بارزانی لە ئەفریقاتایتڵێكی گەورەی شۆڕشە

مەشخەڵ كەوڵۆسی

سروشتی نەتەوەكان وایە هەمیشە هەوڵدەدەن جێپەنجەیان بەسەر مێژوو دیاری بكەن، بۆئەوەی وەك نەتەوەیەكی زیندوو تەماشا بكرێن، هەوڵدەدەن زۆرترین بەهای خۆیان هەناردە بكەنە ناو فەرهەنگی گەلانی دنیا. هەناردەكردنی فەرهەنگی لۆكاڵی، بەهاكانی كۆمەڵگە بۆ ناو ڕەوتی شارستانی و مێژووی دنیا، یەكێكە لە خەسڵەتە هەرە گرنگەكانی جوڵەی مرۆڤایەتی لەسەردەمی جیهانگیریدا.
دەتوانین بەبێ ترس بڵێین: هەر نەتەوەیەك، نەتوانێت نمونەكانی خۆی هەناردە بكاتە ناو فەرهەنگی گەلانی دنیا، بێگومان هیچ بوارێكی ژیانی نامێنێت و، لەسەردەمی جیهانگیریدا مەجالێك بۆ ژیانی ئەو گەلانە نیە و، فەرهەنگی بێدەنگ، میللەتی بێ بەرهەم و ئەوانەی ناتوانن ئیزافەیەك بخەنە سەر خەرمانی مێژووی مرۆڤ، یان خەرمانی شارستانی و بەهایی مرۆڤایەتی، ئیدی دەچنە خانەی فەرهەنگە بێدەنگەكان و پەیتا پەیتا لەژێر فشاری جیهانگیری و هێرشی فەرهەنگە ناتقەكاندا دەپلیشێنەوەو، دەمرن. هیچ ڕۆڵێك نابینن و مەحكومن بەمەرگێكی سەقافی و مێژوویی حەتمی. ئەوجا مردنی فیزیكی نەتەوەش هیچ نیشانەیەكی پرسیار دروستناكات لەهیچ كایەیەكی جیهانیدا.
نەتەوەی كورد یەكێك لەو نەتەوانەیە كە تاكو ئێستا نەیتوانیوە بەهاكانی خۆی هەناردە بكاتە ناو جوڵەی شارستانی ئەم سەردەمە. هیچ نوسەرێكی كورد نەبووەتە نوسەرێكی جیهانی. هیچ وشەیەكی كوردی(جگە لەوشەی پێشمەرگە بەهۆی شەڕی داعشەوە) هیچ بەهایەكی كوردی، تەنانەت خواردن و ئاواز و هونەر، هونەرمەند و بەهرەمەندی كورد…هتد، هیچكام لەوانە نەیانتوانیوە پێگەیەكی جیهانی بۆخۆیان دروستبكەن.
هەندێك هەوڵدەبینین بۆ ئەوەی چەند ڕۆمان و كتێبێكی كوردی بخرێنە سەر زمانە زیندووەكانی جیهان، بەڵام گۆشەی لاوازی ئەو هەوڵانە لەوەدایە كە پێویستییەكی كتێبخانەی جیهانی نیە بۆ وەرگێڕانی ئەو كتێبانە، بەڵكو خودی نوسەرە كوردەكە خۆی هەوڵدەدات كتێبەكەی بۆ زمانەكانی دیكە بگۆڕدرێت. لەنێوان ئەو دوو بابەتەشدا جیاوازییەكی گەورە هەیە.
ڕەنگە لەڕاستی دوورنەكەومەوە ئەگەر بڵێم: ڕاستە بەهۆی ئیسلام و كاركردن لە حەقڵە فیقهی و مێژووییەكاندا، ناوی چەند كەسایەتییەكی كورد لەمێژوودا بڵاوبووەتەوە، بەڵام ئەو كەسایەتییانە وەك كەسایەتی ئیسلامی ناوبانگیان هەیە، بۆنمونە سەلاحەدینی ئەیوبی، ئەوەندەی وەك سەركردەیەكی ئیسلامی كوردی ناوبانگی هەیە، نیو ئەوەندە وەكو ڕێبەرێكی كورد ناوی نەچووەتە ناو مێژووی گەلانی دنیا…هتد. ئەوەش بۆ زانا شەرعناس و فەقیهەكانی كوردیش ڕاستە.
لەوانەیە یەكەمجارم بێت كە دوای بەدواداچوون و چاوپێكەوتنی چەندین ڕێكخراو و ڕۆشنبیر و كەسایەتی ئەفریقی، تێگەیشتم ئەوان لەڕێگەی مەسعود بارزانییەوە ئاشنابوون بە كورد. ئەمە پارادۆكسێكی سەیرە بەلامەوە. هەمیشە لەڕێی نەتەوەكانەوە كەسایەتییەكان ناسێنراون، كەچی ئەمجارە لەڕێی كەسایەتییەكی كوردییەوە نەتەوەكە دەناسێنرێت. بەهەمان ئەو شێوەیەی كە لەڕێی جیڤاراوە، خەڵك هەم ئەرژەنتینی ناسی و هەم بە شۆڕشی كوباش ئاشنابوو.
مەسعود بارزانی لەئەفریقا، تایتڵێكی گەورەی شۆڕشە. ئەوەی كە بەندە پێی گەیشتووم ئەگەرچی شۆكی كردووم، بەڵام ڕاستییەكی گرنگە و سەرمایەیەكی بەهایی كاریگەرە. خەریكە بەتەواوی ناوی مەسعود بارزانی دەچێتە ناو جومگەكانی سەقافەتی شەعبی لەنێو گەلانی ژێردەستەی ئەفریقادا.
بەجۆرێك هەركات بارزانی باسی سەربەخۆیی كوردستانی كردبێت، ئەوان وەكو سیمبولێكی ئازادی گەلانی ژێردەستە حسابیان بۆ كردووە. ئەمە ئەو كۆدەیە كە پێویستە كورد و بەتایبەتی ئەوانەی لە جەنابی بارزانی نزیكن، وەبەرهێنانی زۆر گەورەی لەسەر بكەن.