشن، فەرموو ددان بەشكستی ئەمجارەتاندا بنێن و داوای لێبووردن لە گەلی كوردستان و بەتایبەت ئەندام و لایەنگرانی خۆتان بکەن.
ڕێگەی ڕاست ئەوەیە مرۆڤ پەند لە شكست وەربگرێت و بەخۆیدابچێتەوە، نەك پاساوی دۆڕان بێنێتەوە.خۆتان ئامادەبكەن بۆ هەڵبژاردنی داهاتوو، چاودێری ڕاستگۆی سەر كارەكانی حكوومەت بن لەناو پەرلەمانەوە، ببنە ئۆپۆزسیۆنی نیشتمانی، نەك وەك پۆپۆلیستی چەواشەكار، لە لاپەڕە فەیكەكانی سۆسیالمیدیاوە بۆ لایك و كۆمێنت خۆشتان و ئەزموونی حوكمرانی وڵاتی خۆتان سووك بكەن.
