بەكر كەریم حەسەن*
(بنجامین فرانكلین) فەیلەسوف و نوسەر و یەكێك لە دامەزرێنەرانی ویلایەتە یەكگرتووەكانی ئەمریكا دەڵێ: “وەبەرهێنان لە فێركردن و زانیندا، باشترین داهات و بەروبومە”.
پەروەردە و فێركردن لە هەر وڵاتێكدا بە خاڵی دەسپێكی هەموو هەنگاوەكانی تری گەشەپێدان و پەرەپێدان دادەنرێت، گەر توانرا گرنگی بە پەروەردە و فێركردن بدرێ ئەوا بە دڵنیایی دەتوانرێ لە داهاتوودا تاك و كۆمەڵگە و وڵات پارێزراو و پێشكەوتوو بێت نموونەی وڵاتان زۆرە.
ئەوەی مەبەستمە لەم وتارەدا باسی بكەم تەواوكەری وتارەكانی پێشووە لە ڕووی گرنگی پێدانی حكومەتی هەرێمی كوردستان كابینەی نۆیەم بە پەروەردە و فێركردن و هەنگاوەكانی وەزارەتی پەروەردە لە بوارە جیاوازەكاندا. بێگومان حكومەتی هەرێمی كوردستان كابینەی نۆیەم بە ڕابەرایەتی و سەرۆكایەتیی جەنابی كاك مەسرور بارزانی هەر لە ڕاگەیاندنی كارنامەی حكومەتدا بەڵێنی دا كەوا پێداچوونەوە بە پرۆگرامەكان بكرێت و وەزارەتی پەروەردە بە هەوڵ و ماندووبوونی ڕاستەوخۆی جەنابی وەزیری پەروەردە و بەڕێوەبەرایەتی پەیوەندیدار توانرا زیاتر لە (500) پێنسەد ناونیشانی خوێندن لە وەزارەتی پەروەردە لە كتێبەكان پێداچوونەوەیان پێ كراوە. هەورەها توانراوە هەڵسەنگاندن بۆ قوتابخانەكانی كوردستان بكرێت و پۆلین بەندی كراون بە سەر چەند ئاستێك و ئاستە زۆر باش و نایابەكان پادداشت دەكرێن و ئاستە لاوازەكانیش بەداوداچوون و لێپرسینەوەیان لەگەڵ دەكرێت. جودا لەمەش لە كابینەی نۆیەم وەزارەتی پەروەردە توانیی (76) حەفتا و شەش قوتابخانە بە وزەی خۆر کاربکەن وە (26384) بیستوشەشهەزار وسێسەد و هەشتاوچوار قوتابی دابڕاو گەڕێندراوەتەوە بۆ خوێندن، قوتابیانی خاوەن پێداویستی تایبەت تێكەڵ بە قوتابیانی ئاسایی كراون لە قوتابخانەكان و شوێنی ٦٠هەزار قوتابی پەنابەر كراوەتەوە لە قوتابخانەكانی خانەخۆیی و، یەكێك لە گرنگترین ئاماژە دیارەكانی كابینەی نۆیەم و وەزارەتی پەروەردە ئەوەیە ڕێژەی نەخوێندەواری بەبەراورد بە دە ساڵی ڕابردوو توانرا لە 24% بكرێتە 16% بە پێی ئامارەكانی دەستەی ئاماری هەرێم و دەستەی ئاماری عێراقی فیدراڵ.
وێڕای هەموو ئالنگاری و سەختی و ئاستەنگەكان، بەڵام كابینەی نۆیەمی حكومەتی هەرێمی كوردستان بە سەرۆكایەتیی جەنابی سەرۆكی حكومەت بە ئیرادەیەكی بەهێزی خۆڕاگرانە بەردەوام بوو لە خزمەت و پاڵپشتیكردنی هەنگاوە بەردەوامە پەروەردەییەكانی جەنابی وەزیری پەروەردە كە ئەوە بوو ستراتیژی ڕاهێنانی مامۆستایانی (2023-2030) خستە بواری جێبەجێكردن و ئەمساڵ دووەم ساڵیەتی كە كۆمەڵێ ڕاهێنەری توانا لە ناو قوتابخانەكان مامۆستایانی هەردوو قۆناغی بنەڕەتی و ئامادەیی ئاشنا دەكەن و فێریان دەكەن لەسەر چۆنیەتیی میتۆد و ڕێگای وانەگوتنەوە و چۆن قوتابی بێتە سەنتەر و بەركارهێنانی تەكنەلۆژیا و چۆنیەتیی بەڕێوەبردنی پۆڵ و مامەلەكردن لەگەڵ قوتابی و چۆنیەتی هەڵسەنگاندنی قوتابی و دانانی پرسیارەكان و چۆنیەتیی دروستكردنی مامۆستا و بەڕێوەبەری سەركردە و تێگەیشتنی مامۆستا بۆ پرۆگرام و چۆنیەتی بەكارهێنانی هۆیەكانی فێركردن، كە مەبەست لێی تواناداركردنی مامۆستایانی كوردستانە كە ئەوەش هەنگاوێكی تری گرنگ وكاریگەرە لە هەنگاوە دیارو بەرچاوەكانی وەزارەتی پەروەردە لە ژێر ڕۆشنایی ئەوەی كە هیچ سیستەمێكی پەروەردە و فێركردن كوالێتی باش نابێت، ئەگەر كوالێتی ئەدای مامۆستاكانمان باش نەبێت.
ئەوەش جارێكی تر قسەی بانگخواز وبەرگریكاری مافەكانی مرۆڤ لە ئەمریكا(مالكوم ئیكس) مان دێنێتەوە یاد كە دەلێت” سبەی بۆ ئەوانەیە كەوا ئەمڕۆ ئامادە كراون”.
*ڕاوێژكار لە وەزارەتی پەروەردە -ماستەر لە كارگێڕیی پەروەردەیی
بەشێك لە دەستکەوتە پەروەردەییەکانی کابینەی نۆیەم
