برسیكردن و شەڕی پڕوپاگەندەیی دژی كوردستان

مەشخەڵ كەوڵۆسی

دەساڵ زیاترە دەوڵەتی عێراق مووچە و قووت و بودجەی خەڵكی كوردستانی بڕیوەو، هەرجارە و بەپاساوێك و هەر ساڵە بە بیانویەك و هەر مانگێك بە تەشقەڵەیەك، مووچەی خەڵكی كوردستان نانێرێت. ئێمە هەر لەسەرەتای بڕینی بودجە و بگرە پێش ئەوەش بودجە ببڕێت، دەمانزانی بودجە دەبڕێت و، عێراق لەو هەنگاوەدا ئامانجی خۆی هەیە.
لەهەر دەرفەتێكیش بۆمان ڕەخسابێت، لەمیدیاكان و كۆبوونەوەو پرس و ڕاوێژكارییەكاندا، ئەوەمان بۆ خەڵك و لایەنی پەیوەندیدار ڕوون كردۆتەوە كە ئامانجی عێراق لەبڕینی بودجە ئاشكرایە و، هەركەس كەمترین شارەزایی لە پرۆسەی دروستكردنی بڕیار هەبێت، تێدەگات ئامانجەكە چییە؟ كە دیارە ئامانجی ڕاستەقینەو میحوەری ئەو هەنگاوە، بریتییە لە هەڵوەشاندنەوەی هەرێمی كوردستان.
عێراق لەڕێی گەمارۆدانی ئابووری هەرێمی كوردستانەوە، دەیەوێت تاڕادەی سفركردنەوە كورد بچوك بكاتەوە. بەڵام وەك سروشتی هەر ئامانجێكی ستراتیژی، هاتووە بەكۆمەڵێك هەنگاو، بەكۆمەڵێك میكانیزم و ئامرازی شەڕی دەرونی و تاكتیكی میدیایی و پڕوپاگەندەیی، ئەو ئامانجە گەورەیەی شاردۆتەوە.
ئەو دەوڵەتە لەهیچ جێگەیەك نەیگووتوە: دەبێت هەرێمی كوردستان هەڵبوەشێتەوە! بەڵام هاتووە ئەو ئامانجەی لەدوو توێی بەرنامەكانیدا جێكردۆتەوەو، هەركەس چاوێكی شیكاری تیژی هەبێت، زۆر بەئاسانی دەیدۆزێتەوەو، دەیبینێت. بۆ ئەوەی لەو هاوكێشەیە تێبگەین ئەوەندە بەسە كە بەسەرە قەڵەمێك بڵێین: كێ دەتوانێت نكولی بكات لەوەی شانبەشانی بڕینی مووچە لەماوەی دەساڵی ڕابردوودا، عێراق شەڕێكی پڕوپاگەندەیی مەترسیداری لەدژی هەرێمی كوردستان پێڕەو كردووە، لەو شەڕەشدا خەڵكی كوردی بەكارهێناوە، پەرلەمانتار و میدیا و نووسەر، كە بەكوردی دەدوێن و تەسلیمی ئەو ستراتیژەی عێراق بوون و، بوونەتە بەشێك لەپلانی جێبەجێكردنی هەنگاوەكانی ئامانجەكە.
ئەوانە هەر ماوەیەك بیانویەكی جیاواز دەكەنە تیلی دەستیان و مێشكی خەڵكی پێدەشۆرنەوە، جارێك ڕادەستكردنی نەوت، ڕادەستكردنی داهاتی ناوخۆ، دەروازەكان، ئینجا كە هەموو ئەوانە كران، هاتن بۆ شتی بچوكتر و مەسەلەی تەكنیكی سادە، وەكو لیستی مووچە، زیادە كەمی لیستی مووچە، پرسی ئیداری بچوك، وەكو تێبینی لەسەر لیستی مووچە….هتد.
ئەگەر بێت و خەتێكی بەیانی دروستبكەین، دەبینین لە پرسە گەورەكانەوە، بۆ پرسە بچوكەكان، ئەوانەی بوونەتە بەشێك لە پرۆژەی هەڵوەشاندنەوەی هەرێم و ڕۆڵی تابووری پێنج دەبینن، لەسەرەو بۆ خوارەوە هاتوون و هیچ هەنگاوێكی حكومەتی هەرێم نیە، ئەوان بەتەنیشتییەوە كاریان نەكردبێت و پاساوێكی وردتریان بۆ بەغدا نەدۆزیبێتەوە.
شەڕە پڕوپاگەندەییەكە ئەوەندە بەوردەكارانە دەكرێت، دوورنیە ئەو پەرلەمانتار و نووسەر و میدیایانە، دەیان خولیان لەسەر شەڕی دەروونی و پڕوپاگەندەیی بینیبێت، ئەوجا ئەو شەڕەیان پێ سپێردراوە. خاڵێكی تریش كە جێگەی سەرنجە ئەوەیە: لەهەر قۆناغێكدا ژمارەیەك كەسایەتی وپەرلەمانتار بەكاردێنن و، ئەوانەیان كە واجبیان تەواو دەبێت، بێدەنگ دەبن و، كۆمەڵێكی تر دێنە پێشەوە بۆ بەڕێوەبردنی جەنگەكە، ئامانج لەگۆڕینی ئەو كارەكتەرانەش ئەوەیە كە جەماوەر زیاتر بڕوابكەن و شەڕە دەرونییەكە، كاریگەرتربێت، ئەوە كاركردنە لەسەر سایكۆلۆژیای سادەی خەڵكی كوردستان. فەرمانبەرێكی سادە تەنها ئەوەندە دەزانێت بڵێت: فڵان پەرلەمانتار و فیسار نوسەریش هەر دەڵێن خەتای لیستەكانی هەرێمە!. تاكو ناوەكان زیاتر بن و ناوی تازەیان تێدابێت، ئاستی متمانەی شاهیدی دانەكەی ئەوان كاریگەر تر دەبێت.
كێشەكە لەوەدایە لەبەرانبەر ئەو شەڕە پڕوپاگەندەییەدا، كورد و لایەنی پەیوەندیداری كوردستان، میدیا و كەسایەتییەكانی هیچ كاردانەوەیەكی پڕ بەپێستیان نیە، ئەوانیش بڕوایان كردووە بەوەی مەسەلەكە تەكنیكییە و، تێبینی لیستی مووچە هۆكاری نەناردنی مووچەیە. ڕێك شەڕە پڕوپاگەندەییەكەی بەغدا ئامانجی خۆی پێكاوە.